O‘zbekiston Respublikasi Prezidenti Shavkat Mirziyoyev raisligida joriy yilning 4-mart kuni oliy o‘quv yurtlari talabalari bandligini taʼminlash bo‘yicha ustuvor vazifalarga bag‘ishlangan videoselektor yig‘ilishi o‘tkazilgan edi.
Yig‘ilishda talabalar bandligini taʼminlash bo‘yicha belgilangan vazifalar ijrosini taʼminlash maqsadida Buxoro davlat universiteti rektori Obidjon Xamidov bilan Tabiiy fanlar fakulteti talabalari o`rtasida uchrashuv bo’lib o’tdi.
Mazkur uchrashuv mamlakatimiz yoshlari orasida keng tarqalgan muammolar, talaba yoshlarning ish bilan bandlik masalalari, yoshlarning bo’sh vaqtlarini mazmunli tashkil etish, moddiy himoyaga muhtoj talabalarni qo’llab-quvvatlash, ularning loyihalarini amalga oshirishda ko`maklashish, ijtimoiy faolligini oshirish, ishga joylashishni istovchi talabalarga yordam berish maqsadida tashkil etildi.
BuxDU rektori Obidjon Xamidov prezidentimiz tomonidan o`tkazilgan videoselektor mazmunini talabalarga tushuntirdi. Bitiruv oldi amaliyotlarda talabaga eng kam ish haqi miqdorida mablag` ajratilishi, Xalqaro tili bilish darajasini belgilovchi sertifikatga ega talabalarning imkoniyatlari kengayishi, ta’lim davomida ko`proq amaliyotga e’tibor beriladigan tizimga o`tilishi xususidagi yangiliklarni o`rtoqlashdi.
Uchrashuv davomida hunari bor, maishiy va texnik xizmat ko‘rsatish, xususiy repititorlik, trenerlik va konsultantlik yoki tarjima qilish xizmatlari bilan shug‘ullanishni istovchi, dasturlash xizmatlarini taqdim etish istagidagi talabalarga faoliyatlarini yo`lga qo`yishlari uchun shart-sharoit yaratilib berilishi aytildi.
#savol
Tikuvchilik hunarini egallaganman. O`qish davomida, darsdan so`ng ta’lim muassasamizda tengdoshlarimga ushbu hunarni o`rgatishim, ishlab chiqarish bilan shug`ullanishim uchun shart-sharoit yaratib bera olasizmi?
Geografiya fakulteti talabasi
#javob
Albatta, hunar o`rgatishni istovchi talabalarning tashabbusi qo`llab-quvvatlanadi. Talabalar turar joyida tikuvchilik faoliyati bilan shug`ullanish uchun yetarli shart-sharoitga ega xonamiz bor. Istasangiz, ana shu xonadan foydalanishingiz mumkin. Faoliyatingizni kengaytirish hamda ishsizlarni ish bilan ta’minlash istagingiz bo`lsa, yakka tartibdagi tadbirkorlar uchun davlat ko`magi bor. Ishlab chiqarishni yo`lga qo`yishingiz, talabalarimizga ish o`rgatishingiz tarafdorimiz.
Obidjon Xamidov,
BuxDU rektori
Uchrashuvda talabalar o`zlarini qiziqtirgan savollarga atroflicha javob oldilar. Takliflari, loyihalari bilan o`rtoqlashdilar.
