Buxoro davlat universiteti bosh faollar yig`ingohida rektor Obidjon Xamidov boshchiligida prorektorlar, bo`lim boshliqlari, fakultet dekanlari hamda kafedra mudirlari ishtirokida yig`ilish bo`lib o`tdi.
Unda shu oyda Oliy va o‘rta maxsus ta’lim vazirligi, Ta’lim sifatini nazorat qilish davlat inspeksiyasi hamda O‘zbekiston Teleradiokompaniyasi ishchi guruhi tomonidan o‘rganilgan ishlar tahlili va 2022-yilga mo`ljallangan vazifalar, Buxoro davlat universitetining Pedagogika institutida o‘quv jarayonining borishi, kafedralar huzuridagi ilmiy-tadqiqot markazlari faoliyatini tashkil etish, O‘zbekiston Respublikasi Prezidentining 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida”gi qarori asosida talabalarning bo`sh vaqtlarini mazmunli o`tkazish, universitet ta’lim, ilmiy, tashkiliy-boshqaruv va boshqa faoliyatlariga xorijiy mutaxassis va vatandoshlarni jalb qilish kabi bir qator masalalar ko`rib chiqildi.
Universitet ilmiy kengashi mobaynida bir qancha professor-o'qituvchilar fan doktori hamda falsafa doktori diplomi va professorlik hamda dotsent ilmiy unvonini olganlar, O’zbekiston Respublikasi Prezidenti va nomli davlat stipendiyalari g’oliblari taqdirlandi.
O’zbekiston Respublikasi Prezidenti Davlat stipendiyasi sovrindorlari Mohinur Saidova, Buxoro tarixi ta’lim yo`nalishi bitiruvchisi Behruz Baxtiyorov, Ulug‘bek nomli Davlat stipendiyasi g’oliblari Matematika yo`nalishi bitiruvchisi Nursaid Merjanov, Amaliy matematika va informatika yo`nalishi talabasi Sevarabonu Ibodova, Navoiy nomli Davlat stipendiyasi g’oliblari Filologiya fakulteti talabalari Aziza Zaripova, Gulzoda G`ayratova, Marjona Teshayeva, Xorijiy tillar fakulteti talabasi Iroda Hamidova, Iqtisodiyot ta’lim yo`nalishi bitiruvchisi Nozima Qodirova, Jismoniy madaniyat fakulteti talabasi Malohat Baxshullayevalar, Islom Karimov nomli Davlat stipendiyasi sohibasi Nafisa Rahmonqulovalar hamda ularning ilmiy rahbarlari jamoa oldida taqdirlanishdi. Ularning kelgusidagi faoliyatlariga muvaffaqiyat tilash asnosida tengdoshlariga o`rnak bo`lishlari, kelajakda universitet nufuzini ko`taradigan yetuk kadrlar bo`lishlariga ishonch bildirildi.
Qolaversa, talabalarning bo`sh vaqtlarini samarali va mazmunli o`tkazish maqsadida tashkil etilgan eng yaxshi maqola, eng yaxshi she'r, eng yaxshi insho, eng yaxshi rasm, kitobxon talaba tanlovlari g`oliblari hamda Oliy matematika, Axborot texnologiyalari, Biologiya, Kimyo fan olimpiadalari g`oliblari I, II, III darajali diplomlar bilan taqdirlanildi.
