Ayol – Allohning bebaho tuhfasi, umr bahorining guli, har qancha ta’rif-u tashbehlar ojiz bo`lgan mo`jizadir. Bahorning benazir kunlarida bayramlar bayramlarga ulanib, hayotimiz yoritguvchi chiroqlari xotin-qizlarimizning go`zal ayyomi – 8-mart arafasida turibmiz.
Bugun Buxoro davlat universiteti katta faollar yig`ingohida BuxDU rektori Obidjon Xamidov boshchiligida, BuxDU xodimlar va professor-o'qituvchilar Kasaba uyushmasi hamda Ma'naviyat va ma'rifat bo'limi hamkorligida nafosat va nazokat ayyomi munosabati bilan jamoada xizmat qilayotgan barcha mo`tabar va aziz xotin-qizlarimiz uchun atalgan “Ayol borki, olam munavvar” deb nomlangan badiiy bayram tadbiri bo`lib o`tdi.
Yuksak saviyada tashkil etilgan bayramda Buxoro davlat universitetining ayol professor-o`qituvchilari, rahbar ayollar, ishchi-xodimalar ishtirok etishdi. Tadbirni Buxoro davlat universiteti rektori Obidjon Xamidov samimiy yo`llagan dil so`zlari bilan ochib berdi:
– Ayollarni, qizlarni bahorga qiyoslashadi. Ayolni e’zozlash – bizning millatimiz, xalqimiz uchun oliy qadriyat darajasiga ko`tarilgan fazilat. Ayollarni qancha ulug`lasak, hayotimizning chirog`i, umrimizning bahori, guli deb e’zozlasak, demakki, oilamizni, Vatanimizni e’zozlagan bo`lamiz.
Umr yo‘lida qanday og‘ir sinov va mashaqqatlarga uchramaylik, ularni yengib o‘tishda ruhimizni ko‘tarib, g‘ayratimizga – g‘ayrat qo‘shadigan insonlar ham dunyodagi eng mo‘tabar zotlar, onalarimiz, opa-singillarimiz, jonajon qizlarimiz- bebaho ayollarimizdir.
Umrimizning har bir kunida hissangiz bor. Bayramingiz qutlug` bo`lsin, aziz ayollar!
– Xotin-qizlarimizning nafaqat kundalik turmushda, balki davlat miqyosidagi eng muhim masalalarni hal qilishda o‘rni va roli tobora ortib borayotganini alohida qayd etishni zarur. Kuni kecha yurtboshimiz ham alohida izzat-ikrom bilan qizlarimiz ta’limiga alohida e’tibor berganlari, ularning jamiyatdagi rolini oshirish maqsadida yaratilayotgan imkoniyatlar e’tirofga sazovor. Har yilgidan o`zgacha tashkillashtirilgan ushbu bayram tadbiri kayfiyatimizni ko`tarish barobarida diydorlashish onlarini tuhfa etdi, - dedi BuxDU professori Shoira Ahmedova o`z taassurotlarini o`rtoqlashish asnosida.
Xalqaro xotin-qizlar kuniga bag‘ishlab o‘tkazilayotgan tadbir har doimgidan-da o‘zgacha tus hamda ko‘tarinki ruhda o‘tdi. Tadbir davomida ayollarga e’tibor namunasi sifatida gullar va tabriknomalar taqdim etildi. San’atshunoslik fakulteti magistrantlari, o`qituvchilari tomonidan ijro etilgan dilbar taronalar, kuy-qo`shiqlar, fakultet qoshida tashkil etilgan “Feruza” raqs ansamblining jajji bolajonlari tomonidan tayyorlangan raqslar bayram tadbiriga fayz bag`ishladi.
