14-fevral benazir inson, adolatli shoh va shoir Zahiriddin Muhammad Bobur tavallud topgan kun. Zahiriddin Muhammad Boburning shaxsi, murakkab hayoti va ijod yo‘li bugungi avlod uchun katta maktab, beqiyos ilmiy-adabiy merosdir. BuxDU faollar yig`ingohida Zahiriddin Muhammad Bobur tavalludining 539 yilligiga bag`ishlab tashkil etilgan "Bori elg`a yaxshilig` qilg`il..." nomli adabiy-ma’rifiy kechada ana shu fikrlar o‘z e’tirofini topdi. O‘zbek tili va adabiyoti kafedrasi hamda Buxoro ixtisoslashtirilgan san’at maktabi hamkorligida tashkil etilgan tadbirda Buxoro davlat universiteti rahbar xodimlari, o‘qituvchi-pedagoglari, talabalar va jamoatchilik vakillari ishtirok etishdi.
– 14-fevral dunyoni hayratga solgan yirik davlat va madaniyat arbobi, shoir, sarkarda, donishmand ,tarixchi, zakovatli olim va tarjimon Zahiriddin Muhammad Bobur tavallud topgan qutlug` sana. Bobur adabiyotimizning Navoiydan keyingi zabardast vakili hisoblanishi barobarida o`z hayoti bilan asrlar mobaynida yoshlarga o`rnak bo`layotgan inson sifatida e'tirofga sazovor. Jahonning eng mashhur shaxslaridan biri bo`lgan Boburning murakkab va ziddiyatli hayoti o'spirinlikdan to umrining oxirigacha jang-u jadallar, sarson-sargashtalik, zafar va mag'lubiyat, ijod-u bunyodkorlik ichida kechgani, ammo hayotning zarbalarida bukilmagan irodasi, dilbar qalbi har birimizga o`rnak bo`la oladi, – dedi BuxDU rektori Obidjon Xamidov samimiy dil so`zlarini bildirib.
Tadbirning badiiy qismida Filologiya fakulteti talabalari tomonidan Zahiriddin Muhammad Boburning hayotiga oid sahna ko'rinishlari namoyish etildi. Mahorat bilan ijro etilgan kuy-qo'shiqlar va raqslar barchaga a'lo kayfiyat bag'ishladi.
BuxDU Matbuot xizmati
