Butun yurtimiz bo‘ylab keksa avlod vakillarini har tomonlama qo‘llab-quvvatlash, ularning jamiyat, oilalar va mahallalarda tinchlik va osoyishtalikni ta’minlash, shuningdek, yosh avlodni xalqimizning ko‘p asrlik an’analarini hurmat qilish ruhida tarbiyalash ishidagi rolini oshirish maqsadida “Keksalarni e’zozlash, ularga hurmat-ehtirom ko‘rsatish – xalqimizga xos ezgu fazilat” degan bosh g‘oyani o‘zida mujassam etgan “Keksalar haftaligi” bo‘lib o‘tmoqda. Ana shunday e'tibor natijasi o`laroq, bugun Buxoro davlat universiteti rahbariyati hamda universitet kasaba uyushmasi tomonidan ko‘p yillar mobaynida ushbu dargohda samarali mehnat qilgan nuroniylar hamda ayni paytda ham faoliyat olib borayotgan soha faxriylari uchun “Keksalar haftaligi” hamda “Uch avlod uchrashuvi” doirasida, “Keksalar qadr topgan yurt” shiori ostida bayram tadbiri o`tkazildi.Tadbir avvalida tashrif buyurgan nuroniy mehmonlar BuxDuning so`nggi yillarda ishga tushgan xonalarini ko`zdan kechirishdi. Biznes akselerator”, BuxDU Muzeyi, yangi Axborot resurs markazi, “Islohotlar xalq uchun” markazi faoliyati bilan tanishishdi. Shundan so`ng, Katta faollar yig`ingohida tashkillashtirilgan bayram tadbiriga tashrif buyurishdi. Tadbirni ochib bergan Buxoro davlat universiteti Fizika kafedrasi professori, pedagogika fanlari doktori Qahhorov Siddiq Qahhorovich o`zining samimiy dil so`zlari bilan yig`ilganlarni qutladi. O`tgan davrda professor-o`qituvchilar uchun yaratilgan sharoitlarning nechog`lik yaxshilanib kelayotgani, bugungi ilmiy salohiyat xususida fikr-mulohazalarini bildirdi. Fikrlarini statistik ma’lumotlar bilan dalilladi. Xo`ja Ismat masjidi imom-xatibi Saloyiddin hoji Gadoyev o`z ma’ruzasida keksalikning ahamiyati, uning afzalliklari haqida gapira turib, ushbu qutlug` davrada o`tirgan ustozlarni ushbu davrning guvohi sifatida tabrikladi. Yurtimizdagi keksalarga e’tibor haqida qimmatli fikrlarini bildirdi. Falsafa hamda Tarix kafedralarida ko`p yillar mobaynida talabalarga ilm bergan ardoqli ustozlar Matluba Boltayeva va Sharif Boltayevlar so`zga chiqib, o`zlarining BuxDUda kechgan yillari, o`tgan sharafli hayotlari xususida gapirib, ushbu tadbirni tashkil etganlari, hamkasblar bilan diydorlashish baxtiga musharraf bo`lganlari uchun tashakkur aytishdi. BuxDU rektori O.X.Xamidov so`zga chiqib, ko`p yillar mobaynida universitetning nomini Respublika miqyosida tilga olinishiga hissa qo`shgan faxriy ustozlarni yana bir bor ushbu muassasada ko`rayotganlikning o`zi bir sharaf, ekanligini ta’kidladi. Mana shu ustozlarning mehnati sabab Buxoroda ilm-ma’rifat yuksalayotganini e’tirof etdi. Tadbir kuy-qo`shiqlar hamohangligida ko`tarinki kayfiyatda o`tdi. Universitet ma’muriyati hamda universitet kasaba uyushmasi tomonidan tashkillashtirilgan dasturxon atrofida, bir piyola choy ustida diydorlashuv davom etdi. Ta’kidlash lozim, yurtimizda keksa avlod vakillarini ijtimoiy–iqtisodiy muhofaza qilish, ularga e’tibor hamda g‘amxo‘rlikni kuchaytirish, turmush sharoitini yaxshilash, faol va mazmunli hayot kechirishlarini ta’minlash, shu qatorda, ularning boy hayotiy tajribasidan keng foydalanish maqsadida o`tkazilayotgan bunday tadbirlar nuroniylarimizning quvonishlari, o`tgan umrlarini eslab, kechgan damlarini mamnuniyat bilan xotirlashlari hamda shukrona tuyg`usini uyg`otishi bilan ahamiyatli. Bu kabi ijtimoiy-ma’rifiy loyihalar yoshi ulug‘ insonlar mamlakatimizda doimo e’tibor va e’zozda ekanini yana bir bor tasdiqlaydi.BuxDU Matbuot xizmati
