Biz yangi O‘zbekistonni, yangi Renessans poydevorini barpo etishdek ezgu maqsadlarimizga erishishda, hech shubhasiz, ona tilimizning hayotbaxsh qudratiga tayanamiz.Chunki, necha asrlar osha ajdodlarimizdan bizga bezavol o‘tib kelayotgan ona tilimizning ravnaqi va istiqboli haqida qayg‘urish – bu millatning o‘zligini anglashi, uning ma’naviy kamolotini yuksaltirish uchun kurash demakdir. Davlat tilining obro‘-e’tibori – butun xalq, butun jamiyatning obro‘-e’tiboridir.YUNESKO ma’lumotiga ko‘ra, hozirgi kunda dunyoda 6 ming 909 til mavjud bo‘lib, ulardan 200 ga yaqini davlat tili maqomiga ega. Ular orasida ona tilimiz-o‘zbek tilining ham borligi qalbimizni faxr-iftixorga to‘ldiradi. Inson qalbiga jamiki ezgu fazilatlar ona allasi, ona tilining betakror jozibasi orqali singadi. O‘zlikni anglash, milliy ong va qadriyatlar, avlodlarni bir-biriga ruhiy va ma’naviy jihatdan bog‘lovchi vosita bu tildir.1989-yilning 21-oktyabrida o‘zbek tiliga Davlat tili maqomi berilishi tom ma’nodagi jasorat va istiqlol sari qo‘yilgan ilk qadam sifatida ulkan ahamiyatga ega. Istiqlol yillarida ona tilimizning nufuzini yanada oshirish, ommaviy muomalada adabiy til me’yor va qoidalari buzilishining oldini olish borasida amalga oshirilgan aniq maqsadli ishlar o‘z samarasini berdi. “Davlat tili haqida”gi qonunga asosan ish yuritish, ta’lim-tarbiya, ommaviy axborot vositalari, noshirlik sohalarida o‘zbek tili faol qo‘llanilmoqda, o‘zaro muloqot vositasi sifatida mavqeyi tobora oshmoqda.Darhaqiqat, tilimiz shu darajaga yetishishiga minglab ajdodlarimizning mashaqqatli hayoti, cheksiz mehnati yotadi.2019-yil 4-oktabrda O‘zbekiston Respublikasi Prezidentining “O‘zbekiston Respublikasining “Davlat tili haqida”gi Qonunini qabul qilinganining o‘ttiz yilligini keng nishonlash to‘g‘risida”gi qarori bilan keng miqiyosida ma’naviy ma’rifiy chora-tadbirlar amalga oshirildi.2019-yil 21-oktyabrda O‘zbekiston Respublikasi Prezidentining “O‘zbek tilining davlat tili sifatidagi nufuzi va mavqeyini tubdan oshirish chora-tadbirlari to‘g‘risida” gi Farmoni qabul qilindi. Ushbu farmon bilan O‘zbekiston Respublikasi Vazirlar Mahkamasi tuzilmasida Davlat tilini rivojlantirish departamenti tashkil etildi. Shuningdek ushbu farmon bilan O‘zbekiston Respublikasi Oliy Majlisi palatalari, Madaniyat vazirligi, O‘zbekiston Yozuvchilar uyushmasi, Respublika ma’naviyat va ma’rifat markazi va keng jamoatchilikning o‘zbek tiliga davlat tili maqomi berilgan kun – 21-oktyabr sanasini “O‘zbek tili bayrami kuni” deb e’lon qilish to‘g‘risidagi taklifi ma’qullandi.2020-yil 20-yanvarda O‘zbekiston Respublikasi Vazirlar Mahkamasining “Mamlakatda davlat tilida ish yuritishni samarali tashkil qilish chora-tadbirlari to‘g‘risida”gi 34-sonli qarori qabul qilinib, ushbu qaror bilan Davlat boshqaruvi organlari, xo‘jalik birlashmalari hamda Qaraqalpog‘iston Respublikasi Vazirlar kengashi, viloyatlar, tuman va shahar hokimliklari tuzilmalarida rahbarning ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi lavozimi joriy etilib, uning vazifalari va faoliyatini tashkil etish tartibi to‘g‘risida nizom tasdiqlandi.2020-yil 10-aprelda O‘zbekiston Respublikasining “21 oktyabrni “O‘zbek tili bayrami kuni ” deb e’lon qilish to‘g‘risidagi Qonuni qabul qilindi.Bu Qonun o‘zbek tilining nufuzini yurtimiz va dunyo hamjamiyati oldida yuksaltirish bo‘yicha qo‘yilgan dadil qadam bo‘ldi. Bugun yurtimizning davlat va jamiyat boshqaruvining barcha bo‘g‘inlarida o‘zbek tilining o‘z haqiqiy o‘rnini egallashini ta’minlashga erishishimiz zarur. Shu munosabat bilan universitetimizda ham tilimiz nufuzini oshirish maqsadida ko‘plab ilmiy-amaliy ishlar olib borildi. Filologiya fakultetida o‘zbek tilini xalqaro munosabatlarda rasmiy tarjima tillar safiga kiritish maqsadida har tomonlama mukammal mutaxassis ustozlar o‘z faoliyatini olib bormoqdalar. Iqtisodiyotimizning barcha sektorlarida o‘zbek tiliga ish yuritishi, malakali mutaxassislar tayyorlash uchun darslik va o‘quv qo‘llanmalar yaratilmoqda. Til va tibbiyot integratsiyasi platformasini yaratish mavzusida 900 mln so‘mlik amaliy loyiha o‘z ish faoliyatini olib bormoqda. Ilmiy darajalar beruvchi ilmiy kengashlar faoliyati samarali yo‘lga qo‘yildi. Joriy yilda 4 nafar ustozlarimiz fan doktori (DSc), 10 dan ortiq izlanuvchilarimiz filologiya fanlari bo‘yicha falsafa doktori (PhD)diplomlarini muvaffaqiyatli qo‘lga kiritdilar. Bundan tashqari davlat tilida ish yuritish asoslarini o‘qitish va malakasini oshirish Buxoro hududiy markazi ham o‘z ishini faollik bilan olib bormoqda. Mana shunday yangilanishlar shiddati va ulug‘ maqsadlarga shaylanish jarayonlari aro ma’naviyatimizning, ma’rifatimizning o‘zagi bo‘lmish ona tilimizni e’zozlab “O‘zbek tili bayrami kuni” e’lon qilinishining o‘ziyoq katta bir bayramdir. Shu munosabat bilan ushbu bayramimiz butun O‘zbekiston xalqiga, yer yuzida o‘zbek tilida so‘zlashuvchi ko‘plab kishilarga va dunyoning turli o‘lkalaridagi “O‘zbek tili do‘stlari”ga qutlug‘ bo‘lsin deymiz. Shon-sharafli millatimiz, ona tilimiz, davlatimiz mangu gullab-yashnayversin!Obidjon Xamidov, BuxDU rektori
