Buxoro davlat universitetining faollar yig`ingohida Tarix va madaniy meros fakulteti Jahon tarixi kafedrasi tomonidan tarixchi olim Farhod Qosimov xotirasiga bag`ishlangan “Jahon tarixining dolzarb muammolari ” mavzusidagi Respublika miqyosidagi ilmiy-amaliy anjuman bo`lib o`tdi.Anjuman avvalida BuxDU o`quv ishlari bo`yicha prorektor v.b, Siyosatshunoslik fanlari nomzodi, dotsent R.G`. Jumayev BuxDU rektori O.X.Xamidovning tabrik so`zlarini o`qib eshittirdi:“Hurmatli ilmiy-amaliy anjuman ishtirokchilari, qadrli mehmonlar! Ushbu anjumanda ustoz Farhod Qosimovning zamondosh do`stlari, shogirdlari, oila a’zolari, farzandlari va nevaralari ishtirok etmoqda. Ularga o`zimning samimiy minnatdorchiligimni bildirmoqchiman. Buxoro davlat universitetining sobiq rektori, tarixchi olim Qosimov Farhod Habibovich hayot bo`lganlarida 80 yoshni qarshi olgan bo`lar edilar. O‘zbekiston dunyo hamjamiyatida o‘zining munosib o‘rniga ega bo‘lib borayotgan hozirgi davrda jahon tarixiga munosabat ham dolzarblik kasb etmoqda. Tarixiy tafakkur va xotirani boyitishda, ilmiy tushunchalarni egallashda dunyo mamlakatlarida o‘tmishda va bugungi kunda kechayotgan iqtisodiy, siyosiy, madaniy, ilmiy- texnikaviy jarayonlardan xabardor bo‘lish muhim ahamiyatga ega. Uzoq asrlik tarixga ega bo‘lgan, jahon sivilizatsiyasiga beqiyos hissa qo‘shgan Buxoro o‘zining betakror tarixi va madaniyati bilan tarixiy tadqiqotlar tizimida alohida o‘rin tutadi, shuningdek, o‘zbek davlatchiligi tarixida ham Buxoro o‘tmishda bir qator milliy davlat uyushmalarining markazi sifatida dunyo tamaddunida yuksak mavqe va o‘ringa ega bo‘lgan. Buxoroning xorij bilan aloqalari tarixini moddiy va yozma manbalar asosida o‘rganish masalalari hamon to‘la tadqiq qilingan emas. Shu sababli bu yo‘nalishda ilmiy vazifalar ko‘lami keng qamrovli va dolzarb hisoblanadi. Buxoro tarixini yaxlit va tizimli o‘rganish, uning ochilmagan tarixiy sahifalarini mukammal va atroflicha tadqiq qilish maqsadlari ham ushbu ilmiy anjuman doirasida yangicha tafakkur asosida tahlil qilinadi.” Ilmiy-amaliy anjuman doirasida O‘zbekiston FA Tarix instituti bo‘lim mudiri, tarix fanlari doktori, professor Rajabov Qahramon Kenjayevichning “Jahon mamlakatlarining klassifikatsiyasi”, BuxDU professori Hayitov Shodmon Axmadovichning “1914 – 1918 yillarda Rossiya – Eron, Rossiya – Afg‘oniston chegarasidagi ahvolga doir (arxiv hujjatlari asosida)”, O‘zbekiston Respublikasi Jamoat xavfsizligi universiteti dotsenti, tarix fanlari bo‘yicha falsafa doktori (PhD) Mirzayev Gʻulomning “Yangi O‘zbekiston tashqi siyosatida Markaziy Osiyo ruhi”, O‘zR FA Abu Rayhon Beruniy nomidagi Sharqshunoslik instituti doktoranti Xalilova Zilolaning “XX asrda xorijiy sharq mamlakatlarida ta’lim islohotlari va uning Markaziy Osiyoga ta’siri”, Buxoro davlat universiteti o‘qituvchisi, tarix fanlari bo‘yicha falsafa doktori Jamolova Dilnozaning “Domla Ikromning “Mashhur bid’atlar bayoni” asarida Buxoro jamiyatidagi muammolar tahlili”, Toshkent davlat pedagogika universiteti, tarix fanlari bo‘yicha falsafa doktori(PhD) Abdullayev Diyorjonning “Jahon sivilizatsiyasi hamda Markaziy Osiyo xalqlari hayotida mukofotlash an’anasi, tarixiy bosqichlari va ularning ahamiyati”, BuxDU dotsenti Rahmonov Kamol Jamolovichning “Afg‘onistonning XX asr 20-yillari davri tarixini o‘rganishga doir ayrim mulohazalar”, BuxDU dotsenti Rashidov Oybek Rasulovichning “O‘zbekistonda milliy ziyolilar va bolsheviklarning mafkura maydonida kurashi mavzusining manbashunosligi tahlili” nomli ma’ruzalari tinglandi.Ushbu anjumandan ko`zlangan maqsad ilm-fan, ma’rifat, madaniyat va turizm sohasi jadallik bilan rivojlanayotgan dunyoda o‘tmish va bugungi kunda bo‘layotgan o‘zgarishlar, ularning mazmun-mohiyati, jahon tarixi va unda O‘zbekiston, jumladan, Buxoro tarixining o‘rni va ahamiyati mamlakatimizda jahon tarixining o‘rganilishi, o‘rganilish zarur bo‘lgan yo‘nalishlar va ularning jahon tarixi fanidagi ahamiyati, bu yo‘nalishda ilmiy vazifalar ko‘lami va ularning dolzarblik masalalariga bag‘ishlangan. Jahon tarixi va uning ayrim soha va yo‘nalishlari tarixini yaxlit va tizimli o‘rganish, uning ochilmagan tarixiy sahifalarini mukammal va atroflicha tadqiq qilishga oid so‘nggi ilmiy natijalar, muammo, yechim hamda istiqbollar masalalariga qaratilgan.BuxDU Matbuot xizmati
