XXI asr Axborot asri bo’lib, o’quvchilarni oddiy darslar bilan qiziqtira olish mushkul masaladir. Har bir fan o’qituvchisi oldida - o’quvchilarni aniq maqsadli, ta’lim-tarbiyali shaxslar, kelajagi buyuk davlatning haqiqiy egalari, komil insonlar etib voyaga etkazish kabi ulkan vazifalar turibdi. Ushbu ezgu ishni faqatgina yaxshi tayyorgarlik ko’rgan va o’z sohasidagi bilimlarni mustahkam egallashdan tashqari zamonaviy pedagogik va axborot texnologiyalarni, interfaol metodlarni biladigan, ulardan o’quv, tarbiyaviy mashg’ulotlarni tashkil etishda foydalana oladigan o’qituvchilargina bajara oladilar.Har bir o’qituvchi o’z ustida tinimsiz ishlasa, darslarida zamonaviy pedagogik va axborot texnologiyalarini, interfaol metodlarni to’g’ri va o’z o’rnida qo’llay olsa hamda o’quvchilaridan uch qadam oldin yura olsagina o’z oldiga qo’ygan maqsadga erisha oladi. O’qituvchilarimizning zamon bilan hamnafas ishlashlari uchun har kunlik yangiliklarni o’z vaqtida bilib olishlari, o’zlashtirishlari va o’quvchilariga to’g’ri etkaza olishlari juda muhimdir. O’qituvchilar bilimlarini yangilab, mahoratlarini oshirish maqsadida mahorat saboqlari darslarini tashkil etish lozimdir. Ushbu maqsadni amalga oshirishda viloyat va tumanlarda tashkil etilgan “Mahorat maktablari”ning o’rni beqiyosdir. Bu yo’nalishda Buxoro viloyatida bir qator ishlar amalga oshirib kelmoqda. Xalq ta’limi vazirligining 2015 yil 28 sentyabrdagi 268-sonli, Oliy va o’rta maxsus ta’lim vazirligining 2015 yil 28 sentyabrdagi 35-Q/B-sonli “Xalq ta’limi tizimida faoliyat ko’rsatayotgan “Mahorat maktablari” yo’nalishida oliy ta’lim muassasalari bilan olib borilayotgan hamkorlik ishlarini takomillashtirish to’g’risida”gi buyrug’i ijrosini ta’minlash maqsadida viloyat xalq ta’limi boshqarmasi va Buxoro davlat universitetining 2015 yil 9 oktyabrdagi 206-sonli va 376-u-sonli qo’shma buyrug’i qabul qilinib, chora-tadbirlar rejasi belgilandi. Buxoro davlat universiteti va xalq ta’limi boshqarmasi o’rtasida 5 yillik shartnoma tuzildi. Shartnoma asosida universitet etakchi kafedralarining tajribali professor-o’qituvchilari, viloyat xalq ta’limi boshqarmasi Metodika markazi hamda viloyat xalq ta’limi xodimlarini qayta tayyorlash va ularning malakasini oshirish instituti bilan hamkorlikda viloyatning 13 ta tuman (shahar) xalq ta’limi muassasalari faoliyatini metodik ta’minlash va tashkil etish bo’limlarida umumta’lim fanlari kesimida viloyat miqyosida 36 ta maktabda (40 ta) va tumun(shahar)larda 260 ta maktabda (390 ta) hamda har bir ta’lim muassasasida boshlang’ich ta’lim, ijtimoiy fanlar, tabiiy fanlar, filologiya, xorijiy tillar, aniq fanlar, estetik fanlar hamda jismoniy tarbiya, mehnat ta’limi fanlaridan “Mahorat maktablari” tashkil etildi. O’quv-seminarning o’tkazilishi yuzasidan tashkiliy ishlar Buxoro davlat universiteti AL va KHK bilan ishlash bo’limi va universitet professor-o’qituvchilari, Metodika markazi mas’ullari hamda viloyat xalq ta’limi xodimlarini qayta tayyorlash va ularning malakasini oshirish institutining professor-o’qituvchilari hamkorligida amalga oshirildi. Viloyat xalq ta’limi boshqarmasi va Buxoro davlat universitetining AL va KHK bilan ishlash bo’limi hamkorligida 2016 yil 6-8 yanvar kunlari (2016 yil 6 yanvar tarix, davlat va huquq asoslari, milliy g’oya va ma’naviyat asoslari, iqtisodiy bilim asoslari, ona tili va adabiyot, biologiya, musiqa ta’limi fanlaridan 414 nafar, 7 yanvar boshlang’ich ta’lim, kimyo, geografiya, informatika, rus tili va adabiyoti, tasviriy san’at va chizmachilik, jismoniy tarbiya, mehnat ta’limi fanlardan 400 nafar, 8 yanvar matematika, fizika, ingliz tili, nemis tili, fransuz tili fanlardan 152 nafar) universitet tasarrufida “Umumiy o’rta ta’lim maktablarida ta’lim sifati va samaradorligini oshirishda o’qituvchining o’rni” mavzusida viloyat miqyosidagi amaliy-uslubiy seminarlar o’tkazildi. Seminarlarda 22 ta fan yo’nalishilarida 966 nafar o’qituvchi, 22 nafar VXTXQTUMOI, 42 nafar BuxDUning professor-o’qituvchilari va boshqarmaning 6 nafar mutaxassislari ishtirok etdilar. 2016 yil 8-9 yanvar kunlari Buxoro viloyati xalq ta’limi xodimlarini qayta tayyorlash va malakasini oshirish institutida o’tkazilgan “Ta’lim-tarbiya jarayoniga zamonaviy pedagogik va axborot-kommunikasiya texnologiyalarini joriy etish: muammo va echimlar” mavzusidagi respublika ilmiy amaliy konferensiyasining 110 nafar ishtirokchilari mazkur seminarning guvohi bo’ldilar.2016 yil 6-8 yanvar kunlari o’tkazilgan seminarlar natijasida BuxDU professor-o’qituvchilar tomonidan Buxoro viloyati umumta’lim maktablari o’qituvchilarga mahorat saboqlari berildi, pedagogik va axborot texnologiyalarni amaliyotga joriy etishda pedagog-o’qituvchilarning kasbiy malakasi, mahoratini oshirishga amaliy yordamlar ko’rsatildi hamda o’qituvchilarga o’qitishning innovasion texnologiyalari va interfaol metodlari o’rgatildi, ularning axborot texnologiyalari, pedagogika va psixologiya fanlariga oid bilimlari yanada mustahkamlandi.Xulosa qilib aytadigan bo’lsak, 2015-2016 yilda Buxoro viloyatida ta’lim muassasalarining hamkorlik asosida o’tkazilgan “Mahorat maktablari” orqali o’qituvchilarning malakasi va kasbiy mahorati samaradorligini oshirishga erishildi, hamda o’qituvchilarning o’z ustida ishlashlari uchun kerakli bo’lgan metodik qo’llanma, tavsiyalar, ko’rgazma vositalari, video darslar yaratildi. Ta’lim sifatini talab darajasiga ko’tarishda, pedagoglarga uzluksiz metodik xizmat ko’rsatish va ularni malakasini oshirish samaradorligiga erishishda ta’lim muassasalarining hamkorlik faoliyati uyg’unlashtirildi. O’qituvchilarda o’quvchilar bilimini DTS talablari asosida o’zlashtirish darajasini aniqlash, faoliyatini tahlil qilish va o’quvchilardagi bo’shliqlarni aniqlab bartaraf etish uchun o’z ustida ishlash ko’nikmasi shakllantirildi. Barcha o’qituvchilarga zamonaviy pedagogik texnologiyalarning mazmun-mohiyati, ularni qo’llash yo’llari va metodlari, shuningdek innovasion texnologiyalarning ahamiyati tizimli ravishda targ’ib etildi, ularni amaliyotga joriy etish bo’yicha etarli tajriba bazasi yaratildi. Hamkor tashkilotlarning etuk ilmiy va tajribali professor-o’qituvchilari hamda metodistlari hamkorligida ta’lim mazmunini rivojlantirishga, uni yangi bosqichga ko’tarishga xizmat qiladigan o’quv-metodik komplekslar yaratilmoqda.A.Sh.Rashidov – Buxoro davlat universiteti AL va KHKlari bilan ishlash bo’limi boshlig’i
