O‘zbekiston Respublikasi Bosh vaziri tomonidan tasdiqlangan Yoshlar masalalari bo‘yicha respublika idoralararo kengashi majlisining 2018-yil 8-fevraldagi 4-son bayonida rejalashtirilgan “Yoshlar – kelajak bunyodkori!” shiori ostida “Yoshlar festivallari”ni tashkil etish va o‘tkazish, O‘zbekiston Respublikasi Prezidentining 2021-yil - Yoshlarni qo‘llab-quvvatlash va aholi salomatligini mustahkamlash yilida qabul qilingan Davlat dasturida belgilangan vazifalar ijrosini ta’minlash hamda Oliy va o‘rta maxsus ta’lim vazirligi va O‘zbekiston yoshlar ishlari agentligi tomonidan tasdiqlangan “Yoshlar o‘rtasida ma’naviy-ma’rifiy va tarbiyaviy ishlar samaradorligini oshirish bo‘yicha chora-tadbirlar dasturi”, shuningdek, talaba-yoshlarni san’atga muhabbat ruhida tarbiyalash va ma’naviy kamolotga yo‘naltirish, iqtidorli yoshlarga o‘z imkoniyatlarini yuzaga chiqarish uchun sharoit yaratish maqsadida Talabalar teatr studiyalari respublika festivalining uchinchi mintaqaviy bosqichi bо‘lib о‘tdi.Unda Toshkent tibbiyot akademiyasi Urganch filiali “Kо‘zmunchoq” talabalar teatr studiyasining Tunjar Jо‘jan о‘g‘lining asari asosida “Kо‘chki” dramasi, Urganch davlat universitetining “Sayqal” talabalar teatr studiyasi G‘afur G‘ulomning “Shum bola” asaridan “Antiqa tomosha” ko`rinishi, Navoiy davlat pedagogika instituti “Navoiy” talabalar teatr studiyasi “Qirmizi olma” sahna kо‘rinishi hamda Navoiy davlat konchilik instituti Nukus filiali “Samo” talabalar teatr studiyasi Chingiz Aytmatovning “Asrga tatigulik kun” asari asosida sahnalashtirilgan “Manqurt” spektakli kо‘rinishlari bilan qatnashishdi.Jamoalar tomonidan namoyish etilgan asarlarda milliy an’analarimiz hamda umumbashariy qadriyatlarimiz tarannum etildi. Jamoalarning badiiy chiqishlari va sahnaviy ko‘rinishlarini o‘ziga xosligi, milliyligi, mazmundorligi, mamlakatimizda amalga oshirilayotgan islohotlar mohiyatining oddiy va xalqchil tarzda ochib berilishiga alohida e’tibor qaratildi va tanlov Nizomiga muvofiq bir necha nominatsiyalar asosida taqdirlanishdi.“Eng yaxshi spektakl” nominatsiyasi Toshkent tibbiyot akademiyasi Urganch filiali “Kо‘zmunchoq” talabalar teatr studiyasining Tunjar Jо‘jan о‘g‘lining asari asosida “Kо‘chki” drama sahna ko‘rinishi uchun topshirildi. Navoiy davlat konchilik instituti Nukus filiali “Samo” talabalar teatr studiyasi Chingiz Aytmatovning “Asrga tatigulik kun” asari asosida sahnalashtirilgan “Manqurt” spektakli uchun “Dolzarb mavzuning sahnaviy talqini uchun” nominatsiyasi topshirildi. “Eng yaxshi erkak roli uchun” nominatsiyasiga Navoiy davlat pedagogika instituti “Navoiy” talabalar teatr studiyasi “Qirmizi olma” sahna kо‘rinishidagi Abbos roli uchun institut talabasi Tojiyev Jahongir ega bo`ldi. “Eng yaxshi ayol roli uchun” nominatsiyasi Toshkent tibbiyot akademiyasi Urganch filiali “Kо‘zmunchoq” talabalar teatr studiyasining Tunjar Jо‘jan о‘g‘lining asari asosida ishlangan “Kо‘chki”dramasidagi Keksa momo roli uchun – xalqaro aloqalar fakulteti 1-bosqich talabasi Reyimberdiyeva Madina loyiq deb topildi.“Eng yaxshi teatr studiyasi rahbari” nominatsiyasi Navoiy davlat pedagogika instituti “Navoiy” talabalar teatr studiyasi badiiy rahbari Shodiyev Akmalga nasib etdi. Urganch davlat universitetining “Sayqal” talabalar teatr studiyasi a’zolari G‘afur G‘ulomning “Shum bola” sahna ko‘rinishi uchun “Milliy an’ana va qadriyatlarni tarannum etgani uchun” nominatsiyasi bilan taqdirlandilar. Tanlovda g‘olib deb topilgan jamoa tanlovning respublika bosqichida ishtirok etishi uchun yo‘llanma berildi.BuxDU Matbuot xizmati
