Mamlakatimiz oliy taʼlim muassasalari bilan AQSH universitetlari o‘rtasidagi hamkorlik tobora rivojlanib bormoqda. Oliy taʼlim sohasidagi hamkorlikning bir ko‘rinishi AQShning Faculty Enrichment Program (FEP) stajirovka dasturi doirasida amalga oshirilmoqda. Mazkur dastur tanlovlari juda yuqori raqobat muhitida amalga oshiriladi hamda tanlovlardan muvaffaqiyatli o‘tgan eng munosib nomzodlar AQShda 4 oy davomida o‘z sohalari bo‘yicha stajirovkadan o‘tish imkoniyatiga ega bo‘ladilar.Yaqinda 2021-yil uchun tanlov natijalari eʼlon qilingan edi. Quvonarli tomoni shuki, respublikamizdan jami 29 nafar nomzod tanlab olingan bo‘lib, ular orasida 3 nafar g‘olib Buxoro davlat universiteti vakillaridir. Ushbu ko‘rsatkich bilan universitetimiz A.Navoiy nomidagi Toshkent davlat o'zbek tili va adabiyoti universiteti bilan birga respublikamizda yetakchi bo‘lishdi.Kuni kecha Xorijiy tillar fakulteti dotsentlari Mehriniso Raxmatova (Arizona davlat universiteti) va Feruza Xajiyeva (Ogayo shimoliy universiteti), shuningdek xalqaro hamkorlik bo‘limi boshlig‘i Muhriddin Qilichovlar (Shimoliy Alamaba universiteti) AQSHga yetib borib, stajirovka dasturlarini boshlab yubordilar. Ular o‘z sohalari bo‘yicha stajirovka o‘tashdan tashqari, AQSh OTMlari bilan samarali hamkorlik o‘rnatish borasida ham ish olib borishadi.BuxDU Xalqaro hamkorlik bo'limi
