Universitetimizda o‘tgan yilning 4-mart kuni Xorijiy tillar fakultetida “Hindiston madaniyat markazi” ochilgan edi. Bugun esa, Hindistondan nufuzli delegatsiyaning tashrifi mazkur markazning 1 yilligiga mos kelib qoldi.Universitetga tashrif buyurgan delegatsiya tarkibida Hindiston madaniy aloqalar bo‘yicha kengashi (ICCR) prezidenti Vinay Saxasrabudxe, Hindistonning O‘zbekistondagi favqulodda va muxtor elchisi Manish Prabhat, elchining madaniy masalalar bo‘yicha maslahatchisi Shipra Gosh, elchixona huzuridagi Lal Bahodir Shastri nomidagi hind madaniyat markazi direktori prof. Chander Shekxar hamda mazkur markaz mutaxassisi Umida Ahmedovalar bor edi.Tashrifning birinchi qismida mehmonlar universitet talabalari tomonidan tashkil qilingan sanʼat asarlari ko‘rgazmasi hamda musiqa jamoasi faoliyati bilan tanishdilar.Asosiy muzokaralar “Hind madaniyati xonasi”da bo‘lib o‘tdi. Uchrashuvda ICCR va Hindiston elchixonasi bilan universitet taʼlimi uchun muhim sanalgan yo‘nalishlarda, xususan, talaba va professor-o‘qituvchilari almashinuvini yo‘lga qo‘yish, malaka oshirish kurslarini, qo‘shma taʼlim dasturlarini, ilmiy markazlar, laboratoriyalar faoliyatini yo‘lga qo‘yish masalalari muhokama qilindi.Uchrashuv yakunida qisqa fursatlarda ICCR va universitet o‘rtasida hamkorlik memorandumini imzolash hamda Hindistonga xorijiy tillar, informatsion texnologiyalar va boshqa yo‘nalishlarda 30 nafar o‘qituvchini malaka oshirishga yuborish bo‘yicha kelishib olindi. Tomonlar o‘zaro esdalik sovg‘alari almashishdi.Shuningdek, mehmonlar xorijiy tillar fakulteti talabalari bilan qisqa uchrashuv o‘tkazishdi. Uchrashuvda Hindiston stipendiyalari haqida asosiy maʼlumotlar taqdim etildi. BuxDU Xalqaro hamkorlik bo'limi
