Har bir davlatning iqtisodiy taraqqiyoti, ijtimoiy sohalar rivoji bevosita uning ilmiy va intellektual salohiyati bilan chambarchas bog‘liq. Ayniqsa, raqobat kun sayin kuchayib borayotgan hozirgi sharoitda amaliyotga ilmiy hajmdor, yuqori samarali tadqiqotlar, ilg‘or innovatsion texnologiyalarni tatbiq etmasdan turib, xaridorgir mahsulotlar ishlab chiqarishning imkoni yo‘q. Sir emaski, yangilik sifatida e’tirof etiladigan ixtirolar o‘z-o‘zidan paydo bo‘lavermaydi. Bu ko‘p yillik ilmiy izlanish va fidokorona mehnatni talab qiladigan mashaqqatli jarayonki, xalqimiz ta’biri bilan aytganda, igna bilan quduq qazishdek gap. Intellektual salohiyatli, tashabbuskor yosh olimimiz Qahhorov Otabek Siddiqovichning iqtisodiyot fanlari doktori (DSc) ilmiy darajasini olish uchun yozgan “Oliy ta’lim tizimida raqobatbardosh kadrlar tayyorlashning boshqaruv mexanizmini takomillashtirish (Buxoro va Navoiy viloyatlari misolida)” mavzusidagi ilmiy tadqiqoti xam bugun shunday iqtisodiyotimiz rivoji, yutug‘i va muammolari echimiga keng yo‘l ochadi. “Hammamiz yaxshi tushunamizki, oldimizda turgan keng ko‘lamli vazifalarni bajarish uchun kadrlar bilan ishlashning butun tizimini takomillashtirishga doir bir qator ishlarni albatta amalga oshirishimiz kerak”, – deydi Yurtboshimiz o‘z nutqida. Albatta globallashib borayotgan dunyoda sifatli kadrlar tayyorlash masalasi har bir davlatning kelajagini, uning iqtisodiy rivojlanishini belgilab berishi asosiy omil ekanligi himoya qilingan bu tadqiqotda yanada oydinlashtirilgan. Yosh olimimiz o‘z ilmiy izlanishini fakulьtetimiz kengashidan muvaffaqiyatli olib chiqib, 2020 yil 10 noyabrь kunida Samarqand iqtisodiyot va servis instituti huzuridagi fan doktori ilmiy darajalarini beruvchi DSc.03/30.12.2019.I.18.01 raqamli ilmiy kengash asosida 08.00.05 – “Xizmat ko‘rsatish tarmoqlari iqtisodiyoti” hamda 08.00.13 - "Menejment" ixtisosliklari bo‘yicha bir martalik ilmiy seminar onlayn muhokamasida juda qizg‘in va bahstalab mazmundagi yig‘ilishda 100% himoyaga tavsiya etildi. Ilm yo‘lida zahmat chekkan har bir inson bu mehnatning naqadar og‘ir, mas’uliyatli va sharafli ekanini chin ko‘ngildan his qiladi. Navqiron tadqiqotchimiz ham bunday sharafli ilm mashaqqatini o‘z boshidan kechirmasdan qolmadi. Nihoyat “2021 yilning 26 fevralь kuni soat 10:00 da Buxoro davlat universiteti ilmiy ishlar va innovatsiyalar bo‘yicha prorektori, universitet mustaqil izlanuvchisi Qahhorov Otabek Siddiqovichning 08.00.05 – “Xizmat ko‘rsatish tarmoqlari iqtisodiyoti” hamda 08.00.13 – "Menejment" ixtisosligida "Oliy ta’lim tizimida raqobatbardosh kadrlarni tayyorlashning boshqaruv mexanizmini takomillashtirish (Buxoro va Navoiy viloyatlari misolida) mavzusida iqtisodiyot fanlari doktori (DSc) ilmiy darajasini olish uchun tayyorlagan doktorlik dissertatsiya ishi onlayn himoyasiga taklif etamiz”, degan mazmundagi taklifnomani o‘qib butun jamoamiz chin ko‘ngildan shodlandik. Himoya jarayonida yosh olim o‘zining ilmiy salohiyati, zukko javobgirligi, qat’iyatli iqtidori bilan dissertatsiyani 100% muvaffaqiyatli himoya qildi. Himoyada rasmiy va norasmiy taqrizchilar ishni qo‘llab-quvvatlaganlari, shuningdek, kasbdoshimizning mamlakatimizda iqtisodchi olimlar qatoriga qo‘shilayotganligi, zehni o‘tkir, aqli teran, bilimi mukammal, ziyoli inson ekanligini faxrlanib tilga olishdi. O‘ylaymizki, yosh olim olib borayotgan ilmiy tadqiqotini yanada takomillashtirib boradi. Bugungi kunda ta’lim sohasida dolzarb masalalaridan kredit modulь tizimiga o‘tishda, yosh raqobatbardosh kadrlar tayyorlashning boshqaruv mexanizmini takomillashtirishda, mamlakatimiz oliy ta’lim muassasalarini xalqaro ta’lim bozorida reytingini ko‘tarishda o‘z hissasini qo‘shib keladi. Mashaqqatli mehnat natijasi bo‘y ko‘rsatadigan vaqt keldi. Yosh olimimizning iqtisodiyotimiz yuksalishi sari tashlagan bu qadami O‘zbekiston Respublikasi Oliy attestatsiya komissiyasining 2021 yil 31 mart kuni 295/1 sonli bayonnomasiga muvofiq iqtisodiyot fanlari doktori (DSc) diplomining berilishi bilan e’tirof etildi. Bunday faxrli yutuq kafedramiz, fakulьtetimiz, jamoamiz, qolaversa, butun universitetimiz sharafidir. Shunday quvonchli, hayajonli daqiqalarda kasbdoshimiz, rahbarimiz, universitetimiz ilmiy ishlar va innovatsiyalar bo‘yicha prorektori Otabek Siddiqovich Qahhorovni ulkan muvaffaqiyati bilan chin qalbdan tabriklaymiz! Qolaversa, u kishining ilmiy maslaxatchilari, hurmatli rektorimiz iqtisodiyot fanlari doktori, professor O.X. Xamidovni ham samarali mehnati, chuqur bilim va salohiyatga ega shogirdlar yutug‘i bilan muborakbod etamiz. Yana shu o‘rinda Yurtboshimizning: “Bugun men, avvalo, ta’lim-tarbiya sohasi fidoyilariga, barcha yurtdoshlarimizga murojaat qilib aytmoqchiman: aziz do‘stlar, birodarlar, agar intilsak, astoydil harakat qilsak, har qanday baland marrani egallash qo‘limizdan keladi. Biz ma’rifat borasida, ta’bir joiz bo‘lsa, “iligi to‘q” xalqmiz. Ilm-fanga intilish bizning qonimizda, bugungi til bilan aytganda, genimizda bor”, – degan da’vatlari ham yosh olimimizga qaratilgan desak, yanglishmagan bo‘lamiz. O.S. Qahhorovning bunday yutuqlarga erishishida, albatta, otalari, ustozimiz pedagogika fanlari doktori, professor Qahhorov Siddiq Qahhorovichning xizmatlari cheksizdir. Farzandlar kamoli ota-onaga qanot bag‘ishlaydi. Ustozni ham farzandlari erishgan ilmiy zafarlari bilan chin qalbdan qutlaymiz. Yosh doktorantlarimiz, tadqiqotchilarimiz va izlanuvchilarimizga o‘rnak bo‘larli yosh olimimiz haqida, uning qator ilmiy yutuqlarini aytib o‘tishlikni joiz deb bildik. O.S. Qahhorov 2018 yilda iqtisodiyot fanlari bo‘yicha falsafa doktori (PhD) ilmiy darajasini olish uchun o‘z muddatida dissertatsiyani muvaffaqiyatli himoya qilgan. 2019 yilda dotsentlik ilmiy unvonini qo‘lga kiritdi. Ilmiy faoliyati davomida 100 dan ortiq ilmiy ishlari nashr etilgan. Jumladan, olimning 1 ta darslik, 1 ta o‘quv qo‘llanma, 3 ta monografiya, 2 ta ilmiy risola, 3 ta o‘quv-uslubiy qo‘llanma, 1 ta ixtiro uchun patent va 6 ta mualliflik guvohnomalari, 30 dan ortiq maqolalari Xalqaro miqyosdagi Scopus va Web of science ba’zasiga kiruvchi nufuzli ilmiy jurnallarda, 70 dan ortiq maqolalari esa Respublika miqiyosidagi ilmiy jurnallarda chop etilgan. Bugungi kunda universitetda ilmiy ishlar va innovatsiyalar bo‘yicha prorektori, Iqtisodiyot kafedrasi dotsenti va “Yosh olimlar kengashi” raisi hamda O‘zbekiston Respublikasi Innovatsion rivojlanish vazirligi huzuridagi “Yoshlar akademiyasi” faoli sifatida ham faoliyat ko‘rsatmoqda. Rahbarlik va pedagogik faoliyati davomida uzluksiz ta’lim tizimi uchun belgilangan ustuvor vazifalarni amalga oshirish borasida universitet, viloyat, vazirlikda o‘tkazilgan yig‘ilishlarda o‘z takliflari bilan muntazam qatnashib keladi. Universitetdagi o‘quv, tarbiyaviy, ilmiy tadqiqot jarayonini rivojlantirish, mehnat va ijro intizomini ta’minlash, umumiy o‘rta ta’lim, o‘rta maxsus va oliy ta’lim muassasalariga o‘quv-metodik yordam ko‘rsatish, o‘qitish tizimida yangi pedagogik texnologiyalarni joriy qilishda tashabbuskorligi alohida e’tiborga loyiq. Bunday tashabbuskorlik har qanday tahsin va e’tirofga loyiq. O‘z mulohazalarimizni muhtaram Prezidentimizning Murojaatnomada keltirilgan quyidagi fikrlari bilan yakunlamoqchimiz: “Bir haqiqatni hech qachon unutmaylik: biz buyuk tarix, buyuk davlat, buyuk madaniyat yaratgan xalqmiz. Biz – hech qachon mehnatdan qochmaydigan, qiyinchilikdan qo‘rqmaydigan, adolatni qadrlaydigan, azmu shijoatli, buyuk xalqmiz. Barchamiz bir tanu bir jon bo‘lib, yakdil va ahil bo‘lib harakat qilsak, halol-pok bo‘lib, yaxshi niyat bilan mehnat qilsak, har qanday marralarni egallashga, boshqacha aytganda, tariximizning yangi sahifasini yaratishga qodir xalqmiz.Bu yo‘lda qanday qiyinchilik va mashaqqatlar bo‘lmasin, barchasini mardona engib o‘tishga tayyormiz. Bunday ezgu ishlarda bizga Yaratganning o‘zi, buyuk ajdodlarimizning pok ruhlari madadkor bo‘ladi, deb ishonaman”. Olloh o‘zining suygan bandasiga sinov bergani kabi ularni xalq ichida aziz ham qilib qo‘yadi. BuxDU Matbuot xizmati
