11.01.2022

Bugungi tezkor, shiddatli davr barcha soha qatori, ilm-fanni yangi bosqichga ko‘tarishni, olimlar va yosh iqtidor egalarini har tomonlama qo‘llab-quvvatlashni davlatimizning ustuvor vazifalaridan biri qilib belgiladi. Albatta mamlakat rivojini ilm-fansiz tasavvur qilish qiyin. Rivojlangan mamlakatlarning taraqqiyot yo‘liga nazar tashlasak, ularning aksari ilm-fan rivoji va iqtidorli yoshlari bilan shu darajaga yetganiga guvoh bo‘lamiz. Zero, buyuklar aytganidek, bugun katta moddiy boyliklarga ega o‘lkalar emas, iqtidorli va salohiyatli yoshlari bor davlatlargina chinakam farovonlikka erishmoqda. Aynan ular orqali yangi bilimlar o‘zlashtiriladi va nazariyalar shakllantiriladi, kelgusi amaliy tadqiqotlar va innovatsion ishlanmalar uchun mustahkam asos yaratiladi.Oliy dargohimizda ilm-fanni yanada rivojlantirish, uning akademik ilm-fan va amaliyot bilan integrasiyalashuvini kuchaytirish, ta’lim muassasasi professor-o‘qituvchilarining ilmiy-tadqiqot faoliyati samaradorligi va natijadorligini oshirish, xalqaro ilmiy-texnik ma’lumotlar bazalaridan foydalanishga keng imkoniyatlar yaratilmoqda. Ayniqsa, universitet huzuridagi 15 ta ixtisoslik bo‘yicha 8 ta ilmiy darajalar beruvchi ilmiy kengashlar faoliyatining yo‘lga qo‘yilishi, ta’lim, fan va amaliyot uyg‘unligini ta’minlash, iste’dodli yoshlarni har tomonlama qo‘llab-quvvatlash, o‘z oliy o‘quv yurtlarida ilmiy tadqiqot himoyalarining o‘tkazilishi, ilmiy izlanuvchilarga kuch-g‘ayrat bag‘ishlaydi.Eng quvonarlisi kutilayotgan yangi hafta universitetda “Himoyalar haftaligi” deb belgilandi. Filologiya yo‘nalishidagi ilmiy kengashlarda 17 maydan boshlab, 25 maygacha ilmiy tadqiqotchilar tinimsiz izlanishlari va mehnatlarining hosilasini o‘z chiqishlari bilan himoya qilib, universitetimiz ilmiy salohiyatini mustahkamlaydilar hamda fanning rivojiga beminnat hissa qo‘shadilar. Bunday mashaqqatli, ayni damda sharafli bo‘lgan himoya jarayonlarida tadqiqotchilarimizga ulkan muvaffaqiyatlar tilaymiz. Ustozlariga shogirdlar yutug‘idan faxr tuyg‘usini his qilishni tilab qolamiz. Bugun ilmiy tadqiqotlarini yakunlash arafasidagi izlanuvchilarimizga ham mana shunday hayajonli daqiqalar tezroq nasib etishini istab qolamiz!BuxDU Matbuot xizmati