11.01.2022

Universitetda xalqaro hamkorlik ko‘lamlarini kengaytirish borasida fakultet va kafedralarda ham muayyan ishlar olib borilmoqda. Bugun Filologiya fakulteti “O‘zbek tilshunosligi” kafedrasi tashabbusi bilan Meksika shtati avtonom universiteti vakillari bilan onlayn uchrashuv bo‘lib o‘tdi. Uchrashuvda xalqaro hamkorlik bo‘yicha prorektor A.Jo‘rayev, Filologiya fakulteti dekani D.Rajabov, “O‘zbek tilshunosligi” kafedrasi mudiri A. Ahmedov, kafedra dotsenti G.Toirova, Alisher Navoiy nomidagi TDO‘TAU dotsenti D.Bahronova, Meksika tomonidan esa prof. Virna Velaskes hamda prof. Alfredo Sancheslar ishtirok etishdi.Uchrashuvda o‘zaro hamkorlik o‘rnatish masalasi muhokama qilindi. Shu jumladan, filologiya fakulteti bilan ispan tilshunosligidagi dolzarb muammolarni o‘rtoqlashish, ispan va o‘zbek tilshunosligida lingvokultrologik aspektda ilmiy tadqiqotlarni yo‘lga qo‘yish, kognitiv tilshunoslik, pragmalingvistika, kompyuter lingvistikasi, sud lingvistikasi qatorida tibbiyot lingvistikasi bo‘yicha hamkorlik qilishga kelishildi. Universitetda amalga oshirilayotgan "Tibbiyotga oid atamalar elektron platformasini yaratish" mavzusidagi amaliy loyiha bo‘yicha maʼlumotlar berildi.Tomonlar yaqin kunlar ichida universitetlararo hamkorlik shartnomasini imzolash bo‘yicha muzokara olib borishga kelishib oldilar. Shuni qayd etish joizki, ushbu kelishuv universitetning Lotin Amerikasi mamlakatlari bilan oliy taʼlim sohasida o‘rnatiladigan ilk hamkorlik aloqasi bo‘ladi. Maʼlumot uchun: Meksika shtati avtonom universiteti Meksikaning markazida joylashgan Meksika shtatining eng yirik universitetidir. QS-2021 reytingida 801-1000 guruhidan o‘rin egallagan universitet talabalari soni 84,5 ming nafardan ortiq. Universitet tarixi 1828 yilda tashkil etilgan Meksika shtati pedagogika institutiga borib taqaladi. Universitet vebsayti: https://www.uaemex.mxBuxDU Xalqaro hamkorlik bo'limi