2020-yilning 11-dekabr kuni Buxoro davlat universitetida ilmiy-innovatsion g‘oyalar va ishlanmalar yarmarkasi tashkil etildi. Har yilgi an’anaga muvofiq, Buxoro davlat universitetida tashkil etilgan, viloyatdagi oliy ta’lim dargohlarida yaratilayotgan innovatsion ishlanmalar taqdimoti va ularni amaliyotga, bevosita ishlab chiqarishga joriy etishga bag‘ishlab tashkil etilgan mahorat ko‘rigida 190 ga yaqin ilmiy-nazariy ijod mahsuli–ishlanma namoyish qilindi. Ilmiy-innovasion g‘oyalar va ishlanmalar yarmarkasida respublika Innovasion rivojlantirish vazirligi, Oliy va o‘rta maxsus ta’lim vazirligi, viloyat hokimligi mutasaddilari, hududdagi oliy ta’lim dargohlarining rektorlari, pedagog hamda talabalari, shuningdek, tegishli tashkilot va idoralar rahbarlari, ommaviy axborot vositalari xodimlari ishtirok etdilar.Universitetning kimyo kafedrasidagi ustozlari ko‘magida to‘qimachilik korxonalarida oxorlash jarayonini takomillashtirish texnologiyasi, kraxmal ishlab chiqarish orqali ip-kalavalar pishiqligini oshirish, polimer kompozisiya asosida plyonkalarning yuqori gidrofil xususiyatga ega bo‘lgani sababli to‘quv syexlarida havo namligini pasaytirish, import o‘rnini bosuvchi oxor yaratishga musharraf bo‘lgan Feruzjon Ostonovning ham ilmiy izlanishlari tahsinga loyiq. U oliy ta’lim dargohidagi ustozlari bilan bahamjihatlikda respublika yengil sanoat to‘qimachiligi va pardozlash korxonalarida hosil bo‘ladigan oqava suvlarni kimyoviy usulda tozalash texnologiyasini takomillashtirish loyihasini amalga oshirishga bel bog‘lagan. Loyiha umumiy qiymati birinchi bosqichda 800 million so‘mga baholangan va bunda 6 kishini ish bilan band etish imkoni paydo bo‘ladi.––Mamlakatimiz Prezidenti Shavkat Mirziyoyev raisligida joriy yil 3 dekabr kuni ilm-fan va innovasiyani rivojlantirish borasida oliy ta’lim muassasalari, ilmiy tashkilotlar, tarmoq va hududlar oldidagi ustuvor vazifalar muhokamasi yuzasidan videoselektor yig‘ilishi o‘tkazilgan, unda davlat rahbari tomonidan ilm-fan bilan ishlab chiqarish o‘rtasidagi hamkorlikni uzviy yo‘lga qo‘yish, ilmiy institutlarga buyurtmalarni shakllantirish bo‘yicha dolzarb yo‘nalishlar ko‘rsatib o‘tilgan edi, ––deydi tadbir tashkilotchilaridan biri, respublika Innovasion rivojlantirish vazirligi bo‘lim boshlig‘i Fazliddin Mo‘minov.––Xususan, xalq xo‘jaligining barcha tarmog‘ida mahsuldorlikni oshirish, hududlarni ixtisoslashtirish, yuqori qiymatli mahsulotlarni ko‘paytirishga xizmat qiladigan ishlanmalar zarurligiga alohida e’tibor qaratildi. Shu ma’noda, mazkur ishlanma hamda loyihalar taqdimoti sanoat, qishloq xo‘jaligi va boshqa sohalarni yanada rivojlantirish, innovasion o‘sishni ta’minlash, qolaversa, ularda yetishtirilayotgan yoki tayyorlanayotgan mahsulotlar uchun ichki va tashqi bozorni shakllantirish, tijoratlashtirish, bir so‘z bilan aytganda, ilm-fan bilan ishlab chiqarish amaliyoti o‘rtasida uzilib qolgan ko‘plab rishtalarni tiklashdan iborat. BuxDU Matbuot xizmati
