Tarixdan ayon haqiqat shuki, har bir davr evrilishlari, turli murakkab va keskin vaziyatlari o’z qahramonlarini kashf etadi. Shu ma’noda butun dunyo xalqi va jamoatchiligini jiddiy tashvish va iztirobga solib qo‘ygan pandemiya sharoitida inson hayoti va salomatligining posbonlari — shifokorlar chinakam qahramon sifatida e’tirof etilmoqda. Zero, jamiyat tamaddunining turli bosqichlarida shifokorlar najotkorlardir.Ko‘zga ko’rinmas virus dunyo bo’ylab tarqalib, eng so’nggi zamonaviy texnologiyalar bilan qurollangan, olamni boshqarishga qodirman, degan kuchlardan tortib, hayotni faqatgina o’yin-kulgu, sayru tomoshadan iborat bilgan odamlar, umr mazmunini, insoniylik matlabini, bandalik talabini anglagan fidoyilargacha, barcha-barchani oyoqqa qalqitdi, hushyorlikka chorladi. Bu keskin sinovli vaziyat bevosita tibbiyot mutaxassislarining salohiyati, mas’uliyatiga bog’liq bo’lib qoldi. O’z aziz joni uchun qanchalik xavf tug’dirmasin, shifokorlar fidoyi va qahramonlarcha insoniyat salomatligini muhofaza qilishga otlandi. Bugun dunyo asl tibbiyot xodimlarini olqishlamoqda, qo’llamoqda, ular qarshisida ta’zim qilmoqda.Mamlakatimiz Prezidenti Shavkat Mirziyoyev pandemiyaga qarshi kurash borasidagi har bir chiqishlari — murojaatlarida tibbiyot xodimlari mehnatini alohida e’tirof etib, ularga chuqur minnatdorlik bildirmoqdalar. Chunki, xalqimiz salomatligi yo’lida buyuk ajdodimiz Abu Ali Ibn Sino bobomizning munosib vorislari sifatida bor bilim va tajribasini ayamay matonat ko’rsatib kelayotgan minglab tibbiyot xodimlarining har bir kuni qahramonlik va xayrli ishlardan iboratdir. Noyabr oyining ikkinchi yakshanbasi — tibbiyot xodimlari kuni munosabati bilan O’zbekiston yoshlar ittifoqi Buxoro davlat universiteti boshlang’ich tashkiloti hamda Agronomiya va Tabiiy fanlar fakulteti rahbariyati hamkorligida shu ikki fakultet talabalari tomonidan universitetning faollar zalida tashkil etilgan «Герои и халатах» nomli tadbirda ham bu fikrlar o’z e’tirofini topdi.Tadbirda yig’ilgan tibbiyot xodimlarini Agronomiya fakulteti dekani Qodirov Abbos Qosimovich, Tabiiy fanlar fakulteti dekani Artiqova Xafiza Tuymurodovna, Buxoro davlat universiteti boshlang’ich tashkiloti yetakchisi Karimov Feruz Raimovich kasb bayrami bilan samimiy muborakbod etdilar.Tadbir so’ngida, tadbirda faol ishtirok etgan Agronomiya va Tabiiy fanlar fakulteti talabalari O’zbekiston yoshlar ittifoqi Buxoro davlat universiteti boshlang’ich tashkiloti tomonidan tashakkurnomalar bilan taqdirlandi. BuxDU Matbuot xizmati
