11.01.2022

Avvalo, Sizga mamlakatimiz oliy ta’lim muassasalari orasidan bizning Buxoro davlat universitetini  tanlaganingiz uchun o‘z minnatdorchiligimni bildiraman. 2020-2021 o‘quv yilida Buxoro davlat universiteti kunduzgi va sirtqi ta’lim shakllari bo‘yicha 64 ta bakalavriat ta’lim yo‘nalishlarida 5150 nafar abiturientni talabalikka qabul qiladi. Davlatimiz rahbarining tashabbusi bilan yoshlarning ta’lim olishlari uchun yaratilayotgan sharoitlar yildan-yilga kengayib, inson kapitaliga davlat tomonidan juda katta investitsiya kiritilmoqda. Joriy yilda abiturientlarning hujjatlarini ro‘yxatdan o‘tkazish masofadan amalga oshirildi. Bizning Buxoro davlat universitetiga kirish uchun 84671 nafar abiturientning hujjatlari  ro‘yxatdan o‘tkazildi. Bugungi kunda butun jahonda kechayotgan pandemiya sababli mamlakatimiz oliy ta’lim muassasalariga kirish imtihonlari muddatlari kechiktirildi. Bu avvalo, Siz – yoshlarning salomatligingizni o‘ylab, o‘z bilimingizni namoyon qilish uchun qulay va xavfsiz shartsharoit yaratish maqsadida qilindi. Muhtaram Prezidentimizning tashabbuslari bilan kirish imtihonlari shaharlar va viloyatlardagi markaziy stadionlarda, ya’ni ochiq maydonlarda karantin talablariga qat’iy rioya etgan holda 2020 yil sentyabrь oyining 2-sanasidan boshlab o‘tkazilishi rejalashtirildi.Siz pasportingiz va davlat test markazi tomonidan beriladigan qayd varaqasi bilan ko‘rsatilgan manzilga belgilangan vaqtda etib kelishingiz zarur. Eslatib o‘tamiz, Davlat test markazi tomonidan beriladigan qayd varaqasini joriy yilning 22 avgustidan boshlab Davlat test markazi sayti (www.dtm.uz)dagi shaxsiy kabinetingiz orqali olishingiz mumkin! Muhtaram Abiturient! Imtihon kuni belgilangan manzilga karantin qoidalariga rioya qilib, xavfsizligingizni ta’minlab, yaxshi kayfiyatda va o‘z vaqtida etib kelishingizni so‘raymiz.Aziz ota-onalar va yaqinlaringizdan imtihon kunlari uyda qolib, imtihon jarayonlarini onlayn kuzatib borishlarini so‘raymiz. Kirish imtihonlarining o‘tish muddati, jadvali va natijalari hamda o‘zingizni qiziqtirgan barcha  savollarga  javoblarni  www.dtm.uz sayti, https://t.me/Rasmiydtm_dtm_uz telegramm kanalidan olishingiz, shuningdek (65) 221-29-14, (65) 221 26 85 raqamli telefonlarga hamda universitet rasmiy veb sayti www.buxdu.uz, rasmiy telegram kanali @buxdu_uz murojaat etishingiz mumkin. Unutmang, faqat puxta tayyorgarlik va kuchli bilim bilangina talaba bo‘lish baxtiga muyassar bo‘lishingiz mumkin. Shunday ekan, bir daqiqa ham bilim olish va o‘z ustingizda ishlashdan to‘xtatmang. Sizga ushbu sinovlardan muvaffaqiyatli o‘tib olishingizda ulkan zafarlar tilaymiz. Omad yor bo‘lsin! Hurmat bilan,  Buxoro davlat universiteti rektori,iqtisodiyot fanlari doktori, professor O.X.Xamidov