Ma’lumki, mamlakatimizda matematika 2020 yildagi ilm-fanni rivojlantirishning ustuvor yo‘nalishlaridan biri sifatida belgilandi. O‘tgan davr ichida yurtimizda matematika ilm-fani va ta’limini yangi sifat bosqichiga olib chiqishga qaratilgan bir qator tizimli ishlar amalga oshirildi. Jumladan, xalqaro va mahalliy fan olimpiadalari g‘oliblarini tayyorlash ishlariga ilg‘or ilmiy markazlarda faoliyat yuritayotgan vatandosh matematik olimlarni taklif qilish ishlari yaxshi yo‘lga qo‘yilib, xalqaro ilmiy tadqiqotlar olib borish uchun zarur shart-sharoit yaratildi.2020 yil 28 sentabr kuni Buxoro davlat universiteti “Matematik analiz” kafedrasi jamoasining tashabbusi bilan “Ustoz va murabbiylar kuni”ga bag‘ishlangan “Quvnoq matematika” nomli online-musobaqasi o‘tkazildi. Bunday turdagi musobaqa birinchi marotaba joriy yilning 16 fevral kuni kafedra a’zolari tomonidan an’anaviy shaklda o‘tkazilgan edi. Pandemiya tufayli bu safargi musobaqa online shaklda tashkil qilindi.Musobaqa umumta’lim maktablarining 1-11 sinflari o‘quvchilari, OTM talabalari hamda matematika fani o‘qituvchilari o‘rtasida o‘zbek tilida o‘tkazildi. Barcha ishirokchilar rag‘batlantiruvchi sertifikatlar bilan taqdirlandilar. Sinflar kesimida yuqori ball to‘plagan ishtirokchilar ballar ketma-ketligida mos ravishda I-darajali, II-darajali va III-darajali diplomlar bilan taqdirlandilar. Musobaqa test shaklida o‘tkazilib, 20 ta topshiriq uchun 60 minut vaqt ajratildi. Musobaqada mutaxassislar tomonidan shakllantirilgan Kenguru xalqaro matematika olimpiadasi darajasidagi savollar bazasidan foydalanildi. Mazkur savollar bazasini shakllantirsh jarayoniga Buxoro davlat universiteti “Matematik analiz” va “Differensial tenglamalar” kafedralarining professor-o‘qituvchilari hamda V.I.Romanovskiy nomidagi Matematika instituti Buxoro bo‘linmasining yetakchi ilmiy xodimlari jalb qilindi. Bundan tashqari, “Matematik analiz” kafedrasining xalqaro hamkorlik aloqalarida muhim ahamiyat kasb etgan hamda turli yillarda xalqaro matematika olimpiada g’oliblari bo’lgan hamyurtlarimiz Orif Ibrogimov (Shveysariya federal texnologiya instituti, Shveysariya), Zarif Ibragimov (Bern universiteti, Shveysariya), Ibrohimbek Akramov (Ulm universiteti, Germaniya), Abror Pirnapasov (Ruhr-Boxum universiteti, Germaniya), Malayziya texnika universiteti professori Muhiddin Mo‘minov va IMC 2020 talabalar xalqaro olimpiadasi kumush medal sohibi, BuxDU talabasi Sobir Boymurodovlar musobaqa savollarini saralashda faol ishtirok etish bilan bir qatorda, o’zlarining qiziqarli masalalarini tavsiya qilib musobaqa nufuzini oshirishda o‘z hissalarini qo‘shdilar.Ta’kidlash joizki, “Quvnoq matematika” online-musobaqasi respublikamizning umumta’lim maktablarida faoliyat ko‘rsatayotgan bir guruh Matematika fan o‘qituvchilarining taklifiga binoan xo‘jalik shartnomasi asosida tashkil qilindi. BuxDU “Matematik analiz” kafedrasining “Matematika ta’limi va ilm-fanini rivojlantirish bo‘yicha chora-tadbirlar rejasi”ga muvofiq “Quvnoq matematika” musobaqasi har chorakda bir marotaba o’tkazilishi ko‘zda tutilgan. Bunday tadbirlar umumiy o‘rta, o‘rta maxsus, professional, oliy ta’lim muassasalari va ilmiy tekshirish institutlari o‘rtasidagi yaqin hamkorlikni ta’minlovchi yaxlit tizimni shakllantirishda, ilg‘or xorijiy tajriba asosida o‘quvchilarda matematik tasavvurlarni takomillashtirishda, iqtidorli yoshlarni aniqlashda hamda ularning matematika fani bo‘yicha mahalliy va xalqaro fan olimpiadalari masalalarini yechish ko‘nikmalarini rivojlantirishda muhim ahamiyatga egadir.
