RАSMIY MUNOSАBАT Kecha BukharaNews telegram kanalida eʼlon qilingan hamda Buxoro davlat universitetida Frantsiyaning Vatel mehmonxona va turizm biznes maktabi hamkorligidagi bakalavriat qoʼshma taʼlim dasturi talabalarining test imtihonlari topshirishi boʼyicha bildirilgan fikrga nisbatan quyidagilar maʼlum qilinadi.Buxoro davlat universitetida Vatel mehmonxona va turizm biznes maktabi bilan hamkorlikdagi bakalavriat qoʼshma taʼlim dasturi 2019-2020 oʼquv yilidan boshlab yoʼlga qoʼyilgan. Vatel mehmonxona va turizm biznes maktabi 2016 yilda jahonning turizm va mehmondorchilik boʼyicha eng yaxshi biznes maktabi sifatida tan olingan, ayni paytda QS jahon reytingida 42-oʼrinni egallab turibdi. Bunday mashhur taʼlim muassasasining filialini tashkil etish uchun BuxDUga Oliy va oʼrta maxsus taʼlim vazirligi, Buxoro viloyati hokimiyati, Oʼzbekistonning Frantsiyadagi elchixonasi tomonidan katta amaliy yordam koʼrsatildi. BuxDUdagi qoʼshma dastur talabalariga taʼlim olish uchun barcha sharoitlar yaratib berildi. Foundation Year, yaʼni maxsus tayyorgarlik yili deb hisoblanuvchi birinchi yilda asosiy eʼtibor ingliz tili koʼnikmalarini yuqori darajaga koʼtarishga qaratildi. Talabalar uchun maxsus ingliz tili darslaridan tashqari, xorijlik oʼqituvchilar ishtirokida “Speaking Club” (muloqot klubi) faoliyati tashkil etildi. Karantin davrida ham universitetning Moodle tizimi orqali darslar oʼtishda davom etildi.Jahon reytinglarida yuqori oʼrinlarda turuvchi biznes maktabining taʼlim sifatiga qoʼyadigan talabi ham yuqori boʼladi, albatta. Tayyorgarlik yilidan keyingi 3 yillik ixtisoslik taʼlimi toʼliq ingliz tilida boʼlishi, Vatel biznes maktabining jahondagi 59 ta boshqa filiallari bilan bir xil oʼquv rejada dars oʼtilishi, filiallar oʼrtasida xalqaro almashinuv yoʼlga qoʼyilishi rejalashtirilgan. Buning uchun esa, Vatel biznes maktabining Frantsiyadagi markaziy boshqaruvi tomonidan tayyorlov yili oxirida talabalar oʼz hisoblaridan IELTS ingliz tili imtihonini topshirishlari hamda kamida 6,0 balli darajaga chiqqanlarini tasdiqlovchi sertifikatni taqdim etishlari talabi qoʼyilgan. Ushbu talabga javob bera olmaydigan talabalar oʼqishlarini keyingi bosqichda davom ettira olishmaydi. Ushbu talablar talabalar va ularning ota-onalariga doimiy ravishda maʼlum qilib kelingan.Buxoro davlat universiteti karantin davrida kelib chiqqan muammolarni hal qilish maqsadida, talabalar manfaatlarini koʼzlagan holda, Vatel markaziy boshqaruviga odatiy IELTS testi (1,5 mln. soʼm, Toshkent shahrida topshiriladi) oʼrniga uning simulyatsiyasi boʼlgan IELTS Mock testini topshirtirish, minimal talabni 5,5 ball qilib belgilash boʼyicha iltimosnoma bilan murojaat qildi. Iltimosnomaga ijobiy yondashgan Vatel markaziy boshqaruvi taklifga rozilik bildirdi, shuningdek sinovning bir qismi sifatida talabalar bilan intervьyu oʼtkazish orqali baholashning bir qismini oʼz zimmalariga olishlarini maʼlum qildi.Natijada, BuxDUda Vatel talabalari uchun 8-10 iyulь kunlari barcha karantin talablariga rioya qilgan holda IELTS Mock testi oʼtkazilishi, uning xarajatlari ham universitet tomonidan qoplab berilishi rejalashtirildi. Аyni paytda taʼlim olayotgan 87 nafar talaba 3 kunga taqsimlanib, 2 smenada (test va Frantsiya tomoni bilan onlayn suhbat), 3 ta katta auditoriyada test topshirish belgilandi. Taʼkidlash joizki, talabalar nafaqat auditoriyalarga kirishda, balki umuman universitet hududiga niqob va qoʼlqopda kelishlari, kirish joylarida ularning haroratlari oʼlchanishi, dezinfektsion tunneldan oʼtishlari, qoʼllariga antiseptiklar bilan ishlov berilishi, 100 kishilik auditoriyalarga oʼzaro masofa saqlagan holda koʼpi bilan 15-20 kishi kirishlari tartibi joriy qilingan. Ingliz tili testidan minimal talab qilingan darajani olish va frantsuz tomonidan belgilangan imtihon aʼzolari bilan suhbatdan oʼtish - talabaning keyingi bosqichga oʼtkazilishi uchun yagona va yakuniy talabdir.Mock testlarini topshirgan va onlayn suhbatda ishtirok etgan barcha talabalarga oʼzlashtirish koʼrsatkichlari koʼrsatilgan maxsus sertifikat beriladi. Аyni paytda “qizil” hududda yashayotganligi yoki kasalligi tufayli imtihonlarga kela olmasligini maʼlum qilayotgan talabalar uchun keyingi sinovlar avgust yoki sentyabrь oyida tashkil qilinishi mumkin boʼlib, maxsus sertifikatlar ham faqatgina sinovlardan soʼng taqdim etiladi. Qoʼyilgan talabga javob bera olganlargina oʼqishda davom etishadi.Oʼzini hurmat qiluvchi har qanday taʼlim muassasasi talabaning bilimini baholamasdan yoki oʼzlashtirish koʼrsatkichi past boʼlgan talabalarga oʼqishni davom ettirishga ruxsat bermaydi.Shunday ekan, BukharaNews telegram kanalida eʼlon qilingan va taʼna-nadomatdan iborat fikrlarni “qoʼrqqan oldin musht koʼtarar” yoki “choʼkayotgan odam xasga yopishadi” qabilida baholash mumkin. Fikr bildirish shakliga qaraganda, talabalardan birisining onasi ekanligi taxmin qilinayotgan shaxsga ommaviy axborot vositalarida asossiz fikr bildirishdan oldin, vaziyatni toʼliq oʼrganish, zarur boʼlsa test uchun yaratilgan sharoitlar bilan tanishib ketishni maslahat bergan boʼlardik. Masalan, ayni paytda ham universitetning alohida ajratilgan xonalarida barcha karantin qoidalariga toʼliq rioya qilingan holda Davlat test markazi tomonidan xorijiy til sertifikati uchun sinovlar xavfsiz shaklda oʼtkazilmoqda.Vaziyatni oʼrganmasdan taʼna-nadomat, hatto haqorat yoʼlini tanlagan ushbu shaxs yana bir necha kundan keyin boshlanadigan va 1,5 million nafar abiturient, nazoratchi, xavfsizlikni taʼminlovchi xodimlar ishtirokida oʼtkaziladigan qabul imtihonlariga nisbatan qanday fikrda boʼlsa? Oʼsha payt kimlarni haqorat nishoniga olar ekan? Talaba yuqori taʼlim sifatini taʼminlash uchun qoʼyilgan talablarga javob bera olmasligidan qoʼrqib, vaziyatni oʼz foydasiga hal qilishni koʼzlagan shaxslarga eʼtibor berish zarur emas deb oʼylaymiz.BuxDU Matbuot xizmati
