1-iyul kuni Oliy va o‘rta maxsus taʼlim vaziri o‘rinbosari U.Begimqulov, Buxoro davlat universiteti rektori O.Xamidov, Xalqaro hamkorlik bo‘yicha prorektor A.Jo‘rayev, O‘zbekistonning Benelyuks mamlakatlaridagi favqulodda va muxtor elchisi D. Hakimovlarning Bryusseldagi Birlashgan biznes instituti (United Business Institutes) vakillari bilan onlayn uchrashuvi bo‘lib o‘tdi. Uchrashuvda Belgiya tomonidan ijrochi direktor Joshua Lim, operatsion menejer Lorens Kazda hamda dekan, vatandoshimiz Munira Aminova ishtirok etdi.Birlashgan biznes instituti (United Business Institutes) Belgiyaning eng mashhur biznes universitetlaridan bo‘lib, Bryusselda, Lyuksemburgda va Shanxayda o‘z filiallariga ega. Buyuk Britaniyaning Midlseks universiteti (Tayms jahon reytingida 401-500 guruhida) bilan hamkorlikda ingliz tilidagi “Biznesni boshqarish” (Business Administration) yo‘nalishida bakalavriat va magistratura dasturlarini taklif qiluvchi universitet o‘z hamkorlik tarmog‘ini kengaytirish maqsadida O‘zbekistonning Benelyuks mamlakatlaridagi elchixonasiga murojaat qilgan hamda O‘zbekistonda, xususan Buxoroda o‘z dasturlarini yo‘lga qo‘yish istagini bildirgan.Uchrashuvda tomonlar mazkur masala bo‘yicha o‘z fikrlarini bayon etdilar. Dastlabki qadam sifatida o‘zaro hamkorlik memorandumini imzolash hamda ushbu asosda “Biznesni boshqarish (MBA)” xalqaro magistratura dasturini yo‘lga qo‘yish borasida ehtiyoj tahlillarini amalga oshirishga kelishib olindi.BuxDU Matbuot xizmati
