Buxoro davlat universitetida turli sohalarda xalqaro konferensiyalarni tashkil etish, shuningdek xorijda o‘tadigan anjumanlarda ham tashkilotchilar qatorida faoliyat ko‘rsatish borasida tajriba to‘plangan.Joriy yilning 12-19 may kunlari Ukraina, O‘zbekiston, Polsha, Latviya va boshqa ko‘plab mamlakatlar oliy taʼlim muassasalari hamda yirik kompaniyalar hamkorligida “Atrofimizdagi intellekt-2020” III xalqaro kongressi onlayn ravishda o‘tkaziladi. Kongressning bosh tashkilotchisi Kiyev milliy iqtisodiyot universiteti bo‘lib, mamlakatimizdan Buxoro davlat universiteti hamda Lomonosov nomli Moskva davlat universitetining Toshkentdagi filiali kongressning tashkilotchilari qatorida ishtirok etishadi. Kongress hamkorlari sifatida “Arselor-Mittal” hamda “Metinvest” kabi jahonga mashhur yirik kompaniyalar ishtirok etayotganliklari eʼtiborga molik.Kongress seksiyalari “Raqamli iqtisodiyotda biznes-modellar va innovatsiyalar”, “Sanoatning to‘rtinchi inqilobi davrida sanoat klasterlarining transformatsiyasi”, “Raqamli iqtisodiyot muhitida biznesning masʼuliyati hamda inson huquqlari”, “Ijtimoiy ishda innovatsion texnologiyalar”, “Biznes-muloqot va lingvistika” kabi guruhlarda ish olib boradi. Shuningdek, kongress doirasida talabalarning xalqaro biznes-loyiha va startaplari tanlovi ham bo‘lib o‘tadi.25 aprel kuni Buxoro davlat universiteti rektori boshchiligidagi ishchi guruhning Kiyev milliy iqtisodiyot universiteti va ushbu universitetning Krivoy Rog shahridagi filiali rahbariyati bilan onlayn muloqoti bo‘lib o‘tdi. Muloqotda tomonlar kongressga tayyorgarlik masalalari bilan bir qatorda o‘zaro onlayn vebinarlarni tashkil etish, fan sohalari bo‘yicha boshlab qo‘yilgan ilmiy-uslubiy hamkorlikni davom ettirish masalalarini ham muhokama qilib oldilar. Kongressda universitet olimlari o‘z ilmiy maʼruzalari bilan, talabalar esa startap loyihalari bilan ishtirok etishadi. May oyida o‘zaro 6 ta vebinar tashkil etishga ham kelishib olindi. 2020 yil oxirigacha esa, hamkorlikda tayyorlanayotgan 4 ta o‘quv qo‘llanma ham tayyor holga keladi. Tomonlar ushbu ko‘rinishdagi hamkorlikdan mamnunliklarini aytib o‘tib, uni yana-da rivojlantirishda hamfikr ekanliklarini maʼlum qildilar.BuxDU Matbuot xizmati
