Universitetimiz ushbu yil 85 yoshga to’ladi. Uning bosib o’tgan uzoq tarix yo’li arxiv hujjatlarida o’z aksini topgan. Buxoro Viloyat Davlat Arxivida saqlanayotgan 532-fond arxiv hujjatlari Universitetimiz tarixidan so’zlovchi muhim manbadir. Bu manbalarni tadqiq qilish, arxeografik jihatdan o’rganish, ayniqsa, shu kecha-kunduz doirasidagi dolzarb masala hisoblanadi.Ushbu masala yuzasidan bugungi kunda Buxoro Davlat Universiteti Ijtimoiy - iqtisodiy fakulteti arxivshunoslik yo’nalishi talabalari ustoz A.Hamroyev rahbarligida Buxoro Viloyat Davlat Arxivida shu muassasa direktori S. Abbosova va boshqa bir qator arxivchi xodimlar bilan hamkorlikda ushbu 532 - fond ustida arxeografik tadqiqot ishlarini olib bormoqdalar. Fond Buxoro Davlat Universitetining 1930 yildan hozirga qadar bo’lgan tarixiga oid hujjatlarni qamrab olgan. 1930 - 1974 yillarga oid hujjatlar miqdori 774 ta yig’ma jildlarni tashkil etadi. Ushbu hujjatlarda oliygohning turli sohalari, qabul qilingan talabalar ro’yxati va ular haqidagi umumiy ma’lumotlar, dargohda faoliyat ko’rsatgan professor-o’qituvchilar hamda bo’limlar (fakultetlar), shuningdek, Buxoro Davlat Pedagogika instituti huzurida tashkil etilgan o’qituvchilar tayyorlaydigan qisqa muddatli va kechki kurslar faoliyati to’g’risida ma’lumotlar keltirilgan. Arxivshunoslik yo’nalishi talabalari hozirga qadar Universitetning 1940-yillarga qadar bo'lgan tarixiga oid hujjatlar bilan tanishib chiqdilar. Kuzatuvlar shuni ko’rsatadiki, arxivdagi BDU ning urush va urushdan keyingi hamda mustaqillik yillariga oid hujjatlari hali to’liq o’rganilmagan. Shuning uchun ham bu hujjatlar ustida arxeografik tadqiqot va hujjatlarni nashr qilish ishlarini olib borishni yo’lga qo’yish muhim.
