Buxoro davlat universitetida Rossiya Federatsiyasining yetakchi universitetlaridan biri boʼlgan Qozon federal universiteti bilan yaqin hamkorlik yoʼlga qoʼyilgan. Xususan, birgalikda “Iqtisodiyot” yoʼnalishida qoʼshma bakalavriat dasturi amal qilmoqda boʼlib, 2019 yilda ushbu dasturga ilk 39 nafar talaba qabul qilindi.10 aprelь kuni BuxDU rektori O.Xamidov, xalqaro hamkorlik boʼyicha prorektor А.T.Joʼraev, Qozon federal universiteti Boshqaruv, iqtisodiyot va moliya instituti direktori N.G.Bagautdinova hamda ushbu institutning xalqaro hamkorlik boʼyicha direktor oʼrinbosari O.V.Polyakovalar oʼrtasida onlayn muloqot oʼtkazildi. Muloqot kun tartibiga qoʼshma dastur talabalari uchun QFU onlayn platformalardan foydalangan holda darslar oʼtilishini davom ettirish, masofaviy ravishda ilmiy maʼruzalarni tashkil qilish hamda hamkorlikning boshqa masalalari muhokamasi kiritildi.Ikki OTM oʼrtasidagi hamkorlik doirasida joriy yilda bir qator oʼquv-uslubiy loyihalar amalga oshirilishi, xususan aprelь oyidan boshlab 4 nafar oʼqituvchining QFUdan BuxDUga tashrif buyurishi va oʼquv rejasi asosida darslar oʼtishi, BuxDUdan 6 nafar oʼqituvchi malaka oshirish va stajirovka oʼtash uchun QFUga yuborilishi rejalashtirilgan edi. Koronavirus pandemiyasi ushbu rejalarga oʼzgarish kiritib yuborganligiga qaramasdan, tomonlar rejalashtirilgan faoliyatni onlayn tarzda davom ettirishga kelishgan edilar. Shu kelishuvning natijasi oʼlaroq, hamkorlikdagi qoʼshma dastur talabalari uchun QFUning Microsoft Teams platformasi orqali amalga oshirilayotgan masofaviy taʼlim jarayoniga toʼliq ulanish imkoniyati berilmoqda. Bundan tashqari, QFU tomoni bilan mazkur universitetning elektron kutubxonasiga ulanish orqali Rossiya Federatsiyasida mavjud boʼlgan yuqori sifatli koʼplab ilmiy manbalardan foydalanish borasida kelishildi.Oʼzaro axborot xatlari almashininsh orqali har ikkala universitetda oʼtkazilishi rejalashtirilgan ilmiy konferentsiyalarda masofaviy ravishda ishtirok etilishi borasida ham fikrlar bir joydan chiqdi.Tomonlar ushbu formatdagi muloqotni davom ettirish boʼyicha kelishib olishdi. Keyingi onlayn muloqot 15 aprelь kuni kengaytirilgan ravishda oʼtkaziladi hamda unda prorektorlar, dekanlar va kafedra mudirlari ishtirok etishadi.Buxoro davlat universiteti Matbuot xizmati
