Ming yillar davomida shakllangan mehr-oqibat, mehr-muruvvat tushunchalari asrlar mobaynida el-yurtimizning dunyoqarashi, maʼnaviy hayotining negizi sifatida vujudga kelgan, ongimizdan chuqur joy olgan buyuk qadriyatlarning amaliy ifodasidir.Kuni kecha Buxoro davlat universiteti rektori Obidjon Xamidov universitet prorektorlari, fakultet dekanlari, professor-oʼqituvchilari hamda talaba-yoshlar bilan birgalikda koʼp yillar davomida Buxoro davlat universitetida oʼz faoliyatini olib borgan ustozlarimiz xonadonlariga tashrif buyurishib ular holidan xabar olindi. Dastlab universitet rahbariyati universitetda koʼp yillar davomida faoliyat yuritgan iqtisodiyot fanlari nomzodi, dotsent fahrli ustozimiz Inoyatova Manzura Xidoyatovna xonadonlariga tashrif buyurishdi. Manzura Xidoyatovna 1991-2009 yillar oraligʼida BuxDU Iqtisodiyot kafedrasida faoliyat yuritganlar. 2001-2003 yillarda iqtisodiyot kafedrasi mudiri boʼlib ishlaganlar. Manzura Xidoyatovnaga rektorimiz Obidjon Xamidov tomonidan estalik uchun sovgʼalar topshirildi. “Ustoz! Muallim! Mudarris! Murabbiy! Bu soʼzlar naqadar purmaʼno va sermazmundir. Bu soʼzlarni eshitganda qalblar junbushga kelib, koʼngillar yorishib ketadi. Zero, esimizni tanigan ilk onlarimizdan boshlab aynan ana shunday zotlar bizning qoʼlimizdan tutib kelmoqda. Hech birimiz birinchi boʼlib oʼqish-yozishni oʼrgatgan ustozimizni yodimizdan chiqarmaganmiz, desam, oʼylaymanki, mubolagʼa boʼlmaydi” deydi universitet rektori Obidjon Xamidov. Tashriflar davomida universitet jamoasi shuningdek, ulugʼ ustozlarimizdan biri boʼlgan 40 yildan ortiq universitetda faoliyat yuritgan, 100 dan ortiq shogirdlar orttirgan, tarix fanidan fundamental bilim bergan Boltaev Sharif Olimovich honadonlariga tashrif buyurildi. Ochiq dasturhon atrofida jamlangan universitet jamoasi fahrli ustozimizni yaqinlashib kelayotgan Navroʼz bayrami bilan tabriklab estalik sovgʼalari ulashildi. Shuningdek, universitet jamoasi faxrli ustozimiz t.f.n. dots. Mirzoxoʼjaev Rahmon MUXАMEDOVICh xonadonlariga ham tashrif buyurishdi. Mirzoxoʼjaev Rahmon MUXАMEDOVICh 1947 yilda, Buxoro shaxrida tugʼilgan. Buxoro shahridagi 10 son oʼrta maktabni 1965 yilda tugatdi. Buxoro Davlat pedagogika institutining fizika-matematika fakultetini 1969 yilda bitirdi. 1974-76 yillarda Moskvadagi Bauman nomidagi oliy texnika universitetida ilmiy tadqiqotchi bo'lib ishladi. Uz.FА fizika-texnika institutida aspiranturani tamomlab akademik G.U.Umarov rahbarligida «Quyosh adsarbtsion muzlatgich qurilmasi» mavzusida nomzodlik dissertatsiyasini yoqlagan. 1970 yildan mehnat faoliyati Buxoro Davlat universiteti bilan bogʼliq, 1993 yildan 2007 yilgacha universitet huzuridagi litsey-internatda direktor lavozimida ishlagan. Oʼttiz yettita ilmiy va usuliy ishlari, ikkita mualliflik guvohnomasi bor.Tashriflar soʼngida universitet jamoasi professor Ergash Rajabovich Qilichev hollaridan xabar olishdi. Ustozimiz E.Qilichev 1940 yil 26 martda Buxoro viloyat Vobkent tumanida tugʼilgan. 1963 yilda Samarqand davlat universitetini tugatgan. 1963 yildan 2011 yilgacha Buxoro davlat universitetida faoliyat olib borgan. 1970 yildan dotsent, 1991 yildan professor. 1974-1981 yillar oʼzbek tilshunosligi kafedrasi mudiri. 1981-1986 yillar oʼzbek filologiyasi va chet tillar fakulteti dekani. 1992-1995 yillar oʼquv ishlari boʼyicha prorektor. 1997-2001 yillar oʼzbek filologiyasi fakulteti dekani. 7 nafar fan nomzodiga ilmiy rahbarlik qilgan. 5 ta darslik, 2 ta oʼquv qoʼllanma, 4 ta monografiya, 300 ga yaqin ilmiy maqola muallifi. Rossiya, Turkiya, Ukraina, Gruziya, Ozarbayjon, Qozogʼiston, Tojikiston kabi xorijiy davlatlarda turkologiya masalariga bagʼishlangan maqolalari nashr etilgan. Domlaning oʼgʼillari, Rajab Ergashevich Qilichev va Bayramali Qilichevlar BuxDU da faoliyat koʼrsatib kelmoqdalar. Har ikkalalari ham fan nomzodlari, dotsentlar. Buxoro davlat universiteti Matbuot kotibi Otabek Jalolov
