Bugun Buxoro davlat universiteti Tarix va madaniy meros fakulteti Buxoro tarixi kafedrasi katta o`qituvchisi Boltayev Bobur Baxtiyorovich tashabbusi bilan fakultetda Buxoro shahar 33 - maktab o`quvchilari uchun "Yosh buxoroliklar va jadidchilik namoyondalari" mavzusida dars va universitet huzuridagi Qatag`on qurbonlari muzeyiga sayohat uyushturildi. Dastavval maktab o`quvchilari o`zlarini talaba sifatida his qilib katta auditoriyada o`qituvchi tomonidan mavzuga doir tayyorlangan qiziqarli hamda har bir insonda ajdodlarga nisbatan g`urur va iftixor tuyg`ularini uyg`otadigan ma`ruzani tinglashdi. O`qituvchi o`z so`zida mamlakatimizning milliy ozodligi va uning ma`rifatli bo`lishi uchun kurashgan jadid ota-bobolarimiz har doim bizning qalbimizda o`zlarining so`lmas asarlari bilan birga abadiy qolishlarini, ular tomonidan mustabid hukumat davrida qilingan bu kabi sa`y-harakatlar bugungi yoshlar uchun ibrat va o`git bo`lib xizmat qilishini alohida ta`kidlab o`tdi. Shundan so`ng, o`quvchilarga universitet huzuridagi Qatag`on qurbonlari muzeyi tanishtirildi. Muzeydagi eksponatlar va qiziqarli faktlar o`quvchilar e`tiborini o`ziga tortdi. Ta`kidlash o`rinliki, bu kabi maktab va oliygoh tomonidan qilinayotgan hamkorlik amallari kelgusida yosh avlodning yetuk kadr bo`lib yetishib chiqishida baholi qudrat o`z hissasini qo`sha oladi. Buxoro davlat universiteti Matbuot xizmati xodimi Javohir Saidov
