Har bir inson hayotda salomat yashashligi uchun jismoniy tarbiya bilan shugʼullanib turishi zarur. Аyniqsa, oʼqish va aqliy mehnat bilan mashgʼul boʼlgan insonlar koʼp vaqtlarini auditoriya va ishda oʼtkazganligi sababli ularning jismoniy tarbiyaga ehtiyoji boshqalarga nisbatan koʼproq boʼladi. Hozirgi davrda yurtimizda insonlarning salomatligini saqlash xususida koʼplab xayrli ishlar olib borilmoqda.Mamlakatimizning barcha hududlarida kattalar va bolalarning sport bilan shugʼullanishi uchun imkoniyatlar tobora rivojlanib kelmoqda. Oʼzbekiston Respublikasi Prezidenti tomonidan ilgari surilgan 5ta tashabbusdan ikkinchisi - yoshlarni jismoniy chiniqtirish, ularning sport sohasida qobiliyatini namoyon qilishlari uchun zarur sharoitlar yaratishga yoʼnaltirilgan. Buxoro davlat universitetida ham turli sport musobaqalar oʼtkazilishi, xususan futbol, voleybol, kurash va boshqa milliy oʼyinlarimiz tashkil qilinishi an`anaga aylanganligi talabalar hamda professor-oʼqituvchilar salomatligiga ijobiy taʼsir qilib kelmoqda.Mazkur yoʼnalishda oʼtkazib kelinayotgan shunday tadbirlardan biri kuni kecha Jismoniy madaniyat fakulteti professor-oʼqituvchilari tomonidan tashkil etildi. Shinam va koʼrkam talabalar turar joyida boʼlib oʼtgan qizlar oʼrtasida shashka sport turi boʼyicha musobaqa nafaqat sportchilar, balki koʼplab sport ixlosmandlarni oʼziga jalb qildi. Murosasiz oʼtgan bellashuvlarda fakultetning faol sportchi qizlari ishtirok etishdi. Shunisi eʼtiborliki, musobaqada joriy yilda universitet ostonasini bosib oʼtgan 1 kurs talabalari mutlaq gʼoliblikni qoʼlga kiritishdi. Ularga fakultet nomidan faxriy yorliq va qimmatbaho sovgʼalar topshirildi. Bundan tashqari, Qarshi davlat universiteti Jismoniy madaniyat fakulteti dekani F. Eshpulatov boshchiligida tashrif buyurgan sportchi qizlar universitet qizlari bilan oʼrtoqlik bellashuvlarini oʼtkazishdi. Musobaqadan soʼng 8 mart – Xalqaro xotin-qizlar kuni munosabati bilan fakultet talaba qizlari, Talabalar turar joyida yashovchi barcha talabalar va professor-oʼqituvchilari uchun bayram dasturxoni yozildi. Tabrik uchun soʼzga chiqqanlar Oʼzbekistonda muhtaram Prezidentimizning bevosita rahnamoligi ostida onalik va bolalikni himoya qilish, xotin-qizlarga munosib turmush, ish, dam olish hamda bolalar tarbiyasi bilan shugʼullanish uchun zarur sharoitlar yaratish kabi muhim masalalarga alohida etibor qaratilayotganini eʼtirof etdilar. Dasturxon atrofida toʼplanganlar uchun tashkil etilgan kontsert dasturi bayramga mantiqiy yakun yasadi.
