O`zbekiston Respublikasi Qurolli Kuchlari tashkil etilganing 28 yilligi va Vatan himoyachilari kuniga bag`ishlab viloyatimizda qator uchrashuv, harbiy qismlarga tashriflar va madaniy tadbirlar tashkil etildi. Xususan, Buxoro shahar Markaziy o`yingohida o`tkazilgan “Vatanparvarlik – milliy yuksalish kafolati” shiori ostidagi bayram festivali va marafoni shahrimiz ahliga o`zgacha ko`tarinkilikni bag`ishladi.Bugun har bir yigitning ko`zida Vatanga bo`lgan muhabbat, fidoiylik va kelajakka ishonch hissi o`z aksini topmoqda. Chunki, bugun bayram shodiyonasi, yurt tinchligi uchun kerak bo`lsa, jonini fido eta oladigan, mard va jasur, azm-u qat`iy vatan himoyachilarining kunidir. Erta tong bilan shahrimiz ko`chalarida o`tkazilgan bayram namoyishi, kunning ikkinchi yarmiga kelganda festival va sport chiqishlariga ulanib ketdi. “Sport salomatlik garovi” shiori ostida o`tgan bayram marafonida Buxoro davlat universitetining faol, abjir va intiluvchan talabalari ham ishtirok etdilar. Ta`kidlash joizki, vatan hissi, tuyg`usi ona allasi, onaning shirin so`zi kabi jaranglaydi. Vatanini sevgan, yurt taqdiriga, tinchligiga befarq bo`lmagan mardlar bugun chegara qismlarida yurtimiz sarhadlarining daxlsizligini ta`minlab kelmoqdalar. Ularning ko`rsatayotgan jasorati, matonat va sabri tufayli mana bugun yurtimiz tinch, hayotimiz farovon o`tmoqda. Muxtasar qilib aytganda, yurtning har bir qarich yeri uchun, uning rivoji va ravnaqi uchun o`z jonini fido qiluvchi insonlar haqiqiy vatan himoyachilaridir.Buxoro davlat universiteti Matbuot kotibi Otabek Jalolov
