Universitetimizda xorijiy ta'lim texnologiyalari asosida o'quv jarayonlarini tashkil etish, universitetning mavqeini oliy ta'lim muassasalari orasidagi reytingini oshirish borasida tizimli ishlar amalga oshirilmoqda. Ana shunday tadbirlardan biri Kuni kecha o'tkazildi. Amerika elchixonasining "Ingliz tili o'qituvchilari karvoni" Samarqand va Termiz shaharlaridan o'tib Buxoro davlat universitetining Xorijiy tillar fakultetiga tashrif buyurishdi. Bu xalqaro trening ingliz tili o'qituvchilarini kasbiy rivojlantirishga bag'ishlandi.Bu treningning tashkilotchilari asosan Amerika elchixonasi homiyligi bilan taklifl etilgan O'zbekistonda va Qirg'izistonda faoliyat yurituvchi amerikalik ingliz tili o'qituvchilari edilar. Dastlabki qism Farg'ona davlat universitetidagi ingliz tili o'qituvchisi Graham Derry tomonidan olib borilib, asosan " Using songs for teaching ", ya'ni Ingliz tili o'qitishda qo'shiqlardan foydalanishga bag'ishlandi. Bishkekdan tashrif buyurgan mutaxassis Jill Tyson esa "Academic Writing" haqida innovatsion va qiziqarli ma`lumotlarni yetkazdi. Buxoro davlat universitetida Amerika elchixonasi granti asosida faoliyat yuritayotgan Mina Gavell tomonidan "Objective- centered Lesson planning" qismi yetarlicha ma'lumotlar orqali yetkazildi. Shu grant asosida Toshkent davlat pedagogika universitetida mashg'ulot o'tkazib kelayotgan Shannon Roach treningni kreativ fikrlashga doir o'zining turli xil interaktiv o'yinlar bilan olib bordi. Tadbir so'ngida qatnashuvchilar sertifikatlar bilan taqdirlandilar va fakultet o'qituvchilari tashkilotchilarga o'z minnatdorchiliklarini bildirishdi.
