Bugungi kunda bagʼrikenglik insoniyat tomonidan erishilgan eng katta yutuqlardan biridir, bundan keyingi taraqqiyot uchun ham u muhim omillardan boʼlib qolaveradi. Qolaversa, bagʼrikenglik oʼzbek xalqi maʼnaviyati va madaniyatining ajralmas qismi hisoblanadi. Diniy bagʼrikenglik gʼoyasi xilma-xil diniy eʼtiqodga ega boʼlgan kishilarning bir zamin, bir Vatanda, olijanob gʼoya va niyatlar yoʼlida hamkor va hamjihat boʼlib yashashini anglatadi. Dunyodagi dinlarning barchasi ezgulik gʼoyalariga asoslanadi va yaxshilik, tinchlik, doʼstlik kabi xususiyatlarga tayanadi. Odamlarni halollik va poklik, mehr-shafqat, birodarlik va bagʼrikenglikka daʼvat etadi.Millatlararo totuvlik gʼoyasi – umumbashariy qadriyat boʼlib, turli xil xalqlar birgalikda istiqomat qiladigan mintaqa va davlatlar milliy taraqqiyotini belgilaydi, shu joydagi tinchlik va barqarorlikning kafolati boʼlib xizmat qiladi. Millatlararo totuvlik jamiyatda tinchlik va barqarorlikning kafolati boʼlib xizmat qiladi. Yurtimizda nafaqat ijtimoiy-iqtisodiy, siyosiy sohalar, balki zaminimizda istiqomat qilib kelayotgan turli millat va elatlar oʼrtasida doʼstlik rishtalarini yanada mustahkamlash, diniy bagʼrikenglik tamoyillarini qaror toptirishga ham alohida eʼtibor qaratib kelinadi. Har bir millatning umumiy manfaatlari bilan birga oʼz qadriyatlari ham bor. Oʼzbekiston kabi koʼp millatli mamlakatda turli millatlar manfaatlarini uygʼunlashtirish, ular orasida totuvlikni taʼminlash taraqqiyotning hal qiluvchi omillaridan biri hisoblanadi. Shuning uchun ham mamlakatimizda bu masalaga katta eʼtibor berib kelinmoqda. Bugungi kunda mamlakatimizda turli eʼtiqodga mansub diniy tashkilotlar oʼrtasida oʼzaro hurmat va bagʼrikenglik muhiti oʼrnatilishi uchun barcha sharoitlar yaratilgan. Oʼtgan 28 yil mobaynida bu yoʼnalishda muayyan natijalarga erishildi. Eng asosiysi – bagʼrikenglikning muhim omillaridan biri boʼlgan millatlararo va dinlararo totuvlik toʼla taʼminlandi. Bugun mamlakatimizda 16 diniy konfessiyaga mansub 2224 ta diniy tashkilot va 140 ga yaqin milliy madaniy markazlar faoliyat koʼrsatmokda. 2019 yil 16 noyabr kuni 16-noyabr kuni Xalqaro diniy bagʼrikenglik kuni munosabati bilan Buxoro davlat universiteti katta yigʼingohida Xo`ja Ismat jome masjidi Imom xatibi Gadoev Salohiddin Otamurodovich ishtirokida davra suhbati tashkil etildi. Davra suhbatida ishtirok etgan barcha talabalarga xalqimizning diniy eʼtiqodiga zid boʼlgan zararli oqimlarning yurtimizga kirib kelishining oldini olish, anʼanaviy, maʼrifiy, moʼʼtadil islom dinini yot gʼoyalar taʼsiridan saqlashdan iborat ekanligi taʼkidlab oʼtildi. “Bagʼrikenglik bilim, samimiyat, ochiq muloqot, hur fikr, vijdon va eʼtiqodni vujudga keltiradi. Bagʼrikenglik turli-tumanlikdagi birlikdadir.U burchgina emas, balki, siyosiy va huquqiy ehtiyoj hamdir. Bagʼrikenglik –tinchlikka erishishni taʼminlovchi va urush madaniyatsizligidan tinchlik madaniyatiga eltuvchi kuchdir” deya taʼkidladi Xo`ja Ismat jomeʼ masjidi Imom xatibi Gadoev Salohiddin Otamurodovich. Davra suhbati davomida talabalar oʼzlari qiziqtirgan savollarni berib, toʼlaqonli javob oldilar.