Oʼzbekiston Respublikasi “Davlat tili haqida”gi Qonuni qabul qilinganligining 30 yilligini keng nishonlash, oʼzbek tilining davlat tili sifatidagi nufuzini oshirish, maktabda ona tili taʼlimi sifatini yaxshilash hamda oʼquvchi yoshlarni davlat tiliga chuqur ehtirom va milliy anʼanalarga sodiqlik ruhida tarbiyalash, asosiysi, davlat tili maqomiga erishgan ona tilimiz imkoniyatlarini puxta oʼzlashtirish maqsadida “Davlat tili − milliy oʼzlik va mustaqil davlatchilik timsoli” mavzusida seminar oʼtkazildi.Seminarda Oʼzbekiston Respublikasi Prezidenti tomonidan 2019 yil 4 oktabrda imzolangan “Oʼzbekiston Respublikasining “Davlat tili haqida”gi Qonuni qabul qilinganining 30 yilligini keng nishonlash” toʼgʼrisidagi qarorida belgilangan vazifalar ijrosini taʼminlash koʼzda tutilgan boʼlib, unda maktab direktori, oʼquv ishlari va maʼnaviy maʼrifiy ishlar boʼyicha direktor oʼrinbosarlari, ona tili va adabiyot fani metodik birlashmasi aʼzolari, barcha ona tili va adabiyot fani oʼqituvchilari ishtirok etishdi.BuxDU Oʼzbek tilshunosligi kafedrasi aʼzolari S.А.Nazarova, G.А.Аstanova, N.K.Rahimova va seminar qatnashchilari maktabda ona tili va adabiyot fanining oʼqitilishi, oʼquvchi yoshlarda davlat tiliga munosabatning shakllanishini oʼrganish maqsadida ona tili va adabiyot fani oʼqituvchilari tomonidan tashkil qilingan darslarni kuzatishdi. Seminar yigʼilishida Oʼzbek tilshunosligi kafedrasi tilshunoslari S.А.Nazarova, G.I.Аstanova va N.K.Rahimova ishtirok etib, oʼzbek tilining davlat tili maqomiga erishuvi, davlat tili sifatida nufuzini oshirish va hozirgi davrda davlat tilida ish yuritish holati, ona tilining ijtimoiy mavqei, rasmiy qoʼllanilishi hamda ilmiy tadqiqi toʼgʼrisida maʼruza qilishdi. Shuningdek, seminar yigʼilishida ona tili va adabiyot fani oyligi munosabati bilan 43-maktabda oʼtkazilgan ochiq darslar tahlil qilinib, mavjud kamchiliklarni bartaraf qilish yuzasidan metodik tavsiyalar berildi. Seminar ishtirokchilari, shuningdek, kafedra aʼzolari tadbir hamda maktab oʼquvchilarining iqtidori, ijodkorligi, nutq texnikasi haqida iliq fikrlar bildirishdi.
