Buxoro davlat universiteti va Qorovulbozor tuman Xalq taʼlimi boʼlimining tashabbusi bilan joriy yilning 9 noyabr kuni Qorovulbozor tumani 7-umumiy oʼrta taʼlim maktabida tuman maktablari oʼquvchilari oʼrtasida matematika olimpiadasi boʼlib oʼtdi.Mazkur olimpiadani 7-maktab direktori Raxmatova Dildora Nizomovna kirish soʼzi bilan ochib, ishtirokchilarni qutladi. Hozirgi kunda xalq va oliy taʼlim tizimida yurtboshimiz rahnomaligida olib borilayotgan islohotlar va iqtidorli yoshlar bilan ishlash boʼyicha keng koʼlamli tadbirlarga alohida toʼxtalib oʼtdi. Olimpiadaga bayramona ruh bagʼishlash maqsadida maktab jamoasi tomonidan tayyorlangan musiqiy dastur taqdim qilindi. Soʼngra olimpiada ishtirokchilarini BuxDU Matematika kafedrasi mudiri, f.-m.f.n., dots. T.H.Rasulov, Qorovulbozor tumani XTB TMFTE shoʼbasi rahbari S.N.Umarov va TSM inspektor metodisti D.J.Tursunovalar qutlab, ularning olimpiada jarayonida faol qatnashishida omad tilashdi. Mazkur olimpiada Oʼzbekiston Respublikasi Prezidentining 2019 yil 3 maydagi “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari toʼgʼrisida”gi PQ-4306-sonli qarori va Oʼzbekiston Respublikasi Prezidenti Аdminstratsiyasining 2019 yil 11 oktabrdagi topshirigʼi ijrosini taʼminlash boʼyicha oʼtkazilgan yangicha sinov tanlovidir. Olimpiadani oʼtkazishdan koʼzlangan asosiy maqsad Qorovulbozor tumani oʼquvchi yoshlari orasidan iqtidorli yoshlarni aniqlash, ularning intelektual salohiyatini qoʼllab-quvvatlash, ragʼbatlantirish va matematik savodxonligini oshirish, jahon taʼlim sohasida yanada integratsiyalashuvi uchun qoʼshimcha shart-sharoitlar yaratish hamda oʼquvchilarga matematika fanidan oʼtkaziladigan xalqaro va Respublika olimpiadalari haqida batafsil maʼlumot berishdan iboratdir. Oʼtkazilgan matematika olimpiadasida tumanning 8 ta umumtaʼlim maktabidan 120 dan ortiq 7-11-sinf oʼquvchilari ishtirok etib, oʼz bilim va mahoratlarini sinovdan oʼtkazdilar. Ushbu olimpiada ochiq boʼlib, unda istalgan maktabning ixtiyoriy oʼquvchisi qatnashishi mumkin.Olimpiada shartiga koʼra ikki yosh toifasidagi, yaʼni 7-8-sinflar va 9-11-sinflar oʼquvchilari uchun tayyorlangan topshiriqlar murakkabligiga koʼra xalqaro olimpiada topshiriqlari doirasida tuzilgan boʼlib, 4 ta matematik masala berildi, uni yechish uchun 3 soat vaqt belgilandi. Olimpiadani yuqori saviyada, xalqaro standartlar darajasida oʼtkazish maqsadida hakamlar hayʼatiga Buxoro davlat universitetidan dunyoning oʼndan ortiq yetakchi oliy taʼlim muassasalarida malaka oshirib kelgan olim, Oliy taʼlim muassasalari talabalari oʼrtasida Аl-Xorazmiy nomli yosh matematiklarning Xalqaro olimpiadasi tashkiliy qoʼmitasi aʼzosi, BuxDU yosh olimpiadachi talabalar jamoasi ilmiy rahbari, Matematika kafedrasi mudiri, f.-m.f.n., dots. Rasulov Toʼlqin Husenovich, yosh olimpiadachi talabalar jamoasining ilmiy maslahatchilari Dilmurodov Elyor Baxtiyorovich va Turdiev Halim Hamroevich hamda Matematika kafedrasi oʼqituvchilari Rashidov Аnvar Sharipovich va Parmonov Hamidlar jalb qilingan. Yordamchi ishchi guruh tarkibiga tuman XTB xodimlari bilan bir qatorda BuxDU Matematika mutaxassisligi boʼyicha 2-bosqich magistrantlari Bekzod Bahronov va Аsliddin Boltaevlar, Fizika-matematika fakulteti iqtidorli talabalaridan Ilhom Sharipov va Muhammadali Ergashevlar kiritildi. Shuningdek, oʼquvchilarning matematik bilimlarini rivojlantirish, murakkab masalalarni yechish boʼyicha malakalarini shakllantirish maqsadida T.H.Rasulov “Matematikani ingliz tilida oʼrganamiz” mavzusida mahorat darsini oʼtkazdi. E.B.Dilmurodov va H.H.Turdievlar esa oʼtkazilgan olimpiada masalalari yechimlarini taqdimot qildilar. Olimpiada yakunlariga koʼra, har ikki toifada birinchi, ikkinchi va uchinchi oʼrinlar gʼoliblari BuxDU rektori O.X.Xamidov imzosi bilan tasdiqlangan I-darajali, II-darajali, III-darajali diplomlar bilan, keyingi uchta oʼrin sohiblari esa Buxoro matematika olimpiadasining maxsus sertifikatlari bilan taqdirlandilar. Olimpiada gʼoliblari:7-8-sinflar boʼyicha:1-oʼrin: Samadov Sardor (6-maktab), I-darajali diplom sohibi;2-oʼrin: Nekboev Ogʼabek (1-maktab), II-darajali diplom sohibi;3-oʼrin: Fazliddinov Botirjon (1-maktab), III-darajali diplom sohibi.4-oʼrin: Choriev Аbror (8-IDUM), Maxsus sertifikat sohibi;4-oʼrin: Аminov Shoxrux (7-maktab), Maxsus sertifikat sohibi;4-oʼrin: Choriev Lazizbek (8-IDUM), Maxsus sertifikat sohibi.9-11-sinflar boʼyicha:1-oʼrin: Ismatov Bahriddin (8-IDUM), I-darajali diplom sohibi;2-oʼrin: Nuriddinov Elshod (7-maktab), II-darajali diplom sohibi;3-oʼrin: Tilloev Dilshod (6-maktab), III-darajali diplom sohibi.4-oʼrin: Hasanov Diyorbek (8-IDUM), Maxsus sertifikat sohibi;4-oʼrin: Аbdurayimova Sevara (7-maktab), Maxsus sertifikat sohibi;4-oʼrin: Sotiboldieva Sojida (7-maktab), Maxsus sertifikat sohibi.I-darajali diplom sohiblari Sardor Samadov va Bahriddin Ismatovlarga Matematika kafedrasi jamoasi nomidan ingliz tilida nashr qilingan “Xalqaro olimpiada masalalarini yechish boʼyicha tavsiyalar” kitobi maxsus sovgʼa sifatida topshirildi.Qorovulbozor tumani 7-maktab 10-sinf oʼquvchisi Nuriddinov Elshod tanlov natijalari boʼyicha 9-10 sinf oʼquvchilari orasida eng yuqori ball toʼplab, Buxoro davlat universitetida tashkil etiladigan oʼquvchilarni matematika boʼyicha Xalqaro va Respublika fan olimpiadalariga tayyorlash boʼyicha “Yosh olimpiadachilar” yozgi maktabida bepul taʼlim olish huquqini qoʼlga kiritdi. Olimpiada gʼoliblariga diplom va sertifikatlarni T.H.Rasulov, D.N.Raxmatova, S.N.Umarov, D.J.Tursunovalar topshirdilar. Olimpiadaning taqdirlash va yopilish marosimida Buxoro viloyati Qorovulbozor tuman oʼquvchi yoshlari oʼrtasida oʼtkazilgan “Buxoro matematika olimpiadasi”ni tashkil qilish, xalq taʼlimi tizimida taʼlim sifatini yaxshilash, iqtidorli yoshlarni aniqlash va qoʼllab quvvatlash ishlaridagi hamkorligi uchun Buxoro davlat universiteti rektori Xamidov Obidjon Xafizovichga va Matematika kafedrasi jamoasiga Qorovulbozor tuman XTB rahbariyati tashakkur bildirdi.
