Hammamizga ma`lumki, hozirgi kunda turizmga bo`lgan e`tibor nafaqat O`zbekistonda, balki dunyoning ko`plab mamlakatlarida ham oshib bormoqda. Mamlakatning turizmini rivojlantirish uchun faqatgina ichki turizm emas, balki xalqaro turizmni obdon o`rganish, xorijiy davlatlarning turizm salohiyatini ko`zdan kechirish, hamdo`stlik aloqalarini o`rnatish talab etiladi. Yuqorida sanab o`tilgan talablardan kelib chiqqan holda Toshkentda Singapur bilan hamkorlikda faoliyat yuritib kelayotgan menejmentni rivojlantirish instituti ( Management Development Institute of Singapore in Tashkent) tomonidan turizm sohasiga bag`ishlangan talabalar festivali o`tkazildi.Yuqorida ta`kidlab o`tganimizdek xorijiy mamlakatlarning turizm salohiyati bilan yaqindan tanishish turizm rivojiga hissa qo`shmay qolmaydi. Shu maqsadda ushbu festivalga Turkiya, Singapur, Buyuk Britaniya, Qozog`iston, Qirg`iziston, Turkmaniston, Tojikiston, Rossiya kabi davlatlar taklif etildi. Ushbu festivalning yana bir muhim maqsadlaridan biri, xorijlik va o`zbekistonlik talabalarning o`zaro fikr-mulohaza almashishlari edi. Xuddi shuning uchun ham yurtimizning Xorazm, Samarqand viloyatlarida turizm yo`nalishida tahsil olayotgan talabalar taklif etildi. Shuni ham ta`kidlab o`tish joizki, Buxoro davlat universiteti Iqtisodiyot va Turizm kafedrasining bir guruh iqtidorli talabalari festivalning eng faol ishtirokchilari qatorida bo`lishdi.Ushbu festival ikkinchi marta o`tkazilayotgan bo`lib, mana shu 2 yil mobaynida O`zbekiston va taklif etilgan davlatlar orasida o`zaro do`stona munosabat uyg`otishga yana ham hissa qo`shdi. Festival 6 kunga rejalashtirilgan bo`lib, mana shu 6 kun mezbonlarimiz tomonidan oldindan tayyorlab qo`yilgan aniq rejalar asosida mazmunli tarzda o`tkazildi. Birinchi kunda mehmonlarni aeroportda kutib olib, shinam mehmonxonaga joylashtirish ishlari amalga oshirildi. Ikkinchi kunda festivalning ochilish marosimi o`tkazildi. Xuddi mana shu kun festivalning eng unutilmas kunlaridan biri bo`ldi desak mubolag`a bo`lmaydi. Sababi, aynan shu kunda tashrif buyurgan davlatlarning urf-odatlari, milliy liboslari, raqslari, kuy-qo`shiqlari bilan yaqindan tanishish imkoniyati tug`ildi. Ushbu marosimda barcha ishtirokchilar jo`shqin kuy-qo`shiqlar sadosi ostida barcha tomoshabinlarni o`yin-kulguga chorlovchi betakror raqslarni ijro etib berishdi. Shuningdek, bizning jamoa ushbu gala konsertda Buxoroning milliy qo`shig`i bo`lmish Mavrigi sadolari ostida sho`h raqsni ijro etib, butun tomoshabinlarni o`yinga jab qilishdi. Mana shunday xursandchilik ila boshlangan festivalning keyingi kunida Sayqali ro`yi zamin deya nom olgan, buyuk sarkarda va davlat arbobi bo`lmish Amir Temur orom olgan, O`zbekiston Respublikasining birinchi prezidenti Islom Abdug`aniyevich Karimovning ona shahri bo`lmish ko`hna Samarqand tomon yo`l oldik. Samarqandga sayohat, avvalambor, buyuk sarkarda Amir Temur maqbarasini ziyorat qilish bilan boshlandi. Festivalning to`rtinchi kuni barchamiz uchun hayajonli bo`ldi. Ushbu kunda xorijdan tashrif buyurgan barcha mehmonlar va o`z hamyurtlarimiz institutning yig`ilishlar zalida bir stol atrofida o`tirib, o`zlarining turizm va uni rivojlantirish chora-tadbirlari to`g`risidagi fikr-mulohazalarini bayon qilishdi. Konferensiya chog`ida har bir guruhdan tanlab olingan talabalar o`zlari tahsil olayotgan oliy o`quv yurtining imkoniyatlari, darslarning sifati hamda o`z shaharlarining turizmga, sayyohlarni jalb qilish va ularning oqimini oshirishga bo`lgan e`tibor nechog`lik ekanini izohlab berishdi. Shu o`rinda aytib o`tish lozimki, unuversitetimizning Iqtisodiyot va Turizm kafedrasi 2-bosqich talabasi Zokirov Farrux mazmunli prezentatsiya orqali ikki mingyilik tarixga ega bo`lgan Buxoroning turizm salohiyatini, shahrimizdagi qadimiy obidalardan tortib, zamonaviy qurilayotgan maskanlar haqida izohlab berdi hamda barcha jamoadoshlari tomonidan tayyorlangan Buxoro davlat universiteti hamda Buxoroni ochib beruvchi videorolikni namoyish etdi.Musoboqadan so`ng barcha ishtirokchilarga maxsus xonada bo`yoqlar taqdim etildi va rasm chizish mashg`ulotlari bo`lib o`tdi. Festivalning keyingi kunida erta tongda sport musoboqasi uyushtirildi. Ushbu o`tkazilgan yigitlar bo`yicha yugurish musoboqasida Buxoro jamoasining faol ishtirokchilaridan bo`lgan Zokirov Farrux faxrli birinchi o`rinni egalladi va sertifikat bilan taqdirlandi. Mashg`ulotdan so`ng taqdirlash marosimi o`tkazildi va unda barcha ishtirokchilar sertifikat va estalik sovg`alari bilan taqdirlandi.Xulosa qilib aytganda, ushbu turizmga bag`ishangan talabalar festivali toshkentlik yurtdoshlarimiz tomonidan g`oyat mukammal reja asosida tayyorlandi va unda mehmonlar uchun olam-olam quvonch bag`ishlovchi, esda qolarli ko`plab tadbirlar, musoboqalar, tomoshalar bo`lib o`tdi. Shuningdek, ushbu festivalga taklif etilgan har bir ishtirokchi o`z sohasi, ya`ni turizm uchun kerakli amaliy hamda nazariy bilim va ko`nikmalarni oldi.Men ham festival ishtirokchisi sifatida shuni aytib o`tmoqchimanki, hozirgi kunda turizmga qaratilgan ulkan e`tiborni inobatga olgan holda shu kabi ajoyib festivallarni nafaqat poytaxtimiz Toshkent, balki barcha viloyatlar, xususan Buxoroda ham o`tkazish tarafdoriman. Bu orqali xorijlik mehmonlarimiz nafaqat zamonaviy poytaxtimiz Toshkent, balki qadimiy, Yetti piri bo`lgan Buxoroyi Sharif va undagi necha asrdan buyon savlat to`kib turgan sharq durdonalari bo`lmish obidalarimiz, Buxoro xalqining madaniy turmush tarzi, urf-odatlari bilan yaqindan tanishish imkoniga ega bo`lishadi.So`zim so`ngida Toshkentda Singapur bilan hamkorlikda faoliyat yuritib kelayotgan menejmentni rivojlantirish instituti (Management Development Institute of Singapore in Tashkent) tashkilotchilariga festivalda qatnashgan ustozlarim, jamoadoshlarim va o`z nomimdan yorqin xotiralar va ajoyib taassurotlar uchun samimiy minnatdorchiligimizni bildirib qolaman. Iqtisodiyot va Turizm fakulteti 2-bosqich talabasi Radjabova Mehrigiyo
