2019-yilning 4-oktyabr kuni Buxoro davlat universitetida xorijlik malakali ekspertlar ishtirokida Respublikamizning 14 ta OTM vakillari uchun seminar-trening oʼtkazildi. Ushbu seminarni Buxoro davlat universiteti Ilmiy ishlar va innovatsiyalar boʼyicha prorektori O.S. Qahhorov ochib berdi.Hammamizga maʼlumki, Xalqaro miqyosda tan olingan jurnallarning mavjudligi davlatni jahonda tanilishi va eʼtirof etilishining muhim omilidir. Bu borada muhtaram Prezidentimiz tomonlaridan «Faol investitsiyalar va ijtimoiy rivojlantirish yili»da amalga oshirishga oid davlat dasturida Respublika OTMlarida faoliyat yuritilayotgan ilmiy jurnallarni Scopus, Science Direct kabi xalqaro ilmiy-texnik maʼlumotlar bazalariga bosqichma-bosqich kiritishni taʼminlash boʼyicha bir qancha vazifalar belgilab berilgan. Shu maqsadda, Oʼzbekiston Respublikasi Oliy va oʼrta maxsus taʼlim vazirligi tashabbusi bilan Niderlandiyaning «Elsevier» kompaniyasi bilan hamkorlikda «Ilm-fan-2020» milliy rivojlanish dasturi doirasida yurtimizdagi oliy taʼlim muassasalarining jurnallarini nufuzli ilmiy jurnallar qatoriga kiritish boʼyicha xorijlik ekspertlar taklif qilindi.Seminar-trening «Elsevier» kompaniyasining ilmiy jurnallar konsaltingi boʼyicha vitse-prezidenti Vinchi Elizabet, Bepress jamoasi rahbari Rodjers Stefani, «Elsevier» kompaniyasining Markaziy Osiyo boʼyicha yetakchi eksperti Аndrey Loktevlar tomonidan oʼtkazildi. Ushbu seminar-treningda Аndijon dalat universiteti, Guliston davlat universiteti, Jizzax davlat pedagogika instituti, Samarqand davlat universiteti, Qarshi davlat universiteti, Navoiy davlat konchilik instituti, Namangan davlat universiteti, Nukus davlat pedagogika instituti, Urgench davlat universiteti, Fargʼona davlat universiteti, Fargʼona politexnika instituti, Samarqand davlat arxitektura-qurilish instituti ilmiy ishlar va innovatsiyalar boʼyicha prorektori hamda xodimlari, shuningdek BuxDU professor-oʼqituvchilari, doktorantlari, magistratura talabalari ishtirok etishdi. Oliy taʼlim muassasalarining jurnallarini nufuzli ilmiy jurnallar qatoriga kiritish maqsadida, talab etilgan mezonlar asosida Digital Commons (http://uzjournals.edu.uz) portaliga ilmiy jurnallar kontentlarini toʼliq yuklash, jurnal konfiguratsiyasini toʼliq shakllantirish boʼyicha amaliy ishlarni yakunlash, ilmiy jurnallarining muharrirlari hamda taqrizchilari uchun qulay boʼlgan erkin konfiguratsiyalar qoʼllanilayotgan noyob platformadan foydalanish boʼyicha seminar-trening boʼlib oʼtdi.Buxoro davlat universiteti Matbuot kotibi Otabek Jalolov
