Universitet talaba-yoshlarini yuksak ma‘naviy-axloqiy fazilatlarga ega, jamiyat, davlat va oila oldida o‘z mas‘uliyatini his etadigan, davlatning ichki va tashqi siyosatini to‘g‘ri anglaydigan, vatanparvar va xalqparvar, tashabbuskor va tadbirkor, zamonaviy bilimlar bilan qurollangan hamda yuksak insoniy fazilatlarga ega bo‘lgan irodasi baquvvat, iymoni butun va vijdoni uyg‘oq mutaxassislarni tayyorlash asosiy vazifamiz hisoblanadi. Yoshlar orasida odob-axloqni buzishga, shu jumladan zo‘ravonlik, hayosizlik va shafqatsizlikni tashviqot qilishga qaratilgan har qanday xatti-harakatlarning oldini olish, jumladan, yoshlarni ichkilikbozlik va giyohvandlik illatlaridan, boshqa turli halokatli tahdidlar hamda biz uchun yot bo‘lgan diniy va ekstremistik ta‘sirlardan, tuban “ommaviy madaniyat” xurujlaridan himoya qilishga ko‘maklashish maqsadida O‘zbekiston Respublikasining Konstitutsiyasi, “Kadrlar tayyorlash milliy dasturi to‘g‘risida”gi, “Ta‘lim to‘g‘risida”gi, “Yoshlarga oid davlat siyosatining asoslari to‘g‘risida”gi va “Axborot erkinligi printsiplari va kafolatlari to‘g‘risida”gi qonunlar, Oliy va o‘rta maxsus ta‘lim vazirligining tegishli buyruqlari, BuxDUning Ustavi, ichki tartib qoidalari hamda umume‘tirof etilgan ma‘naviy va axloqiy tamoyillar asosida Buxoro davlat universiteti ning odob-axloq qoidalari ishlab chiqilgan. Unga ko‘ra Buxoro davlat universiteti odob-axloq qoidalarining 3-bo‘lim - Jamoa a‘zolarining odob-axloqiga oid umumiy qoidalar, 3.3 bandida - Jamoa a‘zolarining BuxDUga odamlar diqqatini tortadigan tanani shaffof ko‘rsatib turadigan, yelka, ko‘krak va qorin, shuningdek tizzadan yuqori qismlari ochiq qoladigan hamda haddan ziyod tor kiyimda yoki diniy ibodat libosida, metall zanjirlar, to‘g‘nog‘ichlar, tanaga turli munchoqlar qadagan holda, sport kiyim va poyabzalida kelishi taqiqlanadi. Jamoa a‘zolari BuxDUga orasta bo‘lib, unga monand kiyimda kelishi lozimligi belgilangan (Buxoro davlat universiteti odob-axloq qoidalari “Buxoro davlat universitetning odob-axloq qoidalari” universitet Ilmiy kengashining 2011 yil 29 avgustda o‘tkazilgan 1 yig‘ilishida tasdiqlangan). Shuningdek, Oliy va o‘rta maxsus ta‘lim vazirligining 2018 yil 5 iyuldagi topshiriq xatida ayrim pedagog-xodimlar va talabalarning oliy ta‘lim muassasasiga odamlar diqqatini tortadigan, tanani shaffof ko‘rsatib turadigan, yelka, ko‘krak va qorin, shuningdek, tizzadan yuqori qismlari ochiq qoladigan hamda haddan ziyod tor kiyimda yoki diniy ibodat libosida, metall zanjirlar, to‘g‘nog‘ichlar, tanaga turli munchoqlar qadagan holda, soqoli o‘sgan, ro‘molni jag‘idan bog‘lab o‘ragan tarzda kelishi va shunday holda yurishi jamoatchilik tomonidan ahloqiy qoidalarni buzish sifatida e‘tirof etilayotganligi, shu bilan birgalikda turli tushunmovchiliklarni keltirib chiqarib, ichki tartib-qoidalarning buzilishiga sabab bo‘layotganligi takidlangan. Shu munosabat bilan har bir pedagog-xodim va talaba oliy ta‘lim muassasasiga orasta bo‘lib, unga monand va belgilangan tartibdagi kiyimda, soqol olingan va soch tartibga keltirilgan holda kelishini ta‘minlash maqsadida BuxDU Ustavi, ichki tartib qoidalari hamda xalqaro doirada umume‘tirof etilgan ma‘naviy va axloqiy tamoyillar, xalqimizga xos milliy urf-odat, an‘analarimiz va milliy ma‘naviyatimiz mezonlari asosida universitet ichki tartib-qoidalariga quyidagi jumlalar kiritildi hamda universitet kengashida qayta tasdiqlandi. Buxoro davlat universiteti (BuxDU)da kiyinish tartibi va madaniyati: erkak pedagog xodim talaba yigitlar BuxDU hududiga (belgilangan formada) oq ko‘ylakda, klassik uslubdagi shim-kostyum, galstukda va to‘q rangdagi poyafzalda kelishlari lozim; ayol pedagog xodim va talaba qizlar BuxDU ga (belgilangan formada) oq bluzkalarda, tizzani yopib turadigan yubka va kostyum, to‘q rangdagi poyafzalda kelishlari lozim; erkak pedagog xodim va talaba yigitlarning tashqi qiyofasi ozoda, pokiza, sochi tartiga solingan va soqoli olingan bo‘lishi lozim; talabalar auditoriada, o‘qituvchi va xodimlar esa xizmat xonalarida ustki kiyimda (plash, palьto, kurtka kabilar) yurishlari mumkin emas; pedagog xodim va talabalar BuxDUga diniy ibodat libosida, sport kiyim va poyafzalida kelishi, ularning odamlar diqqatini tortadigan, xususan, tanani shaffof ko‘rsatib turadigan, yelka, ko‘krak va qorin, tizzadan yuqori qismlari ochiq qoladigan hamda haddan ziyod tor kiyimda, shuningdek, naushniklar, metall zanjirlar va boshqa taqinchoqlar, pirsingda, soqolini ustirgan holda, ro‘molni jag‘idan bog‘lab o‘ragan tarzda BuxDUga kelishi va shu holatda BuxDUda yurishi mumkin emas; ayol pedagog xodimlar va talaba qizlarga yorqin pardoz (makiyaj) ishlatishga yo‘l qo‘yilmaydi. Bundan tashqari ushbu qoidalarni buzganlik uchun Vazirlar Mahkamasining “Oliy ta‘lim muassasalariga o‘qishga qabul qilish, talabalar o‘qishini ko‘chirish, qayta tiklash va o‘qishchdan chetlashtirish tartibi to‘g‘risidagi nizomlarni tasdiqlash haqida” 2017 yil 20 iyundagi 393-son qarori bilan tasdiqlangan “Oliy ta‘lim muassasalarining bakalavriatiga talabalarni o‘qishga qabul qilish tartibi to‘g‘risida nizom” asosida intizomiy chora ko‘rilishi belgilandi (Buxoro davlat universiteti Ilmiy kengashining 2018 yil 12 iyulda o‘tkazilgan 10 yig‘ilishida tasdiqlangan). Hurmatli universitet pedagog-xodimlari! Universitetda tahsil olayotgan talabalarga o‘rnak sifatida ichki tartib-qoidalarga amal qilishni o‘zimizdan boshlaylik va ularni ham ushbu ichki-tartib qoidalarga rioya qilishiga erishaylik.
