Kecha ushbu mavzuda Buxoro davlat universitetida Xalqaro ilmiy-amaliy konferensiya bo‘lib o‘tdi. Unda Qazog'iston, Afg‘oniston va Qirg‘iziston davlatlaridan vakillar ishtirok etdilar. Konferentsiyani BuxDU ning ilmiy ishlar va innovatsiyalar bo‘yicha prorektori Otabek Qahhorov ochib, anchumanning maqsad va vazifalari haqida to‘liq malumot berdi. Konferentsiyaga respublikamizning poytaxti – Toshkent shahri, Andijon, Namangan, Qashqadaryo, Surxondaryo, Navoiy viloyatlaridagi oliy va o‘rta maxsus ta’lim maskanlari professor-o‘qituvchilari katta qiziqish bildirib, maqola jo‘natishgandi. Anjuman bo‘ladigan kunga qadar ushbu maqolalar kitob holida chop etildi. Ushbu ilmiy-amaliy konferentsiya “Nasriddin Afandi festivali”ning nufuzini yanada oshirishga xizmat qiladi. U haqdagi qarashlarimizni, ilmiy bilimlarimizni yanada boyitadi. Chunki Nasriddin Afandi tarixda bo‘lganmi? U tarixiy shaxsmi yoki bor-yo‘g‘i adabiy qahramonmi? Afandi latifalaridagi chuqur falsafiy-ma’naviy mazmun manbalarini nimalar tashkil qiladi? Nasriddin Afandi siymosi folьklor, yozma adabiyot, publitsistika, teatr, tasviriy va amaliy san’atda dunyo miqyosida nima uchun juda keng yoritilib kelingan? Nega ko‘p joylarda u haqda muzeylar ochilgan va haykallar o‘rnatilgan? Bu turizm rivoji bilan bog‘liqmi? Nasriddin Afandi latifalarining etik, estetik, pedagogik qirralari nega keng? Afandi latifalarida milliy til targ‘ibi qanday o‘rin tutadi. Ular nega turli tillarga tarjima qilingan? Bu tarjimalarning maqsadi va saviyasi qanday? Nasriddin Afandi siymosi nega ko‘pincha Buxoro bilan bog‘lanadi- singari qator savollarga javob izlandi. Konferentsiya xulosa va natijalari butun dunyo ijtimoiy-iqtisodiy o‘zgarishlarni boshdan kechirayotgan, global muammolar girdobida qolgan bir davrda xalqlar o‘rtasida birdamlik va vatanparvarlik hissini kuchaytirish, ayniqsa, yoshlarning ma’naviy qadriyatlarni, xalq an’analarini saqlash hamda boyitish jarayonlarida to‘laqonli va faol ishtirok etishini ta’minlash, yaratilgan moddiy va nomoddiy merosimizni, an’anaviy xalq hunarmandchiligi, folьklor, tarixiy va madaniy me’moriy yodgorliklarimizni asrash va rivojlantirish uchun muhim ahamiyat kasb etadi. Anjumanda BuxDUning quvnoqlar va zukkolar jamoasi Afandi repurtuaridan tayyorlangan toshalarini namoyish etdilar. Mannon Otaboy BuxDU matbuot kotibi
