O‘zbek adabiyoti kafedrasi professori, filologiya fanlari doktori Dilrabo Quvvatova tomonidan 4-kurs “D”, “E” guruhi talabalariga “Yangi o‘zbek adabiyoti” fanidan “Erkin Vohidov poeziyasi. Abdulla Oripov she’riyati” mavzusida ochiq ma’ruza tashkil etildi. Ma’ruzaga kafedra professor-o‘qituvchilari, doktorantlar ishtirok etishdi.Dars zamonaviy talablar asosida ilmiy-nazariy, metodik jihatdan yuqori saviyada o‘tkazildi. Ma’ruza boshida ilmiy va badiiy adabiyotlar batafsil sharhlandi va mashg‘ulot davomida bu manbalardan samarali foydalanildi. Ayni paytda fanlararo integratsiyani amalga oshirishga ham e’tibor qaratildi. Mashg‘ulot “Musiqa” fani bilan bog‘landi. E.Vohidov, A.Oripov she’rlari asosida tayyorlangan qo‘shiqlar videotasmada namoyish etildi hamda universitet musiqa ta’limi talabalari Sh.Jo‘rayeva, M.Nayimova, B.Jumayev tomonidan qo‘shiqlar jonli ijro etildi va ishtirokchilarda iliq taassurotlar uyg‘otdi. Dars davomida har bir ijodkor faoliyati bilan bog‘liq ovozli taqdimot va taqdimotlar namoyish etildi. O‘qituvchi ikkala shoir ijodidan ko‘plab she’rlarni yoddan o‘qidi va qiyosiy tahlil qildi. Mavzu bugungi kunda respublikamizda amalga oshirilayotgan tadbirlar, ezgu ishlarga bog‘landi. Xususan, E.Vohidov va A.Oripov ijod maktablarining faoliyat yuritayotganligi, Buxoroda ham S.Ayniy va Fitrat maktablarini tashkil etish zarurligi ta’kidlandi. E.Vohidovning hajviy qahramoni haqida fikr yuritilar ekan, yaqinda universitetimizda xalqaro miqyosda tashkil etilgan “Nasriddin Afandining dunyo kulgi madaniyatidagi o‘rni” mavzusidagi konferensiya yodga olindi.Ma’ruzada zamonaviy pedagogik texnologiyalardan unumli foydalanildi. Ayniqsa, xorijda keng qo‘llaniladigan "Intellekt-karta”, shu bilan birga, “Klaster”, “Aqliy hujum” usullari talabalarning mavzuni chuqur o‘zlashtirishlariga yaqindan ko‘mak berdi. Shu bilan birga video orqali E.Vohidov va A.Oripovning o‘zlari aytgan she’rlari eshittirildi. Ikki ijodkor asarlari asosida Z.Bahronova, Sh.Jumayeva, O.Jo‘rayeva kabi talabalar ishtirokida sahna ko‘rinishlari namoyish etildi. Darsda faol ishtirok etgan talabalarga 10 ga yaqin ilmiy-metodik va badiiy adabiyotlar o‘qituvchi tomonidan sovg‘a qilindi. Mannon OtaboyBuxDU matbuot kotibi
