Yaqinda BMT ning Inson huquqlari Umumjahon deklaratsiyasi qabul qilinganligiga 70 yil to‘ldi. Shu munosabat bilan bu yubiley O‘zbekistonda ham keng nishonlanmoqda.Bugun Buxoro davlat universitetida ushbu sanaga bag`ishlab Inson huquqlari bo`yicha O`zbekiston Respublikasi Milliy markazi, BMT Taraqqiyot Dasturi O`zbekistondagi vakolatxonasi, O`zbekiston Respublikasi Oliy va o`rta maxsus vazirligi, Buxoro viloyat hokimligi va Buxoro viloyat Adliya boshqarmasi hamkorligida “Inson huquqlari Umumjahon deklaratsiyasi va uning O‘zbekiston Respublikasi Konstitutsiyasida tutgan o‘rni va ahamiyati” mavzusida katta tadbir o‘tkazildi.Tadbirni Buxoro davlat universiteti rektori vazifasini bajaruvchisi professor Arif Kadirov kirish so‘zi bilan ochdi. Shundan so‘ng Inson huquqlari bo‘yicha O‘zbekiston Respublikasi Milliy markazi bosh mutaxassisi Oybek Ahmadov “Inson huquqlari sohasidagi xalqaro majburiyatlarning O‘zbekiston Respublikasi tomonidan bajarilishi” mavzusida atroflicha fikr-mulohaza yuritdi. Ta’kidlandiki, Prezidentimizning tashabbusi bilan qabul qilingan 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi O‘zbekistonda inson huquqlari, erkinliklari va qonuniy manfaatlarini ta’minlash tizimini yanada takomillashtirishning yangi bosqichini boshlab berdi. Harakatlar strategiyasi BMT Barqaror taraqqiyot maqsadlarini bajarish bo‘yicha O‘zbekistonning “yo‘l xaritasi” bo‘ldi va u besh bosqichda amalga oshirilmoqda. “Inson huquqlari Umumjahon deklaratsiyasi qabul qilinganining 70 yilligiga bag‘ishlangan tadbirlar dasturi”da belgilangan keng qamrovli va ulkan ko‘lamli chora tadbirlarning amalga oshirilishi, shubhasiz, davlat, jamiyat va fuqarolarning mazkur Deklaratsiya tamoyillari hamda qadriyatlariga e’tiboru ehtiromni yanada oshiradi, o‘z navbatida Harakatlar strategiyasida belgilangan ustuvor vazifalarni amalga oshirish doirasida O‘zbekistonning xalqaro munosabatlarning to‘la huquqli subyekti sifatidagi o‘rnini yanada mustahkamlaydi. Tadbir davomida yig‘ilganlarga bugungi kunda yurtimizda amalga oshirilayotgan tub islohotlar, siyosiy jarayonlar va yoshlar uchun yaratilgan keng imkoniyatlar hamda shart-sharoitlar to‘g‘risida, o‘quvchilar o‘rtasida o‘zaro bilim almashish, yoshlarni o‘z konstitutsiyaviy huquqlarini va Inson huquqlari umumjahon deklaratsiyasini yaxshi tushunib yetishlari va faolligini oshirishga hamda mustaqil fikrlashga o‘rgatishga qaratilgan bahs munozara tarzida o‘tkazildi.Bundan tashqari Inson huquqlari bo‘yicha O‘zbekiston Respublikasi Milliy markaz tomonidan Buxoro davlat universiteti hamda 12- va 35-sonli maktablar kutubxona fondlarini boyitish va ilmiy-uslubiy yordam tariqasida 50 nusxadan ziyod inson huquqlariga oid kitoblar hamda Inson huquqlari umumjahon deklaratsiyasining 70 yilligiga bag‘ishlangan broshyuralar sovg‘a sifatida tuhfa qilindi.Shuningdek, tadbirda “O‘zbekiston – kelajakka intilgan mamlakat” videofilmining taqdimoti ham bo‘lib o‘tdi. Tadbir so‘ngida mutaxassislar talabalarni qiziqtirgan savollarga javob qaytardilar. Bahs-munozaralarda faol ishtirok etgan ilmu toliblar Inson huquqlari sohasida chop etilgan adabiyotlar bilan taqdirlandilar. Mannon OtaboyBuxDU matbuot xizmati
