Xabar uz saytida “BuxDUning”duxi”. 40 kun “chilla saqlagan” xat va “ichki nizom” quvvati haqida ikki og‘iz...” deb nomlanuvchi maqola e’lon qilindi.Unda jurnalist Hasan Salomov turmush o‘rtog‘ining tahsilini Jizzax pedagogika institutidan Buxoro davlat universitetiga ko‘chirishiga to‘g‘ri kelganini, buning uchun sansalorlik (kim tomonidan-?) tinka-madorini quritganini, BuxDUning o‘qish ko‘chirilganini tasdiqlovchi xatini naqd 40 kun kutganini vahimali tarzda ta’kidlaydi. Shuningdek, 40 soniyada javobi yetib keladigan xat, nega 40 kun “chilla saqlagan”ini, oxiri xat Jizzaxga yetib borgach ayoli BuxDUda o‘qishini davom ettirganini alohida aytib o‘tgan.Ko‘chirish uchun yozilgan xat BuxDUda qanday qilib qirq kun turishi mumkin? Hududlarda tiklash va ko‘chirish bo‘yicha komissiya talabalarning ushbu mazmundagi arizalarini boshqa hujjatlar bilan birga 15-iyuldan 5- avgustgacha qabul qiladi. Undan so‘ng 10-avgustdan 30-avgustgacha Oliy va o‘rta maxsus ta’lim vazirligining tiklash va ko‘chirish bo‘yicha Idoralararo komissiyasi o‘rganib, o‘z xulosalarini joylardagi oliy ta’lim muassasalariga yuboradi.Shunday qilib Oliy va o‘rta maxsus ta’lim vazirligining 2018-yil 30- avgustdagi 87-03-3095-sonli xatiga binoan Jizzax davlat pedagogika institutidan bir guruh talabalar BuxDUga o‘qishini ko‘chirishiga ruxsat berilgan.Shu munosabat bilan BuxDU rektori A.To‘laganov Jizzax davlat pedagogika instituti rektoriga 13.09.2018 yil 1916-05-TT.sonli xat bilan quyidagicha murojaat qilyapti.“BuxDU qabul komissiyasi ilovada keltirilgan talabalarning o‘qishini BuxDUga ko‘chirishini rasmiylashtirish uchun ularning shaxsiy yig‘ma jildini O‘zbekiston Respublikasi Vazirlar Mahkamasining 2017-yil 20-iyundagi 393-sonli qarori bilan tasdiqlangan “Oliy ta’lim muassasalari talabalari o‘qishini ko‘chirish, qayta tiklash va o‘qishdan chetlashtirish tartibi to‘g‘risida Nizom” talablari asosida yuborishingizni so‘raydi.”Ungacha BuxDU rektori tomonidan 5.09.2018 yil №689-U raqamli buyrug‘i bilan o‘qishini ko‘chirayotgan talabalarga 5-sentyabrdan boshlab darslarga qatnashishga hamda o‘quv rejadagi farqlarni 2018-yil 25-sentyabrgacha topshirishga ruxsat berilgan.Shunday qilib o‘rtadagi farqlar, deylik qarzdorlik sentyabr oxirida yopilgan. Shartnoma pullari esa 15-oktyabrda to‘lanyapti.Talaba kontrakt pulini kech to‘lagan bo‘lsada BuxDU rektorining 02.10.2018-yilda Talabalar safiga tiklash va ko‘chirish to‘g‘risidagi №743-U-sonli buyrug‘i ham chiqarilgan.Buyruqda O‘zbekiston Respublikasi Vazirlar Mahkamasining 2017-yil 20-iyundagi 393-son qarori bilan tasdiqlangan “Oliy ta’lim muassalariga o‘qishga qabul qilish, talabalar o‘qishini ko‘chirish, qayta tiklash va o‘qishdan chetlashtirish tartibi to‘g‘risida”gi Nizomning 32-bandida O‘quv rejalaridagi fanlari bo‘yicha farqlar aniqlanganda talaba akademik qarzdor sifatida o‘qishga qabul qilinadi. Joriy semestr davomida akademik qarzdorlik (farqlar) bartaraf etilgan muddatdan boshlab, oliy ta’lim muassasi rektorining talabaga o‘rnatilgan tartibda stipendiya berish haqidagi buyrug‘i chiqariladi. Stipendiya miqdorini belgilashda fanlar bo‘yicha farqlarni topshirish ko‘rsatkichlari ham hisobga olinadi,” – deyiladi.Maqola muallifi ayoli sentyabr oyi stipendiyasini olmaganligi to‘g‘risida e’tiroz bildiryapti. Agar u kishi shoshilmay Oliy ta’lim muassasalari talabalari o‘qishini ko‘chirish, qayta tiklash va o‘qishdan chetlashtirish tartibi to‘g‘risidagi NIZOMning 3-bob, 25-bandini o‘qiganlarida edi, nega stipendiya berilmaganini tushunar edilar.Keling, ushbu jumlani to‘liq keltiraylik. “O‘quv rejalardagi fanlari bo‘yicha farqlar aniqlanganda talaba akademik qarzdor sifatida o‘qishga qabul qilinadi”. Akademik qarzdor (talaba tili bilan aytganda “povtor”) talabalarga qarzdorlik bartaraf etilmaguncha stipendiya tayinlanmaydi, degani bu. Vaholanki, ushbu Nizomni BuxDUdagilar ishlab chiqmagan, O‘zbekiston Respublikasi Vazirlar Mahkamasi tomonidan tasdiqlangan. Shuning uchun oliygohdagilarni qing‘irlikda ayblash o‘rinlimi? Siz aytgandek 100 ta talaba bir oliygohdan boshqasiga ko‘chirilsa, ular 320.000 so‘mdan stipendiya olib kelayotgan bo‘lsa, naqd 32 000 000 million so‘m kimlarningdir cho‘ntagiga emas, davlat g‘aznasida qoladi.Demoqchimizki, sizga yoqmagan narsaning hammasi ham noto‘g‘ri bo‘lavermaydi, axir.Xatingizda “3” ga o‘ttiz, “4” ga qirq, “5” ga ellik sarlavhadan hech nima uqmadingiz, to‘g‘rimi – degan savol qo‘yibsiz. Biz ham uqmadik, uqolmadik. Lekin, guruch kurmaksiz bo‘lmaydi. Ehtimol, yakuniy davlat imtihonlari vaqtida talabalardan biror narsa ta’ma qiladigan bitta-ikkita subutsiz o‘qituvchilar yo‘q emas, bu esa tan olishimiz lozimki, bugungi kunda ta’lim tizimi oldida turgan muammolardan biri. Bu muammoni barataraf etish bo‘yicha tizimli ishlar yo‘lga qo‘yilmoqda. Ammo, bu butun boshli viloyatimizga, yurtimizga minglab olimu ziyolilarni, tashkilotu davlat rahbarlarini yetkazib bergan otaxon oliygohni badnom qilishga sabab bo‘la olmaydi.Avvalambor, bilimi yo‘q talaba boshqa yo‘llar bilan baho olishga urinadi. Atrofdagilarni ham buzishga, chalg‘itishga sababchi bo‘ladi. Maqola muallifiga yuzlanib quyidagi savolni berishga majburmiz: Ayolingiz ham fanlarni yaxshi o‘zlashtirolmayotganidan xabaringiz bo‘lsa kerak? Bularni o‘ziga yarasha sabablari mavjud. Masalan, talabalar davomati qayd etib boriladigan asosiy hujjat – guruh jurnaliga asosan aytishimiz mumkinki, maqolada aytib o‘tilgan talaba turli fanlardan jami qoldirgan soatlari 80 soatdan ko‘proqni tashkil etmoqda. Ehtimol, qo‘lingizda ayolingiz uzrli sabablar bilan dars qoldirganligini tasdiqlovchi tibbiy ma’luotnoma bordir. Agar shunday bo‘lsa dars qoldirgan soatlar kamayadi. Bo‘lmasa talaba 74 soat uzrli sabablarsiz darsga qatnashmasa talabalar safidan chiqarilishiga olib keladi. Sizning turmush o‘rtog‘ingizga bilim berib, yaxshilik qilib turgan dargohga tosh otish insofdanmi? Sizga QVPning “bolnichniy”si o‘tmaydi, degan o‘qituvchining fikrini men ham oqlamayman. Universitet ma’muriyati tibbiy ma’lumotnomalar faqat shahardagi 11-son poliklinikadan tasdiqlanishi shart degan buyruq chiqarmagan. Sizga shu gapni aytgan o‘qiutvchiga intizomiy chora ko‘rilishi aniq.Ayolingiz sababsiz darslar qoldirgani uchun 2018-yil 29-dekabrda, shuningdek, 2019-yil 1-fevralda jami ikki marta fakultet Kengashi yig‘ilishida ogohlantirilganligi fikrimiz isbotidir. Demoqchimizki, universitetda hech qanaqa sirli “ichki Nizom”lar yo‘q. Bo‘lishi ham mumkin emas. Barcha oliygohlar qatori BuxDUda ham ishlar O‘zbekiston Respublikasi Qonunlari, O‘zbekiston Respublikasi Prezidenti va hukumat qaror va farmonlari, O‘zbekiston Oliy va o‘rta maxsus ta’lim vazirligi ko‘rsatmalari asosida yuritiladi. Agar ozgina qiziqib so‘raganingizda Sizga barcha zarur hujjatlar, vazirlik nizomlari ko‘rsatilardi. Siz fakultet rahbariyati javoblaridan qoniqmagan bo‘lsangiz, prorektorlar yoki rektorga murojaat qilganingizda muammolarga oydinlik kiritilardi. Agar sizda yana shunday savollar tug‘ilsa, muammolarga duch kelsangiz, BuxDUning quyidagi “This email address is being protected from spambots. You need JavaScript enabled to view it. pochtasiga yoki buxdu.uz. veb saytiga murojaat qilishingiz mumkin. Qolaversa, oliygoh birinchi qavatida rektor va prorektorlar hamda rektor yordamchisi qabul kunlari, telefon raqamlari yozib qo‘yilgan. Lekin Siz negadir rahbariyatga murojaat qilish o‘rniga kuchingizni matbuot orqali ko‘rsatishga uringansiz. Zero, narvonga ham pillapoyalarni birma-bir bosib chiqadilar.Nima bo‘lganda ham, avvalo hammamiz insonmiz. To‘g‘rirog‘i, xom sut emgan bandamiz. Kimdandir xafa bo‘lib, jahl ustida butun bir ilm o‘chog‘i sha’niga dog‘ tushirish sizningcha qanchalik to‘g‘ri, bunisi vijdoningizga havola.BuxDU matbuot xizmati
