O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasining 2018-yil 16-iyuldagi 302-son buyrug‘i bilan tasdiqlangan “Oliy ta’lim muassasalarini attestatsiyadan o‘tkazish jadvali”ga hamda 2018-yil 7-sentabrdagi №353-son buyrug‘iga asosan joriy yilning 10-23- sentabr kunlari Buxoro davlat universiteti davlat akkreditatsiya muddati tugaganligini inobatga olib, attestatsiyadan o‘tkazilmoqda.Buxoro davlat universiteti respublikamizning dastlabki OTMlaridan biri bo‘lib, 1930-yildan Buxoro davlat pedagogika instituti sifatida o‘z faoliyatini boshlagan. Ta’lim muassasasi O‘zbekiston Respublikasi Prezidentining 1992-yil 28-fevraldagi PF-356 sonli Farmoni hamda Vazirlar Mahkamasining 1992-yil 11-martdagi 125-sonli Qaroriga asosan Buxoro davlat universitetiga aylantirilgan.Buxoro davlat universiteti O‘zbekiston Respublikasi Vazirlar Mahkamasi huzuridagi Davlat test markazi tomonidan 2010-yil 14-31-dekabrda attestatsiyadan o‘tkazilgan. Davlat test markazi tomonidan universitetga 2011-yil 8-aprel № 56-sonli davlat attestatsiyasidan o‘tganligi to‘g‘risida 5 yil muddatga Sertifikat berilgan. Davlat inspeksiyasining 2018-yil 7-sentabrdagi 353-sonli buyrug‘iga muvofiq SH.K.Kurbanniyazov boshchiligidagi 25 nafar ekspertlardan iborat attestatsiya komissiyasi Buxoro davlat universiteti jamoasi bilan 2018-yil 10-sentabr kuni seminar o‘tkazib, navbatdagi attestatsiya jarayonlarini o‘tkazish tartibi hamda ekspertlar tarkibi bilan tanishtirishdi. Attestatsiya O‘zbekiston Respublikasi Vazirlar Mahkamasining 2006-yil 10- fevraldagi 21-sonli qarori bilan tasdiqlangan “O‘zbekiston Respublikasi ta’lim muassasalarini davlat akkreditatsiyasidan o‘tkazish tartibi to‘g‘risida Nizom” hamda O‘zbekiston Respublikasi Adliya vazirligi tomonidan 2008-yil 14-iyuldagi 1836-son bilan davlat ro‘yxatiga olingan “O‘zbekiston Respublikasi ta’lim muassasalarini attestatsiyadan o‘tkazish mezonlari va texnologiyalari bo‘yicha yo‘riqnoma” asosida amalga oshirilmoqda. Davlat inspeksiyasi attestatsiyadan o‘tkazish jarayonida universitetda ta’limni tashkil etishning umumiy tavsifi va ijro intizomi, davlat ta’lim standartlarining o‘quv jarayoniga joriy etilishi, talabalarning fan dasturlarini o‘zlashtirish darajasi, professor-o‘qituvchilarning ilmiy-pedagogik salohiyati, ilmiy-tadqiqot ishlarining iste’mochilarning talablaridan kelib chiqib olib borilayotganligi, talabalarining darslik va o‘quv qo‘llanmalar bilan ta’minlanganlik darajasi, moddiy-texnik ta’minot, o‘quv-laboratoriya jihozlari, kompyuterlashtirish salmog‘i, ularning zamonaviy asbob-uskunalar bilan to‘ldirilish holati va foydalanishi, zamonaviy pedagogik va axborot texnologiyalarining joriy etilish holati, ta’limning ishlab chiqarish va ilm-fan bilan integratsiyasi, ilmiy-pedagogik kadrlar tayyorlash holati, bitiruv malakaviy va kurs ishlari mavzularining zamonaviy islohotlarning talabalaridan kelib chiqib tanlanganligi, ma’naviy-ma’rifiy faoliyat, xalqaro hamkorlikning yo‘lga qo‘yilganligi, bitiruvchilarning ishga joylashganligi darajasi kabi ma’lumotlar bilan tanishilmoqda. Hozirgi kunda Buxoro davlat universitetda 9 ta fakultet, bakalavriat bosqichida 41 ta ta’lim yo‘nalishi jami 8186 nafar talaba, magistratura bosqichida 20 ta mutaxassisliklar bo‘yicha 154 nafar talaba tahsil olmoqda.Universitet kafedralarida jami 688 nafar professor-o‘qituvchi faoliyat olib boradi. Asosiy shtatdagi (568 nafar) professor-o‘qituvchilarning 28 nafari (4,9%) fan doktorlari, professorlar, 148 nafari (26,1%) fan nomzodlari (falsafa doktori (PhD), dotsentlar, 118 nafari (20,8%) katta o‘qituvchilar, 276 nafari (48,6%) assistent o‘qituvchilardir. Ta’lim muassasasida ilmiy salohiyat 31% ni tashkil etadi. Fan doktorlari o‘rtacha yoshi 52 yoshni, fan nomzodlarining o‘rtacha yoshi 41 yoshni tashkil qiladi.Mavjud ta’lim yo‘nalishlaridan 35 tasi, mutaxassisliklardan 15 tasi attestatsiya jarayonlariga jalb qilingan. Jalb qilingan ta’lim yo‘nalishlari va magistratura mutaxassisliklari talabalari 18-19 sentabr kunlari mutaxassislik fanlardan test jarayonlarida qatnashishdi. Har bir ta’lim yo‘nalishi va mutaxassisiliklariga biriktirilgan ekspertlar kafedralardagi pedagogik, o‘quv-uslubiy, ilmiy-innovatsion, ma’naviy-ma’rifiy salohiyatni o‘rganib chiqishmoqda va universitet to‘g‘risida umumiy ma’lumotnoma tayyorlanmoqda.Davlat inspeksiyasi tomonidan aniqlangan muammo va kamchiliklarni joyida bartaraf etish choralari ko‘rilmoqda hamda joyida yechim topmagan muammolarni bartaraf etish uchun universitet rahbariyati bilan birgalikda chora-tadbirlar dasturi (yo‘l xaritasi) ishlab chiqiladi va uni bajarilishi ustidan doimiy nazorat o‘rnatiladi.
