Butunjahon fanlar akademiyasi Birlashgan Millatlar Tashkiloti shafeligida faoliyat yurituvchi yirik xalqaro ilmiy muassasadir. Ko‘pchilik mazkur nufuzli ilmiy tuzilma sayyoramizning barcha qit’alaridan ming nafardan ziyod yetakchi olim, muhandis va ixtirochilarni birlashtirib turganini bilmasa kerak.Joriy yilda tashkilotning yangi a’zolarini aniqlash bo‘yicha mavjud haqiqiy a’zolar ishtirokida o‘tkazilgan saylovda o‘zbek olimi ana shunday yuksak etirofga sazovor bo‘ldi. Ya’ni o‘zbekistonlik matematik olim, Fanlar akademiyasi Matematika instituti yetakchi ilmiy xodimi, fizika-matematika fanlari doktori, professor O‘tkir Roziqov ilmiy tuzilmaning a’zosi etib saylandi. Bundan tashqari saylovda ushbu ilmiy tuzilma tarkibiga dunyoning 24 mamlakatidan 55 nafar yangi a’zo qabul qilindi.Bugungi kunga qadar O‘zbekiston olimlaridan uch nafari ushbu tuzilma a’zoligiga saylangan edi. O‘tkir Roziqov to‘rtinchisi bo‘ldi. Olim dunyoning o‘nlab mamlakatlaridan takliflar olib, ularning oliygohlarida ma’ruzalar o‘qimoqda. U.Roziqovning 202 ta ilmiy ishlaridan 125 tasi chet elning nufuzli jurnallarida, 23 tasi respublikamizdagi jurnallarda, chop etilgan. Uning 404 betlik monografiyasi esa dunyoning 200 dan ortiq universitet va ilmiy markazlari kutubxonalaridan o‘rin olgan.Ayni kunda ilmiy natijalari jahon miqyosida e’tirof etilgan, iqtidorli olim O‘tkir Roziqov Buxoro davlat universitetining Matematika kafedrasi taklifiga ko‘ra 5-noyabrdan 17-noyabrga qadar o‘z ma’ruzalari bilan pedagog o‘qituvchilar bilim saviyasini boyitishga beminnat yordam bermoqda.Biz yuksak salohiyat egasi, fizika-matematika fanlari doktori, professor O‘tkir Roziqovga Hormang ustoz-deb qolamiz. BuxDU matbuot kotibi,Mannon Otaboy
