About approval of the Situation on the procedure for formation and maintaining the Register of Human Life and Health Factors

24.02.2025

O‘zbekiston Respublikasi Vazirlar Mahkamasining qarori

Inson hayoti va sog‘lig‘iga yuqori xavf soluvchi omillar reyestrini shakllantirish va yuritish tartibi to‘g‘risidagi nizomni tasdiqlash haqida

O‘zbekiston Respublikasi Prezidentining “O‘zbekiston Respublikasi Prezidentining tadbirkorlar bilan to‘rtinchi ochiq muloqotida belgilangan vazifalarni amalga oshirish chora-tadbirlari to‘g‘risida” 2024-yil 30-avgustdagi PF-132-son Farmoni ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “O‘zbekiston Respublikasi Prezidentining tadbirkorlar bilan to‘rtinchi ochiq muloqotida belgilangan vazifalarni amalga oshirish chora-tadbirlari to‘g‘risida” 2024-yil 30-avgustdagi PF-132-son Farmoniga muvofiq:

Inson hayoti va sog‘lig‘iga yuqori xavf soluvchi omillar reyestrini (keyingi o‘rinlarda — Reyestr) joriy qilish, uning lozim darajada (dolzarb) va barcha uchun ochiq holatda yuritilishini ta’minlash;

nazorat qiluvchi organlar tomonidan tadbirkorlik subyektlari faoliyatini to‘xtatib turishga faqatgina Reyestrga kiritilgan omillar asosida yo‘l qo‘yilishi (sud tartibida va qonunda belgilanadigan asoslar bo‘yicha to‘xtatib turish holatlari bundan mustasno) belgilanganligi ma’lumot uchun qabul qilinsin.

2. Quyidagilarni nazarda tutuvchi Inson hayoti va sog‘lig‘iga yuqori xavf soluvchi omillar reyestrini shakllantirish va yuritish tartibi to‘g‘risidagi nizom 1-ilovaga muvofiq tasdiqlansin:

Reyestrni shakllantirish va yuritish tartibi hamda uning maqsadi;

Reyestrning namunaviy shakli hamda unda e’lon qilib boriladigan ma’lumotlarning turlari;

Reyestrdagi inson hayoti va sog‘lig‘iga yuqori xavf soluvchi omillar ro‘yxatini yangilab borishga doir talablar;

inson hayoti va sog‘lig‘iga xavf soluvchi omillarning xavflilik darajasini hisoblash hamda ularni baholashga oid uslubiyot;

nazorat qiluvchi organlarning Reyestr talablariga rioya etilishini nazorat qilishiga oid qoidalar;

nazorat qiluvchi organlar tomonidan Reyestrga inson hayoti va sog‘lig‘iga yuqori xavf soluvchi omillarni kiritish hamda undan chiqarish bo‘yicha takliflarni taqdim etish va ko‘rib chiqish tartibi.

3. Mazkur qarorga 2-ilovada nazarda tutilgan nazorat qiluvchi organlar ikki oy muddatda tegishliligi bo‘yicha Reyestrga kiritiladigan tadbirkorlik subyektlari faoliyatidagi inson hayoti va sog‘lig‘iga yuqori xavf soluvchi omillarni o‘z ichiga olgan idoraviy normativ-huquqiy hujjatlarni belgilangan tartibda O‘zbekiston Respublikasi Adliya vazirligiga davlat ro‘yxatidan o‘tkazish uchun kiritsin.

Bunda Reyestrga kiritiladigan tadbirkorlik subyektlari faoliyatidagi inson hayoti va sog‘lig‘iga yuqori xavf soluvchi omillarni o‘z ichiga olgan idoraviy normativ-huquqiy hujjatlar davlat ro‘yxatidan o‘tkazilgunga qadar tadbirkorlik subyektlari faoliyatini faqatgina nazorat qiluvchi organlar tomonidan O‘zbekiston Respublikasi Adliya vazirligiga taqdim etilgan va Vazirlikning rasmiy veb-saytida e’lon qilingan inson hayoti va sog‘lig‘iga yuqori xavf soluvchi omillar asosida to‘xtatib turishga yo‘l qo‘yiladi.

O‘zbekiston Respublikasi Adliya vazirligi taqdim etilgan tadbirkorlik subyektlari faoliyatidagi inson hayoti va sog‘lig‘iga yuqori xavf soluvchi omillarni o‘z ichiga olgan idoraviy normativ-huquqiy hujjatlarni ishlab chiqishda har tomonlama yordam ko‘rsatsin hamda o‘n besh kun muddatda ularning huquqiy ekspertiza va davlat ro‘yxatidan o‘tkazilishini ta’minlasin.

4. Belgilab qo‘yilsinki:

inson hayoti va sog‘lig‘iga yuqori xavf soluvchi omillarni Reyestrga kiritish hamda (yoki) undan chiqarish O‘zbekiston Respublikasi Adliya vazirligi tomonidan respublika darajasidagi nazorat qiluvchi organlarning idoraviy normativ-huquqiy hujjatlarini davlat ro‘yxatidan o‘tkazish orqali amalga oshiriladi;

nazorat qiluvchi organlar doimiy ravishda tadbirkorlik subyektlari faoliyatidagi inson hayoti va sog‘lig‘iga yuqori xavf soluvchi omillarni Reyestrga kiritish yoki o‘z ahamiyatini (dolzarbligini) yo‘qotgan omillarni Reyestrdan chiqarish to‘g‘risida O‘zbekiston Respublikasi Adliya vazirligiga takliflar taqdim etib boradi, bunda ma’lumotlarning asoslanganligi, ishonchliligi uchun ma’lumotni kiritayotgan idoralarning birinchi rahbarlariga shaxsiy mas’uliyat yuklanadi;

inson hayoti va sog‘lig‘iga yuqori xavf soluvchi omillarni o‘z ichiga olgan idoraviy normativ-huquqiy hujjatlar bo‘yicha O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil va O‘zbekiston Respublikasi Savdo-sanoat palatasining xulosalari majburiy tartibda olinadi;

O‘zbekiston Respublikasi Adliya vazirligi Reyestr lozim darajada (dolzarb) va barcha uchun ochiq holatda yuritilishini ta’minlaydi;

Reyestrni ishlab chiqish va ishga tushirish, unga texnik xizmat ko‘rsatish va uni qo‘llab-quvvatlash, shuningdek, uning funksional imkoniyatlarini yanada takomillashtirish bilan bog‘liq xarajatlar budjetdan tashqari Adliya organlari va muassasalarini rivojlantirish jamg‘armasi mablag‘lari hisobidan moliyalashtiriladi.

5. O‘zbekiston Respublikasi Adliya vazirligi O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil va Raqamli texnologiyalar vazirligi bilan birgalikda:

bir oy muddatda Reyestr “Yagona davlat nazorati” axborot tizimida yuritilishi bo‘yicha texnik imkoniyatlarning joriy etilishini;

zaruratga ko‘ra Reyestrning O‘zbekiston Respublikasi qonunchilik ma’lumotlari milliy bazasi va boshqa axborot tizimlari bilan integratsiya qilinishini ta’minlasin.

6. O‘zbekiston Respublikasi Adliya vazirligi manfaatdor vazirliklar va idoralar bilan birgalikda ikki oy muddatda o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

7. Mazkur qarorning bajarilishini nazorat qilish O‘zbekiston Respublikasi adliya vaziri A.D. Tashkulov zimmasiga yuklansin.

O‘zbekiston Respublikasining Bosh vaziri A. ARIPOV

Inson hayoti va sog‘lig‘iga yuqori xavf soluvchi omillar reyestrini shakllantirish va yuritish tartibi to‘g‘risida

NIZOM

1-bob. Umumiy qoidalar

1. Ushbu Nizom Inson hayoti va sog‘lig‘iga yuqori xavf soluvchi omillar reyestrini shakllantirish va yuritish tartibini belgilaydi.

2. Inson hayoti va sog‘lig‘iga yuqori xavf soluvchi omillar reyestri O‘zbekiston Respublikasi Adliya vazirligi tomonidan “Yagona davlat nazorati” axborot tizimida barcha uchun ochiq holda ushbu Nizomga 1-ilovada nazarda tutilgan shaklda yuritiladi.

3. Inson hayoti va sog‘lig‘iga yuqori xavf soluvchi omillar reyestriga inson hayoti va sog‘lig‘iga yuqori xavf soluvchi omillarni kiritish hamda undan chiqarish idoraviy normativ-huquqiy hujjatni qabul qilish vakolatiga ega nazorat qiluvchi organlarning (keyingi o‘rinlarda — nazorat qiluvchi organlar) buyrug‘iga (qaroriga) asosan O‘zbekiston Respublikasi Adliya vazirligi tomonidan amalga oshiriladi.

4. O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakilning (keyingi o‘rinlarda — Vakil) hamda O‘zbekiston Respublikasi Savdo-sanoat palatasining (keyingi o‘rinlarda — Palata) xulosalari olinmagan inson hayoti va sog‘lig‘iga yuqori xavf soluvchi omillarni o‘z ichiga olgan idoraviy normativ-huquqiy hujjatlar Adliya vazirligi tomonidan ko‘rib chiqilmaydi.

5. Ushbu Nizomda quyidagi asosiy tushunchalardan foydalaniladi:

Inson hayoti va sog‘lig‘iga yuqori xavf soluvchi omillar reyestri (keyingi o‘rinlarda — Reyestr) — tadbirkorlik subyektlari faoliyatini nazorat qiluvchi organlar tomonidan to‘xtatib turish uchun asos bo‘ladigan omillar ro‘yxati;

inson hayoti va sog‘lig‘iga yuqori xavf soluvchi omillar — ushbu Nizomga 2-ilovadagi Xavfni baholash va darajasini hisoblash uslubiyotiga muvofiq yuqori xavf darajasiga ega deb topilgan tadbirkorlik subyektlarining faoliyati (harakatlari yoki harakatsizligi) oqibatida insonlarning hayoti va sog‘lig‘iga bevosita xavf tug‘diruvchi omillar;

nazorat qiluvchi organlar — tadbirkorlik subyektlari faoliyatini davlat tomonidan nazorat qilishga qonunchilik hujjatlari bilan vakolat berilgan vazirlik, idora, ularning tizimidagi bo‘linmalar va boshqa tashkilotlar.

6. Reyestrni yuritishning asosiy maqsadlari:

nazorat qiluvchi organlar faoliyatida qonuniylik va oshkoralikni ta’minlash;

tadbirkorlik subyektlarining huquqlari va qonuniy manfaatlarini himoya qilish;

tadbirkorlik subyektlari faoliyatini noqonuniy to‘xtatish holatlarining oldini olish;

davlat tomonidan nazorat qilish tizimining hisobdorligi va shaffofligini ta’minlash hisoblanadi.

7. Nazorat qiluvchi organlarning Reyestrni shakllantirish va yuritish sohasiga oid faoliyati O‘zbekiston Respublikasi Adliya vazirligi tomonidan Vakil bilan birgalikda uslubiy ta’minlanadi hamda muvofiqlashtiriladi.

2-bob. Reyestrni shakllantirish va yuritish

8. Reyestrni shakllantirish va yuritish nazorat qiluvchi organlar tomonidan inson hayoti va sog‘lig‘iga yuqori xavf soluvchi omillar ro‘yxatini tuzish va tasdiqlash, ularni qayta ko‘rib chiqish va yangilab borish, shuningdek, inson hayoti va sog‘lig‘iga yuqori xavf soluvchi takrorlanadigan va dolzarbligini yo‘qotgan omillarni bekor qilish hamda e’lon qilib borish jarayonlarini o‘z ichiga oladi.

9. Reyestr O‘zbekiston Respublikasi Adliya vazirligi tomonidan ushbu Nizom talablariga muvofiq shakllantiriladi va yuritiladi.

10. Reyestr quyidagi ma’lumotlardan tashkil topadi:

inson hayoti va sog‘lig‘iga yuqori xavf soluvchi nazorat sohasi;

inson hayoti va sog‘lig‘iga yuqori xavf soluvchi omillar;

inson hayoti va sog‘lig‘iga yuqori xavf soluvchi omillarni Reyestrga kiritish asoslari;

inson hayoti va sog‘lig‘iga yuqori xavf soluvchi omillar bo‘yicha mas’ul nazorat qiluvchi organlar nomlari.

11. Zaruratga ko‘ra nazorat qiluvchi organlar tomonidan o‘z faoliyat sohasidagi mavjud inson hayoti va sog‘lig‘iga yuqori xavf soluvchi omillarni Reyestrga kiritish yoki Reyestrdan chiqarish bo‘yicha idoraviy normativ-huquqiy hujjat loyihasi ishlab chiqiladi.

12. Idoraviy normativ-huquqiy hujjat loyihasi yuzasidan Vakil va Palataning xulosalari olinadi.

Bunda idoraviy normativ-huquqiy hujjat loyihasi yuzasidan Vakil hamda Palata tomonidan xulosalar ushbu Nizomga 2-ilovadagi Xavfni baholash va darajasini hisoblash uslubiyotiga muvofiq o‘tkazilgan baholash natijalari asosida besh ish kuni ichida beriladi.

13. Nazorat qiluvchi organlarning inson hayoti va sog‘lig‘iga yuqori xavf soluvchi omillarni Reyestrga kiritish yoki Reyestrdan chiqarish bo‘yicha idoraviy normativ-huquqiy hujjat loyihasi Vakil hamda Palata bilan kelishilganidan so‘ng belgilangan tartibda qabul qilinadi hamda huquqiy ekspertiza va davlat ro‘yxatidan o‘tkazish uchun O‘zbekiston Respublikasi Adliya vazirligiga taqdim etiladi.

O‘zbekiston Respublikasi Adliya vazirligi taqdim etilgan tadbirkorlik subyektlari faoliyatidagi inson hayoti va sog‘lig‘iga yuqori xavf soluvchi omillarni o‘z ichiga olgan idoraviy normativ-huquqiy hujjatlarni o‘n besh kun muddatda huquqiy ekspertiza va davlat ro‘yxatidan o‘tkazadi.

14. Idoraviy normativ-huquqiy hujjatga inson hayoti va sog‘lig‘iga yuqori xavf soluvchi omillarning mazmuni, ularni Reyestrga kiritish va (yoki) Reyestrdan chiqarish zarurati, asosliligi va dolzarbliligini tavsiflovchi ma’lumotlar ilova qilinishi lozim.

Taqdim etilgan ma’lumotlarning to‘liqligi va haqqoniyligi uchun idoraviy normativ-huquqiy hujjatni taqdim etgan nazorat qiluvchi organlar javobgar hisoblanadi.

3-bob. Yakunlovchi qoidalar

15. Nazorat qiluvchi organlar tomonidan Reyestrga kiritilmagan inson hayoti va sog‘lig‘iga yuqori xavf soluvchi omillarga ko‘ra tadbirkorlik subyektlarining faoliyatini to‘xtatib turish taqiqlanadi, sud tartibida va qonunda belgilanadigan asoslar bo‘yicha to‘xtatib turish holatlari bundan mustasno.

16. Mazkur Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.

Inson hayoti va sog‘lig‘iga yuqori xavf soluvchi omillar reyestrini shakllantirish va yuritish tartibi to‘g‘risidagi nizomga
1-ILOVA

Inson hayoti va sog‘lig‘iga yuqori xavf soluvchi omillar

REYESTRI

T/r

Inson hayoti va sog‘lig‘iga yuqori xavf soluvchi nazorat sohasi nomi

Inson hayoti va sog‘lig‘iga yuqori xavf soluvchi omillar

(tadbirkorlik faoliyatini to‘xtatib turishga asos bo‘ladigan holatlar)

Mazkur omilning yuqori xavf soluvchi omil etib hisoblanishiga asos

(qonunchilik hujjati va boshqalar)

Nazorat qiluvchi organ nomi

Inson hayoti va sog‘lig‘iga yuqori xavf soluvchi omillar reyestrini shakllantirish va yuritish tartibi to‘g‘risidagi nizomga
2-ILOVA

Xavfni baholash va darajasini hisoblash

USLUBIYOTI

1-bob. Umumiy qoidalar

1. Ushbu Uslubiyot tadbirkorlik subyektlarining faoliyati (harakatlari yoki harakatsizligi) oqibatida inson hayoti va sog‘lig‘iga bevosita xavf soluvchi omillarning darajasini aniqlash va baholash tartibini belgilaydi.

2. Mazkur uslubiyotda quyidagi asosiy tushunchalar qo‘llaniladi:

nazorat qilish darajasi — xavfning qay darajada boshqarilishi, kamaytirilishi mumkinligi yoki xavfning oldi olinishiga qaratilgan choralar ko‘rilganligi darajasi;

oqibatning darajasini baholash — o‘rganilayotgan omil natijasida inson sog‘lig‘i va hayotida vujudga keladigan ehtimoliy oqibatlarning darajasini baholash tartibi;

ta’sir ko‘lami — xavf ta’siri natijasida jabrlanishi mumkin bo‘lgan shaxslar soni;

o‘rganilayotgan omil — nazorat qiluvchi organ tomonidan Inson hayoti va sog‘lig‘iga yuqori xavf soluvchi omillar reyestriga kiritish maqsadida taklif qilingan hamda xavf darajasi baholanayotgan omil;

xavfni baholash — tadbirkorlik subyektlarining faoliyati (harakatlari yoki harakatsizligi) oqibatida insonlar hayoti va sog‘lig‘iga ta’sir etuvchi xavfli hodisaning sodir bo‘lish ehtimolining va oqibatlarining jiddiyligini aniqlash jarayoni;

ehtimollikni baholash — o‘rganilayotgan omil natijasida xavf tug‘diruvchi hodisaning sodir bo‘lish ehtimolini baholash tartibi.

3. Inson hayoti va sog‘lig‘iga xavf soluvchi omillar qat’iy ketma-ketlikda quyidagi bosqichlarda baholanadi:

birinchi bosqich — inson hayoti va sog‘lig‘iga xavf soluvchi omillarni aniqlash;

ikkinchi bosqich — inson hayoti va sog‘lig‘iga xavf soluvchi omillarning xavf darajasini tahlil qilish;

uchinchi bosqich — xavf darajasini baholash.

2-bob. Inson hayoti va sog‘lig‘iga bevosita xavf soluvchi omillarni aniqlash va baholash tartibi

1-§. Inson hayoti va sog‘lig‘iga bevosita xavf soluvchi omillarni aniqlash

3. Nazorat qiluvchi organlar tomonidan inson hayoti va sog‘lig‘i uchun xavf tug‘dirishi mumkin bo‘lgan ehtimoliy omillar aniqlanadi.

Bunda aniqlangan har bir omil to‘liq tavsiflanishi, uning xavf darajasini baholash imkonini beruvchi barcha zarur ma’lumotlar hamda statistika axboroti ko‘rsatilishi lozim.

2-§. Inson hayoti va sog‘lig‘iga bevosita xavf soluvchi omillarning xavf darajasini tahlil qilish

4. Omillarning xavf darajasi quyidagi qadamlarda tahlil qilinadi:

1) birinchi qadam — o‘rganilayotgan omilning yuzaga kelish ehtimolligi baholanadi.

O‘rganilayotgan omilning sodir bo‘lish ehtimoli quyidagi 1-jadvalda belgilangan mos mezonga tushirish orqali baholanadi.

		1-jadval
Ehtimollik darajasi	Tavsif	Baho
Past	Deyarli yuzaga kelmaydi, yuzaga kelish ehtimoli juda past	1
O‘rta	Ma’lum sharoitlarda yuzaga kelishi mumkin	2
Yuqori	Yuzaga kelish ehtimoli yuqori	3
Juda yuqori	Yuzaga kelishi aniq (oldini olish imkoni mavjud emas)	4

2) ikkinchi qadam — o‘rganilayotgan omil oqibatining darajasi baholanadi.

O‘rganilayotgan omilning oqibati darajasi quyidagi 2-jadvalda belgilangan mos mezonga tushirish orqali baholanadi.

		2-jadval
Ta’sir darajasi	Tavsif	Baho
Past	Inson hayoti va sog‘lig‘iga ta’siri juda past (tibbiy aralashuv ehtiyoji mavjud emas)	1
O‘rta	Qisman tibbiy yordamni talab qiladigan yengil jarohatlar yoki sog‘liqdagi muammolarga sabab bo‘ladi	2
Yuqori	Tibbiy aralashuvni talab qiladigan jarohatlar yoki kasalliklarga sabab bo‘ladi	3
Xavfli	Hayot uchun xavf tug‘diradigan yoki asoratli oqibatlarga olib keladigan og‘ir jarohatlarga, nogironlikka yoki o‘limga sabab bo‘lish ehtimoli mavjud	4

3) uchinchi qadam — o‘rganilayotgan omilning ta’sir ko‘lami baholanadi.

O‘rganilayotgan omilning ta’sir ko‘lami quyidagi 3-jadvalda belgilangan mos mezonga tushirish orqali baholanadi.

		3-jadval
Ta’sir ko‘lami	Tavsif	Baho
Individual	Qamrov doirasi bir kishini tashkil qiladi	1
Tor doirada	Qamrov doirasi 2 — 10 kishidan iborat kichik guruhni tashkil qiladi	2
O‘rtacha	Qamrov doirasi katta guruhni tashkil qiladi (11 — 50 kishi)	3
Keng	Qamrov doirasi butun tashkilot yoki jamoani tashkil qiladi (51 va undan ortiq kishi)	4

4) to‘rtinchi qadam — o‘rganilayotgan omil natijasida vujudga kelishi mumkin bo‘lgan xavfni nazorat qilish darajasi baholanadi.

O‘rganilayotgan omilni nazorat qilish darajasi quyidagi 4-jadvalda belgilangan mos mezonga tushirish orqali baholanadi.

		4-jadval
Nazorat qilinish darajasi	Tavsif	Baho
To‘liq nazorat qilinadi	Xavf standart choralar bilan osonlikcha bartaraf etiladi	4
Nazorat qilish imkonsiz	Xavfni amalda nazorat qilish imkoniyati mavjud emas	0

3-§. Xavf darajasini baholash

5. O‘rganilayotgan omilning xavf darajasini o‘lchash uchun ushbu Uslubiyotning 4-bandida belgilangan tartibda to‘plangan ballar quyidagi formula yordamida hisoblanadi:

	X = A + B + M - C
	X = A + B + M - C

Bunda:

A — ehtimollik, B — oqibatning darajasi;

M — ta’sir ko‘lami, C — xavfni nazorat qilish darajasi;

X — omilning xavf darajasi.

6. Omilning inson hayoti va sog‘lig‘i uchun xavf darajasi formula asosida hisoblab chiqarilgan ballning 5-jadvaldagi mos ko‘rsatkichi asosida aniqlanadi.

	5-jadval
Aniqlangan baho	Xavf darajasi
0 — 3	Past
4 — 6	O‘rta
7 — 12	Yuqori

Vazirlar Mahkamasining 2025-yil 6-fevraldagi 66-son qaroriga
2-ILOVA

Nazorat qiluvchi organlarning

RO‘YXATI

T/r	Idoraviy normativ-huquqiy hujjat qabul qiladigan nazorat qiluvchi organlar	Idoraviy normativ-huquqiy hujjat qabul qilish orqali tartibga solinadigan sohalar
1.	Kambag‘allikni qisqartirish va bandlik vazirligi	Vazirlik vakolatiga kiruvchi masalalar
2.	Qurilish va uy-joy kommunal xo‘jaligi vazirligi	Vazirlik vakolatiga kiruvchi masalalar
2.	Qurilish va uy-joy kommunal xo‘jaligi vazirligi	Qurilish va uy-joy kommunal xo‘jaligi sohasida nazorat qilish inspeksiyasi vakolatiga kiruvchi masalalar
3.	Tog‘-kon sanoati va geologiya vazirligi	Tog‘-kon sanoati va geologiya sohasini nazorat qilish inspeksiyasi vakolatiga kiruvchi masalalar
4.	Favqulodda vaziyatlar vazirligi	Vazirlik vakolatiga kiruvchi masalalar
5.	Ekologiya, atrof-muhitni muhofaza qilish va iqlim o‘zgarishi vazirligi	Vazirlik vakolatiga kiruvchi masalalar
6.	Qishloq xo‘jaligi vazirligi	Vazirlik vakolatiga kiruvchi masalalar
		Veterinariya va chorvachilikni rivojlantirish qo‘mitasi vakolatiga kiruvchi masalalar
		O‘simliklar karantini va himoyasi agentligi vakolatiga kiruvchi masalalar
7.	Sog‘liqni saqlash vazirligi	Sanitariya-epidemiologik osoyishtalik va jamoat salomatligi qo‘mitasi vakolatiga kiruvchi masalalar
7.	Sog‘liqni saqlash vazirligi	“Farmatsevtika mahsulotlari xavfsizligi markazi” davlat muassasasi vakolatiga kiruvchi masalalar
8.	Transport vazirligi	Fuqaro aviatsiyasi agentligi vakolatiga kiruvchi masalalar
8.	Transport vazirligi	Transport nazorati inspeksiyasi vakolatiga kiruvchi masalalar
9.	Iqtisodiyot va moliya vazirligi	Davlat asillik darajasi nazorati inspeksiyasi vakolatiga kiruvchi masalalar
9.	Iqtisodiyot va moliya vazirligi	Bojxona qo‘mitasi vakolatiga kiruvchi masalalar
10.	Raqamli texnologiyalar vazirligi	Axborotlashtirish va telekommunikatsiyalar sohasida nazorat inspeksiyasi vakolatiga kiruvchi masalalar
11.	Suv xo‘jaligi vazirligi	Suv xo‘jaligi obyektlari xavfsizligini va suvdan foydalanishni nazorat qilish inspeksiyasi vakolatiga kiruvchi masalalar
12.	Ichki ishlar vazirligi	Vazirlik vakolatiga kiruvchi masalalar
13.	Maktabgacha va maktab ta’limi vazirligi	Vazirlik vakolatiga kiruvchi masalalar
14.	Sanoat, radiatsiya va yadro xavfsizligi qo‘mitasi	Qo‘mita vakolatiga kiruvchi masalalar
15.	O‘zbekiston texnik jihatdan tartibga solish agentligi	Agentlik vakolatiga kiruvchi masalalar
16.	Elektr energiyasi, neft mahsulotlari va gazdan foydalanishni nazorat qilish inspeksiyasi	Inspeksiya vakolatiga kiruvchi masalalar

(Qonunchilik ma’lumotlari milliy bazasi, 13.02.2025-y., 09/25/66/0140-son)

Announcements

About approval of the Situation on the procedure for formation and maintaining the Register of Human Life and Health Factors

Resources