27.12.2025

Buxoro davlat universitetida raqamli ta’lim texnologiyalarini joriy etish va rivojlantirish bugungi kunda ta’lim jarayonining ajralmas qismi sifatida alohida ahamiyat kasb etmoqda. Shu maqsadda tashkil etilgan Raqamli ta’lim texnologiyalari departamenti universitetda raqamli infratuzilmani rivojlantirish, o‘quv jarayonini zamonaviy texnologiyalar bilan ta’minlash, professor-o‘qituvchilar va talabalarning raqamli savodxonligini oshirish yo‘nalishlarida samarali faoliyat yuritmoqda.

Departamentning asosiy vazifalaridan biri - ta’lim jarayonida axborot-kommunikatsiya texnologiyalaridan keng foydalanish, elektron ta’lim platformalarini ishlab chiqish va joriy etish, o‘quv resurslarini raqamlashtirish, shuningdek, universitetning rasmiy veb-sayti va elektron ma’lumot tizimlarini muntazam yangilab va takomillashtirib borishdan iboratdir.

Bugungi kunda bo‘lim professor-o‘qituvchilar va talabalar uchun onlayn kurslar, virtual laboratoriyalar, masofaviy ta’lim tizimlari, elektron kutubxona kabi bir qator innovatsion xizmatlarni amalga oshirib, ta’lim sifatini oshirishga xizmat qilmoqda. Departament zamonaviy texnologiyalar asosida raqamli xavfsizlikni ta’minlash, kiberxavfsizlik madaniyatini shakllantirish va texnik yordam ko‘rsatish ishlarini ham olib boradi.

Raqamli ta’lim texnologiyalari departamenti o‘z faoliyatida ilg‘or xorijiy tajribalarni o‘rganish, xalqaro hamkorlik aloqalarini rivojlantirish va yangi loyihalarni amalga oshirish orqali universitetni raqamli transformatsiya jarayonida yetakchi o‘ringa olib chiqishga intilmoqda.

Axborot texnologiyalari markazi O'zbekiston Respublikasi Vazirlar Mahkamasining 2001-yil 23- maydagi “2001-2005 yillarda kompyuter va axborot texnologiyalarini rivojlantirish, “Internet”ning xalqaro axborot tizimlariga keng kirib borishni ta’minlash dasturini ishlab chiqishni tashkil etish chora-tadbirlari to‘g‘risida” gi 230-sonli Qarori hamda O'zbekiston Respublikasi Oliy va o‘rta maxsus ta’lim vazirligining 2001-yil 25-yanvardagi “OО‘MTV ta’lim muassasalarida Axborot texnologiyalari va masofadan о‘qitish markazlari tashkil etish tо‘g‘risida” 23-son buyrug‘i bilan tashkil etilgan. 2021-yilda markaz “Raqamli ta'lim texnologiyalari markazi” sifatida qayta tashkil etildi va 2022-yilda uning faoliyati kengaytirilishi natijasida ushbu tuzilma “Raqamli ta'lim texnologiyalari departamenti” maqomiga ega bo‘ldi. Raqamli ta'lim texnologiyalari departamenti zamonaviy axborot-kommunikatsiya texnologiyalarini joriy etish, ta’lim jarayonini raqamlashtirish va universitet infratuzilmasining axborot xavfsizligini ta’minlashga mas’ul bo‘lim hisoblanadi. Departamentning asosiy maqsadi universitet faoliyatida raqamli texnologiyalarni samarali qo‘llash, axborot resurslarining xavfsizligi va barqaror ishlashini ta’minlash hamda elektron ta’lim tizimlarini rivojlantirishdir.

1. Dastlabki shakllanish davri (2001–2006). Soxibov Tolib Fayzullayevich Axborot texnologiyalar markazini tashkil etish va uning asosiy yo‘nalishlarini belgilashga o‘z hissasini qo‘shgan. Ushbu davrda ta’lim jarayoniga dastlabki kompyuterlashtirish usullari joriy etilib, o‘quvchi va o‘qituvchilar uchun axborot texnologiyalaridan foydalanish ko‘nikmalarini shakllantirishga alohida e’tibor qaratilgan. Markazning tashkiliy bazasi va texnik infratuzilmasi aynan shu davrda yaratilganligi bilan ahamiyatlidir.

2. O‘tish davri va optimallashtirish bosqichi (2006–2007). Xoliqova Ruxsora Narzullayevna qisqa muddat ichida Axborot texnologiyalar markaz faoliyatini texnik imkoniyatlar jihatidan optimallashtirishga va mavjud resurslardan samarali foydalanishga urg‘u bergan. U davrda axborot-resurs markazlari bilan o‘zaro hamkorlikni yo‘lga qo‘yish, kompyuter sinflari ishini takomillashtirish kabi vazifalar amalga oshirilgan.

  3. Texnologik modernizatsiya bosqichi (2007–2010). Murodov Shuxrat Mustafoyevich rahbarligida ta’lim jarayonida elektron resurslar ulushini oshirish, masofaviy ta’lim elementlarini sinov tariqasida joriy qilish ishlari boshlangan. Markazning texnik quvvatlari yangilangan, o‘quv jarayonini kompyuter tarmoqlari orqali boshqarish imkoniyatlari kengaytirilgan.

  4. Innovatsion uslublarni joriy etish davri (2010–2011). Jo‘rayev Zarif Sharipovich qisqa muddat ichida elektron ta’lim kontentini ishlab chiqish va uni ta’lim jarayoniga tatbiq etishning tashkiliy asoslarini mustahkamlashga harakat qilgan. Shu bilan birga, o‘qituvchilarning AKT sohasidagi malakasini oshirish kurslari tashkil etilgan.

  5. Rivojlanishning sifat bosqichi (2011–2013). Eshonqulov Xamza Ilhomovich rahbarlik qilgan yillarda Axborot texnologiyalar markazi faoliyatida sifat ko‘rsatkichlarini oshirish, yangi pedagogik texnologiyalarni AKT vositalari bilan uyg‘unlashtirish bo‘yicha tizimli ishlar amalga oshirilgan. Bu davrda onlayn test tizimlari va masofaviy monitoring mexanizmlari shakllangan.

  6. Yangi tashabbuslarni izlash bosqichi (2013–2014). Shafiyev Tursun Rustamovich davrida markazda yangi tashabbuslar izlanib, o‘quv jarayonida innovatsion dasturiy yechimlarni sinovdan o‘tkazish yo‘lga qo‘yilgan. Bu yondashuvlar keyingi islohotlar uchun zamin yaratgan.

  7. Rivojlanishning barqaror va transformatsion davri. Xusenov Murodjon Zoxirovich 2014 yildan hozirgi kungacha departament rahbari sifatida faoliyat yuritib kelmoqda. Ushbu davr departament tarixida eng samarali va barqaror rivojlanish davri sifatida ajralib turadi. Xusenov Murodjon Zoxirovich boshchiligida:

• raqamli ta’lim platformalari kengaytirildi;
• moddiy texnik baza kengaytirildi;
• elektron resurslar fondi boyitildi;
• masofaviy ta’lim texnologiyalari butun o‘quv jarayoniga integratsiya qilindi;
• talabalarning raqamli kompetensiyalarini oshirishga alohida e’tibor qaratildi;
• xalqaro tajriba va ilg‘or texnologiyalarni joriy etish bo‘yicha qator loyihalar amalga oshirildi.

Hozirgi davrda oliy ta’lim tizimini raqamlashtirish va sifatli ta’lim xizmatlarini ta’minlash oliy ta’lim muassasalari oldida turgan ustuvor vazifalardan biri hisoblanadi. Ta’lim jarayonining samaradorligini oshirish hamda raqobatbardosh kadrlar tayyorlash maqsadida universitet miqyosida keng ko‘lamli axborot-kommunikatsiya texnologiyalari joriy etilgan. Jumladan, ta’lim faoliyatini texnik qo‘llab-quvvatlash uchun jami 1691 dona kompyuter texnikalari foydalanilmoqda. Bular tarkibida 14 ta server kompyuteri, 1031 ta monoblok, 109 ta noutbuk va 537 ta an’anaviy kompyuter qurilmalari mavjud bo‘lib, ular o‘quv jarayonining markazlashtirilgan va individual bosqichlarida faol xizmat qilmoqda.

Shuningdek, ta’lim jarayonini zamonaviy raqamli muhitga integratsiyalash maqsadida o‘quv auditoriyalarida bir qator ilg‘or texnologik vositalar o‘rnatilgan. Jumladan, 56 ta planshet, 286 ta printer, 31 ta interaktiv doska, 31 ta interaktiv panel, 2 ta infokiosk, 5 ta elektron minbar (e-minbar) va 26 ta videokonferensiya qurilmasi ta’lim jarayonini interaktiv va masofaviy shakllarda tashkil etishda muhim rol o‘ynamoqda. Ayniqsa, 141 ta videoproyektor yordamida darslarni vizual va multimedia vositalari asosida olib borish imkoniyati sezilarli darajada oshgan.