Haqiqiy hayot kishining chehrasidan, ayniqsa, ko’zlaridan ravshan ko’rinib turadi... Zamondoshlarim chehralaridagi mamnunlikni, ko’zlaridagi masrurlikni, tillaridagi shukronalikni ko’rib yugarim g’ururga to’ladi. Boisi, yurtimizda eng buyuk xilq’at deb atalgan INSON va uning manfaatlari barcha narsadan ustun. Shularni o’ylab yuragim yana shukronalik hissiga to’ladi.
Atrofga boqaman, yurtdoshlarim yaratish va yashnatish ishtiyoqi bilan band. Xalqim birlik va ittifoqni, hamjihatlikni yaxshi ko’radi. Bir-birini qo’llab-qo’ltiqlaydi, bir-biriga yaxshilikni ilinadi, og’ir kunlarida yordam qo’lini cho’zadi. Mana shunday xalq bilan yelkadosh va vatandosh bo’lishning o’zi bir baxt emas-mi!? Shu Vatan tuprog’ida tug’ilganimga yana bir bor shukrona keltiraman...
Bugungi kunda dunyoning ayrim hududlarida mafkuraviy xurujlar natijasida katta ma’naviy yo’qotishlar yuz berayotgani, millatning asriy qadriyatlari, milliy tafakkuri va turmush tarzi izdan chiqayotgani, axloq-odob, oila va jamiyat hayoti jiddiy xavf ostida qolayotganini sir emas. Bunday tajovuzkorona harakatlar bizlar uchun mutlaqo begona. Menga yelkadosh bo’lganlar esa bu dunyoda halol va pok yashashni o’zi uchun hayotiy e’tiqod, oliy maqsad deb biladigan odamlardir. Yurtimda kurashdan qo’rqmay, o’z kuch-g’ayratini jamiyat taraqqiyoti yo’nalishiga muvofiqlashtirib olib boradiganlar ko’pchilikni tashkil qiladi. Demak, Vatanim, avlodlarim taqdiri ishonchli qo’llarda. Qalbimdagi xotirjamlik va shukronalik hislarini so’z bilan ifodalashga ojizman...
MUSTAQILLIK – eng ulug’ va ezgu g’oya. Har bir xalqning tarixi shu xalqdan yetishib chiqqan buyuk siymolar, mard qahramonlar va fidoyi insonlar tarixi asosida bitiladi. Istiqlol tufayli xalqimizning Imom Buxoroiy, Imom at -Termiziy, Muqanna, Temur Malik, Jaloliddin Manguberdi, Amir Temur kabi mard farzandlari nomlari qayta tiklandi,ular qoldirgan ma’naviy meros keng targ’ib qilindi.
Insoniyat tarixini ma’naviyatsiz tasavvur qilib bo’lmaydi. Ma’naviyat xalqning, jamiyat va davlatning buyuk boyligi va kuch-qudrat manbai ekanini, bu hayotda ma’naviyatsiz hech qachon odamiylik va mehr-oqibat, baxt va saodat bo’lmasligini yaqqol tasdiqlaydi. Shu bois, Mustaqillikning ilk kunlaridanoq ma’naviy ildizlarimizni o’rganish va targ’ib qilish davlatimiz siyosatining ustivor maqsadiga aylandi. Istiqlol tuhfa etgan ana shunday imkoniyatlardan oqilona foydalanishga harakat qilib, ma’naviy merosimizni o’rganishga qo’l urdim. Ulug’ shoir, millatimiz faxri Alisher Navoiy ijodini ilohiy-irfoniy manbalar asosida tahlil qilishga kirishdim. Boisi, sobiq sho’ro davrida shior asarlari o’zining asl manbalaridan ayri holda o’rganildi, asarlari mavjud tuzum mafkurasiga moslashtirildi. Mutafakkir shoirning “Nazm ul-javohir” asarini ilohiy - irfoniy manbalar – Qur’on va Hadislar bilan qiyosiy o’rganishim ham Istiqlol samarasidir.
Faoliyatim davomida xalqimiz qoldirgan ma’naviy merosni targ’ib qilish, ularni yoshlarimiz qalbi va ongiga singdirishga harakat qildim. 70 yaqin ilmiy, ilmiy -ommabop maqolalarim, “Navoiyning she’riy durdonasi” kitobim hamda o’quv-usuliy qo’llanmalarimda shu jihatga e’tibor qaratdim. Boisi, jamiyatdagi insonlar qanchalik ma’rifatli, ma’naviyatli bo’lsa, ularning o’z vataniga shunchalik ko’p foydasi tegadi.
Ma’naviyatning yana bir muhim xususiyati, odamning ichki dunyosi va irodasini baquvvat, iymon-e’tiqodini butun qilishida yorqin namoyon bo’ladi. Istiqlol tuhfa imkoniyatlardan foydalangan holda buyuk tarix, madaniyat va ma’naviyat egasi bo’lgan xalqimning bir farzandi sifatida, ana shu bebaho boylikni asrab-avaylash, yosh avlodlarim qalbida Vatanga muhabbat, o’z ona xalqiga sadoqatni tarbiyalashga, ular qalbida tarix va adabiyotga, o’z ona tiliga hurmatni shakllantirishga o’z hissamni qo’shish oliy maqsadimdir. Insoniyat orzularining ro’yobga chiqishini chin ko’ngildan istamoq va qo’ldan kelgancha, bunga ko’maklashmoqni INSONIYLIK burchim deb hisoblayman. Zero, Hazrat Alisher Navoiy ta’kidlaganlaridek:
Davron elining jismida ham jon bo’lg’il,
Ham jonlarig’a moyai darmon bo’lg’il.
Ma’rifat Rajabova,
filologiya fanlari nomzodi, dotsent
