Buxoro davlat universitetida ta’lim sifatini ta’minlash va talabalar bilimini baholashda xolislik tamoyillarini qaror toptirish maqsadida yakuniy nazorat jarayonlari yuqori saviyada tashkil etilmoqda. Oliygohda “Korrupsiyasiz soha” tamoyilini hayotga tatbiq etish yo‘lida amalga oshirilayotgan chora-tadbirlar har bir yoshning o‘z bilimi bilan munosib natijaga erishishi uchun mustahkam poydevor bo‘lmoqda.
Nazorat jarayonlarining shaffofligini ta’minlashda korrupsiyaga qarshi kurashish “Komplaens-nazorat” tizimining o‘rni beqiyos. Bugun har bir fakultetda imtihon daftarlarini muhrlash, shifrlash va tekshirish ishlari zamonaviy videokuzatuv moslamalari bilan jihozlangan maxsus xonalarda amalga oshirilmoqda. Bu tizim inson omilini kamaytirib, har qanday qonunbuzarlik va manfaatlar to‘qnashuvining oldini olishga xizmat qiladi.
Universitetda tuzilgan maxsus ishchi guruhlar jarayonni bevosita nazorat qilib, talabalarning o‘zlashtirish ko‘rsatkichlarini adolatli baholashni muvofiqlashtirmoqda. Shuningdek, professor-o‘qituvchilar orasida “Odob-axloq kodeksi” talablariga rioya etish yuzasidan profilaktik tushuntirish ishlari olib borilib, har bir xodim zimmasiga yuksak ma’naviy va huquqiy mas’uliyat yuklangan.
