Mustaqil O'zbekistonning porloq kelajagini ta'minlash uchun teran fikrli, ham jismonan, ham ma'naviy jihatdan yetuk va barkamol avlodni tarbiyalash va voyaga yetkazish davlat siyosatining bosh masalasidir. Mamlakatimizda yoshlarni kamol toptirish, ularning qalbida milliy g'oya, milliy mafkura, Vatanni anglash, umumbashariy qadriyatlar ruhida tarbiyalash masalalariga katta e'tibor berilmoqda. Bu davlat siyosatining asosiy, ulug'vor yo'nalishlaridan biriga aylanib bormoqda. Inson shaxs bo'lib shakllanishi uchun u avvalo jismoniy chiniqqan, aqliy barkamol, ong va tafakkuri shakllangan, ma'naviy yetuk, dunyoqarashi keng, jamiyat taraqqiyotida faol qatnashadigan, inson hayotida uchraydigan ba'zi noaxloqiy hatti-harakatlaridan (ichish, chekish, narkotik moddalar iste'mol qilish, jinoyatchilik va h.k) xoli, ularga nisbatan murosasiz bo'lmog'i lozim. Barkamol avlod tarbiyasi milliy hamda umuminsoniy xarakterga ega bo'lib, u barqaror va barkamol jamiyat asosidir. Shu sababli insoniyat paydo bo'lgandan boshlab shu kungacha u jamiyatda mavjud barcha institut va fuqarolar oldida turgan dolzarb masala bo'lib kelmoqda. O'zbekistonda mustaqillik yillarida jismoniy va ma'naviy barkamol avlod tarbiyasi masalasi davlat siyosatining ustuvor yo'nalishlaridan biriga aylandi. Ushbu keltirilganlarni inobatga olib, 2017 yilning 14 aprel kuni Buxoro davlat universiteti Fizika-matematika fakultetining ma'naviy-ma'rifiy ishlar rejasiga asosan fakultet talabalari o'rtasida “Turnikka tortilish” sport musobaqasi o'tkazildi. Fakultetning mas'ul rahbarlari, Matematika kafedrasi dotsent va o'qituvchilari hamda barcha yo'nalishlar sardorlari ishtirokida musobaqa dasturi ishlab chiqildi hamda tasdiqlandi. Musobaqada fakultetning 3 ta yo'nalishida tahsil olayotgan talabalar ishtirok etishdi. Musobaqa natijalariga ko'ra Matematika ta'lim yo'nalishi 2-bosqich talabasi Shukurov Farxod 1-o'rinni, Kasb ta'limi (informatika va axborot texnologiyalari) ta'lim yo'nalishi 1-bosqich talabasi Ikromov Shaxzod 2 - o'rinni, Matematika ta'lim yo'nalishi 1-bosqich talabasi Odinayev Rashid 3-o'rinni egalladi. Musobaqaning yopilish marosimida g'olib talabalar faxriy yorliq va estalik sovg'alari bilan taqdirlandi.
