O‘zbek va turkman xalqlarining tarixi va madaniyati mushtarak, urf-odat va an‘analari o‘xshash. Ajdodlarimizning ilmiy-ijodiy merosi xalqlarimizning umumiy mulkiga aylangan. Bu yaqinlik madaniy-gumanitar sohadagi aloqalar rivojigi mustahkam asos bo‘lmoqda. Ilm-fan sohasidagi hamkorlik ham yildan-yilga yuksalayotir.Buni viloyatimizdagi oliy va o‘rta maxsus, kasb-hunar ta‘limi muassasalarida qardosh xalqning ko‘plab yigit-qizlari o‘qiyotganida ham ko‘rish mumkin. Buxoro davlat universiteti filologiya fakulьteti talabalari turar joyida buyuk bobokalonimiz Alisher Navoiy tavalludining 577 yilligiga bag‘ishlangan madaniy-ma‘rifiy tadbir o‘tkazildi. Tadbir doirasida namoyish qilingan sahna ko‘rinishida Alisher Navoiy rolini turkmanistonlik Gadam Allaberenov ijro etdi. Garchi so‘z talaffuzida andak farq sezilib tursa-da, ijro ajoyib chiqdi. Gadam aktyor emas, balki universitetda ingliz tili ta‘limi yo‘nalishining uchinchi bosqich talabasi.- Turkmanistonda ham bilim olib, tegishli mutaxassislikni egallash uchun keng imkoniyatlar yaratilgan, - deydi u.- Lekin yoshlarimiz orasida qo‘shni O‘zbekistonda, jumladan, Buxoro viloyati o‘quv yurtlarida ta‘lim olish istagini bildiruvchilar ham bor. Uch yildan buyon o‘zbek tengdoshlarim bilan bir guruhda ta‘lim olaman. Auditoriyaga kirishim bilan, kursdoshlarim ana, o‘zimizning Qadamboy keldi, deyishadi. Ular Navoiy hazratlarini qanchalik yaxshi ko‘rsalar, bizning Maxtumqulini ham shunchalik aziz biladilar. Turkmanning ulkan shoiri ham o‘z vaqtida Buxoro madrasalarida ta‘lim olib, Navoiy she‘riyatidan ilhomlangan.Darvoqe, Buxoro davlat universitetida Gadam singari yana 32 nafar turkmanistonlik yigit-qiz tahsil olmoqda.-Turkmanistonlik yoshlar nafaqat ta‘limda, balki turli madaniy tadbirlarda ham faol,-deydi universitetning ma‘naviy-ma‘rifiy masalalar bo‘yicha prorektori Orif Qodirov. – Kuni-kecha ular ishtirokida O‘zbekiston – Turkmaniston do‘stligiga bag‘ishlangan katta festivalь o‘tkazdik. Bu kabi tadbirlar bir-birimizga qanchalik yaqin ekanligimizni, bizni azaliy qardoshlik rishtalari bog‘lab turganini anglashga xizmat qiladi.O‘zbekiston va Turkmaniston o‘rtasida rivojlanib borayotgan hamkorlik ta‘lim sohasida ham to‘la namoyon bo‘lmoqda. Qo‘shni mamlakatdan bilim va kasb egallagani kelayotgan yoshlar safi kengayib borayotir. Ayi paytda Buxoro davlat universiteti, tibbiyot, muhandislik-texnologiya institutlari, 5 ta kasb-hunar kollejida 600 nafarga yaqin turkmanistonlik talaba va o‘quvchi ta‘lim olmoqda.Buxoro davlat tibbiyot institutida tahsil olayotgan xorijlik talabalarning 18 nafari turkmanistonlikdir. Gulyalek Annasayidova ulardan biri.- Jahon tibbiyot ilmining bobokaloni bo‘lgan Abu Ali ibn Sino yurtida ta‘lim olayotganimdan baxtiyorman,-deydi davolash fakulьteti birinchi bosqich talabasi bo‘lgan qiz. – Bu yerda zamonaviy bilim olishimiz uchun barcha qulayliklar yaratilgan. Niyatim – kelajakda yaxshi mutaxassis bo‘lib, o‘zim tug‘ilib-o‘sgan Lebap viloyati aholisi sog‘ligi yo‘lida xizmat qilish.Mazkur ta‘lim dargohini joriy o‘quv yilida turkmanistonlik uch nafar yigit-qiz tugatadi. Ular o‘qishni shu yerda, magistraturada davom ettirishadi.Buxoro tibbiyot kollejini tugatayotgan Ajab Rozimuradova esa hamyurti Gulyalekka havas qilib, yozda o‘qishga kirish uchun hujjatlarini Buxoro davlat tibbiyot institutiga topshirmoqchi.Aytgancha, viloyatimizdagi o‘rta-maxsus, kasb-hunar ta‘limi muassasalarida tahsil ko‘rayotgan turkmanistonlik yoshlarning katta qismi Buxoro tibbiyot kolleji hissasiga to‘g‘ri keladi. Hozir bu yerda 212 nafar qardosh yurt yigit-qizlari shartnoma asosida o‘qishmoqda. 2011 yildan buyon 210 nafarga yaqin turkmanistonlik yoshlar mazkur bilim maskani diplomiga ega bo‘ldi. Ular safi bu yil yana 56 nafarga kengayadi.Viloyatdagi oliy ta‘lim muassasalari va viloyat o‘rta maxsus, kasb-hunar ta‘limi boshqarmasi mutasaddilarining ta‘kidlashicha, navbatdagi o‘quv yili uchun qabulda Turkmaniston Respublikasidan o‘tgan yildagidan ancha ko‘p yoshlarning hujjat topshirishi kutilmoqda.Manba: Buxoronoma gazetasi 22-son hamda uza.uz Erkin Yodgorov, Tohir Istatov (surat), O‘zA
