Qutlug' an'analarga ega bo'lgan ilm va adab maskani - Buxoro davlat universiteti Filologiya fakulteti 85 yillik tarixini nishonlagan universitet bilan tengdoshdir. Ayni paytda fakultetda 1323 nafar bakalavr, 31 nafar magistrant tahsil olmoqda. Ularga 150 dan ortiq professor-o'qituvchilar saboq bermoqdalar. Ular safida besh nafar fan doktori, qirqdan ortiq fan nomzodlarining borligi fakultet ilmiy-ma'rifiy salohiyatidan yaqqol dalolatdir.Fakultet jamoasi O'zbekiston xalq shoiri Jamol Kamol, O'zbekiston xalq yozuvchisi Ne'mat Aminov, Rudakiy nomidagi Davlat mukofoti sohibasi Gulchehra Sulaymonova, Beruniy nomidagi Davlat mukofoti sohibi To'ra Mirzayev, taniqli adabiyotshunos olim Ibrohim Haqqulov kabi bitiruvchilari bilan haqli ravishda faxrlanadi.Uzoq va samarali rivojlanish tarixiga ega fakultet ilmiy-ma'naviy salohiyatini yuksaltirishda Mustaqim Mirzayev, Saidjon Aliyev, Ergash Qilichev, Oxunjon Safarov, Hamid Ne'matov, Askar G'ulomov, Rahim Vohidov kabi ustoz professor-o'qituvchilar hamda ular yetishtirgan shogirdlarning munosib hissasi bor. Ularning jonkuyarligi tufayli fakultetda mamlakat va jahon jamoatchiligi e'tirofiga sazovor bo'lgan ilmiy maktablar shakllandi. Ayniqsa, o'zbek tilshunosligi va adabiyotshunosligi sohalarida yaratilgan maktablar an'analarida yaratilgan maktablar an'analari bugun ham munosib davom ettirilmoqda. Buguni kunda fakultetda oltita kafedra - o'zbek tilshunosligi, o'zbek adabiyoti, rus tili va adabiyoti, ingliz tili va adabiyoti, nemis va frantsuz tili, fakultetlaro chet tillar kafedralari faoliyat ko'rsatmoqda.O'zbek tilshunosligi hamda o'zbek adabiyoti kafedralarida “Jahon adabiyoti kontekstida milliy adabiyot taraqqiyotini qiyosiy o'rganish”, “Substantsial morfologiya, valentlik va sintaktik qurilma talqinlarini ilmiy, qiyosiy tadqiq etish”, “O'zbek mumtoz adabiyoti muammolarini tadqiq etish”, “Zamonaviy o'zbek adabiyoti muammolarini o'rganish”, “Buxoro folklorini regional to'plash va uni umumo'zbek folklori kontekstida o'rganish muammolari”, “O'zbek folklori namunalarining tarjimalarini qiyosiy-tarixiy, tipologik va chog'ishtirma tilshunoslik, lingvistik tarjimashunoslik nuqtai nazaridan tadqiq qilish”, “Til va adabiyot metodikasi muammolarini o'rganish” singari yetti yo'nalishda ilmiy izlanishlar olib borilayotgani diqqatga sazovordir.Fakultetda ustoz-shogird an'anasi munosib tarzda yo'lga qo'yilgan. Jamoa tashabbusi bilan har yili “Filologiya masalalari” nomli ilmiy to'plam nashr ettirilib, unda fakultet professor-o'qituvchilari hamda talabalarining adabiyotshunoslik va tilshunoslik masalalari tadqiqiga bag'ishlangan maqomlari muntazam ravishda chop qilinmoqda. Fakultet kafedralari huzurida faoliyat ko'rsatayotgan “Nihol”, “Yosh tilshunos”, “Lingvistika”, “Yosh tarjimon”, “Lingvistika”, “Yosh tarjimon” kabi to'garaklarda esa talabalarimiz o'z qiziqishlari doirasida qo'shimcha bilim egallamoqdalar. Jamoada G'ayrat Murodov, Laylo Sharipova, Shodmon Sulaymon kabi O'zbekiston Yozuvchilarhamda Jurnalistlar uyushmalari a'zolarining faoliyat ko'rsatayotganligi ham talabalarimizning ijodiy izlanishlariga qanot bag'ishlayotir.2017-2018 o'quv yili qabuli to'g'risidagi O'zbekiston Respublikasi Prezidenti qaroriga ko'ra o'zbek tili va adabiyoti ta'lim yo'nalishiga 80 nafar, ingliz tili va adabiyoti ta'lim yo'nalishiga 80 nafar, rus tili va adabiyoti ta'lim yo'nalishiga 25 nafar, nemis tili va adabiyoti ta'lim yo'nalishiga 14 nafar, fransuz tili va adabiyoti ta'lim yo'nalishiga 14 nafar, ona tili va adabiyoti (rus tili o'zga tilli guruhlarda) 60 nafar, xorijiy til va adabiyot (ingliz) yo'nalishiga 80 nafar talaba o'qishga qabul qilinishi rejalashtirilgan. Shu bilan birga, fakultet kafedralari huzurida magistratura yo'nalishi ham mavjud bo'lib, joriy yilda o'zbek va ingliz tilshunosligi mutaxassisliklari bo'yicha 8 nafar, o'zbek va ingliz adabiyotshunosligi mutaxassisliklari bo'yicha 8 nafar magistrant o'qishga qabul qilinishi ko'zda tutilgan.Demak, xorijiy hamda o'zbek tili va adabiyoti sohalariga qiziqadigan yoshlarimizni yangi o'quv yilida fakultetimiz ilmiy-ma'rifiy hayoti bilan bog'liq ko'plab yangiliklar kutib turibdi. Zotan, zamonaviy ilm-fanimiz o'z hayot yo'lini til va adabiyot yo'nalishi bilan bog'lashni niyat qilgan Navoiy izdoshlariga har qachongidan ham ko'proq ehtiyojmanddir. Anvar HAYDAROV, BuxDU Filologiya fakulteti dekani Dilshod RAJABOV, fakultet dekani o'rinbosari.Manba: "Qorovulbozor tongi" gazetasi
