Yurtimizda yana bir ajoyib faslning tashrifiga guvohmiz. Biz sevgan, biz kutgan, yuraklar sog‘ingan bahor keldi. Bahor yaratish, yashnatish, uyg‘onish fasli. Bu faslda butun tabiat, jamiki tirik jon borki jonlanadi: qushlar uya qurish tashvishiga tushadi, mehnatkash chumolilar tabiatning bobodehqoni kabi ishga kirishadilar…Olam yashillanadi. Tabiat bisotidagi bor ranglarni hech ayamay ko‘z-ko‘z qilishga tushadi. Bodom gullaydi. Unga havasmand o‘rik, olma, olcha, keyin esa yuzlari pushti rangli shaftoli gullaydi. Borliq o‘zgacha tus oladi, o‘zgacha yasanadi. Gullar iforidan boshing aylanadi, sarxush bo‘lasan. Borlig‘ingni tarovatli hislar chulg‘aydi…Yer hidini, ona-zamin bo‘yini tuyasan kishi. Qulog‘ing ostida tabiat simfoniyasi yangray boshlaydi: qushlarning vijir-vijiriyu asalarilarning vizillashi, ariqchadagi suvlarning jildirashi o‘zaro uyg‘unlashadi, ajib kuyga aylanadi…Ishga, o‘qishga, umuman, turmush tashvishlariga shoshar ekanmiz, bir kuni yo‘l chetidagi sap-sariqqina boychechakka ko‘zimiz tushadi nogahon. Xuddiki anchadan beri intiqib kutgan narsamizni ko‘rib qolgandek yoki dilimiz to‘rida saqlab qo‘yganimizni uchratib turgandek entikib ketadi yuraklarimiz. Qadamlarimiz sekinlashadi, o‘sha qadrdonimiz boychechakka yana bir bor qarab olgimiz keladi shu damda. Bir zumgina bo‘lsa-da, miyamizda g‘imirlayotgan tashvishlarni unutamiz. Entiktirgan boychechak bizga zamin farzandi ekanligimizni, ha, asosiysi, qalbimiz borligini yodimizga soladi…Keyin boychechaklar bo‘y cho‘zadi. Hayo, ibodan yuzlari lov-lov yonib qizg‘aldoqlar ochiladi. Lola, nargis, nastarin, jag‘-jag‘laridan tarovatidan olam gulga to‘ladi. Ko‘kda boboquyosh ham mamnun boqadi jilmayib. Oq bulutlar gullar tomoshasiga oshiqadi. Bu qadar go‘zallikka mahliyo bo‘lib, borliqni tezroq g‘uborlardan yuvishga shoshiladi bahor yomg‘iri…Lablarimiz beixtiyor shivirlaydi: Fasl boshi, ham oxiri o‘zingsan,Majnunlarning yo‘ldoshi ham o‘zingsan.Laylilarning sirdoshi xam o‘zingsan,Ko‘klamoyim, ko‘kingdan ber bir chimdim.Umrimizning yangi sahifasini ochayotgan Ko‘klamoyim! Yetmish ikki tomiri Mustaqillik deb atalmish bebaho ne‘matdan bahra olayotgan elimizga, bunyodkor xalqimiz mehnatidan kundan kunga chiroy ochib borayotgan ona-O‘zbekistonimizga tashrifing faqat va faqat ezguliklarni yetaklab kelsin. Qadamlaring qutlug‘ bo‘lsin, KO‘KLAMOYIM!Dilorom Yo‘ldosheva,BuxDU dotsenti
