16.06.2015 yil Bux DU qoshidagi kompyuter va axborot texnologiyalari akademik litseyida“Mustaqil hayotga bunyodkor g‘oyalar bilan qadam tashlaymiz” mavzusida ma’naviy-ma’rifiy tadbir o‘tkazildi. Tadbirda S.Hamroyev – Buxoro viloyat Ma’naviyat va ma’rifat targ‘iboti markazi rahbari, A.Akramova – Buxoro viloyat birlashgan kasaba uyushmasi bo‘lim boshlig‘i, H.Abdulhusenov - Buxoro shahar Ma’naviyat va ma’rifat targ‘iboti bo‘limi rahbari, U.Sobirov-BuxDU katta o‘qituvchisi, D.Qodirov – Bux DU o‘qituvchisi, A.Ziyayev – akademik litsey direktori, kafedra mudirlari, guruh rahbarlari, 214 nafar o‘quvchi. Tadbirni akademik litsey direktori A.S.Ziyayev kirish so‘zi bilan ochib, Buxoro viloyati hokimligi o‘rta maxsus, kasb-hunar ta’limi boshqarmasining 2015 yil 6 iyundagi 01-1018-sonli xati ijrosi yuzasidan “Mustaqil hayotga bunyodkor g‘oyalar bilan qadam tashlaymiz” mavzusida bitiruvchilar ishtirokida tadbirning mazmun-mohiyati, o‘quvchilarning o‘rta maxsus, kasb-hunar ta’limidan keyin oliy ta’lim muassasalariga o‘qishga kirishlari uchun yaratilgan shart-sharoitlar, ayrim bitiruvchilarning aldashib turli xil salbiy g‘oyalar ta’siriga tushushini oldini olish borasida amalga oshirilayotgan ishlar to‘g‘risida o‘z fikrlarini bildirib o‘tdi. Kun tartibidagi masala yuzasidanBuxoro viloyat Ma’naviyat va ma’rifat targ‘iboti markazi rahbari S.Hamroyev so‘zga chiqib, quyidagilarni bayon qildi: “..vijdon erkinligi masalasining, Davlat bilan tashkilotlar o‘rtasida munosabat masalasining mustaxkam huquqiy negizi yaratildi. Bu huquqiy negiz–O‘zbekiston Respublikasi Konstitutsiyasi hamda “Vijdon erkinligi va diniy tashkilotlar to‘g‘risida”gi qonundir. O‘zbekiston Respublikasi Konstitutsiyasi hamda “Vijdon erkinligi va diniy tashkilotlar to‘g‘risida”gi qonunda fuqarolar va diniy tashkilotlar uchun kafolatlangan huquqiy imkoniyatlar to‘la ro‘yobga chiqarilmoqda. Dinining mavqei tiklanyapti, barcha diniy uyushmalarga, jamoalarga qonun doirasida ochiq va daxlsiz faoliyat ko‘rsatish imkoniyati yaratilmoqda. SHu bilan birga O‘zbekiston hukumati musulmonlarning xoxish-istaklarini inobatga olib, islom dunyosining muqaddas yodgorliklarini, tarixiy obidalarini diniy tashkilotlar ixtiyoriga o‘tkazdi va diniy bayramlar umumxalq bayrami sifatida keng nishonlanmoqda”.Ma’ruzachi o‘z fikrini davom ettirib, bugungi kunda dunyo hamjamiyatini tashvishga solayotgan yana bir diniy ekstremistik-terroristik tashkilotlardan biri “ISHID” (Iroq-SHom Islom Davlati) haqida ma’lumot berdi. “ISHID” (Iroq-Shom Islom Davlati) o‘z faoliyati davomida Iroq, Suriya kabi davlatlarning tinch aholisining hayotiga tajovuzlari, turli millatga mansub ayol-qizlarni o‘g‘irlash, nomusga tegish, jinsiy maqsadlarda sotish, zamonaviy texnologiyalardan foydalanganligi uchun yosh bolalarni ayniqsa, voyaga etmagan bolalarni va boshqa din vakillarni tiriklayin yoqib yuborish kabi jinoyatlari haqida tanqidiy fikrlarini bayon qildi.Buxoro viloyat birlashgan kasaba uyushmasi bo‘lim boshlig‘i Adolat Akramova va Buxoro shahar Ma’naviyat va ma’rifat targ‘ibot bo‘limi rahbari H.Abdulhusenovlar ham so‘z olib, yoshlarning bu kabi buzg‘unchi tashkilotlar safiga qo‘shilib ketishi din, islom dini, uning ma’rifiy ahamiyati haqida etarlicha ma’lumotga ega emasligi, ayrim ma’lumotlar rasmiy tasdiqlanmagan axborot manbalari orqali olishlari tufayli kelib chiqayotgani, “Vijdon erkinligi va diniy tashkilotlar to‘grisida”gi qonunga ko‘ra voyaga etmagan bolalarni ularning ota-onalari yoki ularni o‘rnini bosuvchi shaxslar roziligisiz diniy tashkilotlarga jalb etish, diniy bilim berishiga qo‘l qo‘yilmasligi , Oliy va o‘rta diniy o‘quv yurtlarida ta’lim olishi uchun fuqarolarga umumiy majburiy o‘rta ta’limidan keyin ruxsat etilganligi, bu diniy o‘quv yurtlari albatta davlat ro‘yxatidan o‘tgan bo‘lishi lozimligi, diniy o‘quv yurtlarida ta’lim beruvchilar albatta, diniy ta’lim olgan bo‘lishlari hamda diniy ta’lim berishda qonunda belgilangan tartibda ruxsat olgan bo‘lishlari lozimligini ta’kidlab o‘tdi.Shundan so‘ng BuxDU katta o‘qituvchisi, U.B.Sobirov, BuxDU o‘qituvchisi D.Qodirov, litsey direktor o‘rinbosari A.Adizovlar so‘zga chiqib, “Taraqqiyotning hozirgi bosqichida jahonda g‘oyat murakkab va tahlikali jarayon kechishi, bular dunyoning siyosiy, mafkuraviy manzarasidagi o‘zgarishlar, taraqqiyotning yangi bosqichga ko‘tarilishi, bu taraqqiyotga g‘ov bo‘ladigan, demokratik rivojlanishni izdan chiqaradigan, jamiyat barqarorligiga rahna soladigan g‘oyaviy-mafkuraviy to‘siqlarning paydo bo‘lishi bilan izohlanishini hamda oqibatda tili, dini, e’tiqodidan qat’iy nazar, insonning erkin bo‘lib yashashiga qarshi qaratilgan, uning ruhiy dunyosini izdan chiqarish maqsadini ko‘zlaydigan g‘oyaviy, mafkuraviy va informatsion xurujni ifodalovchi “ma’naviy tahdid” tushunchasi o‘ziga xos ma’no va mazmun kasb etishi to‘g‘risida fikrlarini bildirib o‘tdilar. SHuningdek, bitiruvchilarni yuqorida qayd qilingan buzg‘unchi terroristik tashkilotlar domiga tushib qolmaslikka, buning uchun avvalo, a’lo o‘qish, namunali xulq egasi bo‘lish, davlat va jamoat ishlarida, turli ma’naviy-ma’rifiy va sport tadbirlarida faol ishtirok etish, kasb-hunar o‘rganish, akademik litseyda olgan bilimlarini kelajakda fan taraqqiyoti va yurtimiz rivoji uchun sarflashga chaqirdilar. Tadbir so‘nggida “Manqurtlik yoxud aldangan oila qismati” videofilmi namoyish qilindi. Ma’naviy-ma’rifiy tadbir yuqori saviyada, qizg‘in baxs va munozaralarga boy bo‘lib, ko‘tarinki ruhda o‘tkazildi. Berilgan savollarga mutaxassislar tomonidan javob berildi. Mazkur mavzularda kelgusida shu kabi tadbirlarni o‘tkazishga kelishib olindi.
