Yoshlari sog`lom, baquvvat, aqlli, bilimli va yuksak ma’naviyatli mamlakatning kelajagi albatta qudratli bo`ladi. Yurt ravnaqida yoshlarning o`rni beqiyosdir. Buning uchun yoshlarni to`g`ri tarbiyalash, ularni etuk mutaxassis bo`lib etishlari uchun muhim ahamiyat kasb etadi.Respublikamizda yoshlarning sog`lom turmush tarzini shakllantirish va kelajakda munosib kadrlar bo`lib etishlari uchun bir qator ishlar amalga oshirilmoqda. Jumladan, 17 noyabr – Xalqaro talabalar kuni munosabati bilan “Buxoro” sport majmuasida “Yoshlar bugungi va ertangi kunimizni hal qiluvchi kuchidir” shiori ostida yoshlar festivali hamda gala kontsert o`tkazildi. Ushbu tadbirga universitetdan 3000 nafardan ortiq talaba-yoshlar hamda universitet ma’muriyati ishtirok etdi. Mazkur tadbir dasturiga muvofiq viloyatdagi oliy ta’lim muassasalari o`rtasida sport musobaqalari o`tkazildi va unda universitet jamoasi mutloq g`oliblikni qo`lga kiritdi. Sport musobaqalaridan so`ng universitetda tahsil olayotgan iqtidorli va iste’dodli talabalardan 10 nafari 1280 000 so`m miqdorida qimmatbaho sovg`alar bilan hamda “Kamolot” YOIH viloyat kengashi tomonidan “Bunyodkor-2014” talabalar mehnat otryadida fidokorona mehnat qilgan 3 nafar talabalar taqdirlandilar.
